Na wjeršku w Montrealu akcenty zhromadneho dźěła postajili

Montreal/Brüssel (dpa/SN). Hladajo na přiběrace napjatosće a ćežki poćah z USA so Europska unija a Kanada dale a bóle přibližujetej. Na kóncu dwaj dnjej trajaceho wjerška w kanadskim měsće Montrealu chcedźa so zastupjerjo wobeju stronow dźensa, pjatk, dojednać, kak w přichodźe intensiwnišo hromadźe dźěłaja. „Dźensa zahajimoj – Europska unija a Kanada – nowy kapitl swojich poćahow“, rjekny zwjazkowy kancler Friedrich Merz, kotryž sam w Kanadźe njeje, za čas jězby po Aziji. Zhromadnje wutworitej partneraj – EU a Kanada – nětko „aliancu do přichoda“.

Z tym Merz tež wuzběhny, zo sej wón pomjenowanje „asociěrowane čłonstwo“ nadal zakaza. Poprawom chce prezidentka komisije EU Ursula von der Leyen nowe poćahi z Kanadu takle pomjenować a je z tym tež kwalitatiwnje na nowy niwow zběhnyć.

Drježdźany (dpa/SN). Wot klětušeho změja přistajeni w Sakskej prawo na kubłanski dowol. Połnje přistajenym při­zwoli stat potom tři dźěłowe dny w kalenderskim lěće, kiž smědźa za připóznate dalekubłanja wužiwać, zdźěli hospodarske ministerstwo. Wobsah dalekubłanja njedyrbi powołanju wotpowědować, ale smě so tež z temami dobrowólneho angažementa zaběrać. Přistajeni dyrbja dalekubłanje znajmjeńša dwanaće tydźenjow do zahajenja pola dźěło­dawarja přizjewić. Jenož w nuznych padach smě dźěłodawar próstwu zapowědźić. Za to smědźa přistajeni płaćeny dowol wzać, dalekubłanje pak dyrbja sami zapłaćić. Sakska bě nimo Bayerskeje posledni zwjazkowy kraj, hdźež kubłanski dowol móžny njebě.

Berlin (SN). Młodźinska iniciatiwa „Gen Z to zrjaduje“ chce jutře, sobotu, z wjace hač 144 000 wobdźělnikami we wjace hač 20 městach Němskeje za wjace inwesticijow w kubłanju, strowotnistwje a na socialnym polu demonstrować. Iniciatiwa je zwjazk młodych ludźi, kotřiž noch­cedźa po swójskich informacijach hižo přihladować, „kak so wo našim přichodźe rozsudźi, bjez toho zo nam připosłuchaja“. Do generacije Z słušeja wot lěta 1997 do 2012 narodźeni. Iniciatiwa ma so za nadstronsku. Ekstremizm, nje­přećelske nastajenje napřećo wustawje, rasizm a šćuwańcu na protestach wona wotpokazuje. Mjeztym je so Šulerska unija Němskeje ze zjawnym listom na zwjazkoweho nutřkowneho ministra Alexandera Dobrindta (CSU) a na nutřkownych ministrow zwjazkowych krajow wobroćiła. Předsyda unije Jakob Hornhues žada sej krótkodobny wěstotny wjeršk. Nutřkowni ministrojo dyrbjeli swojej zamołwitosći wotpowědować a zawěsćić, zo su Zwjazk a kraje na móžne krawale přihotowane. „Njesměmy ničo připadej přewostajić“, rjekny Hornhues.

Jeničce 46 centimetrow dołha je zawěra železniskeho přechoda w měšćanskim dźělu Weidenpesch w Kölnje. Wšědnje so mólička zawěra něšto razow za pěškow začinja a zaso wotewěra. Na Google maps běchu připrawu wóndano „najmjeńšu železnisku zawěru Němskeje“ mjenowali. Wuska zawěra pak žadyn zmylk njeje, zdźěli Stephan Anemüller, kotryž bě ju w nadawku Kölnjanskich wobchadnych zawodow planował.

Finska powěsćernja STT po nimale 140 lětach dźěłać přestanje. Po wjelelětnych financielnych problemach předewzaće swoju powěsćowu a wobrazowu słužbu po 31. měrcu 2027 hižo dale njepowjedźe, wone wčera zdźěli. Serwis rozšěrjenja nowinskich zdźělenkow pak nadal wobsteji. Agenturu běchu w lěće 1887 załožili. Něhdźe 90 dźěłowych městnow šmórnu.