Dotal nimale 10 000 mortwych
Horcoty dla přisadźichu tysacy ludźi swoje žiwjenje
Berlin (dpa/SN). Institut Roberta Kocha (RKI) trochuje, zo je lětsa hižo nimale 10 000 ludźi po cyłej Němskej horcoty dla zemrěło. Ličba smjertnych padow, kotruž su wysoke temperatury zawinili, bě hač do 19. julija na 9 800 stupała, zdźěla RKI w swojej tydźenskej rozprawje wo smjertnosći horcoty dla. Tole je wjace mortwych hač we wšěch lětach po 2016. Najwjace mortwych horcoty dla zličichu w zašłych dźesać lětach w lěće 2018, jako wysokich temperaturow dla w běhu lěta 9 000 ludźi zemrě.
5 000 ludźi bě lětsa swoje žiwjenje w horcych dnjach w druhej połojcy junija přisadźiło. Tehdy běchu temperatury po cyłej Němskej nad 40 stopnjemi stupali. Wot spočatka apryla hač do 12. julija trochuje RKI ličbu smjertnych woporow na 7 900. W tydźenju wot 13. do 19. julija bě jich hišće raz 1 900 wjace.
Wysoke temperatury su wosebje za staršich ludźi strašne. Lětsa bě 5 420 smjertnych woporow z najstaršeje starobneje skupiny nad 85 lětami. Zdźěla ludźo bjezposrědnje horcoty dla zemrěja, často pak je kombinacija horcoty a hižo znatych chorosćow přičina smjerće, rěka z RKI.
Dobrodušne pjenjezy
Bilger pomina sćerpnosć
W Drježdźanach roboter „kraluje“
Sakske kliniki najdigitalniše
Drježdźany (dpa/SN). Sakske chorownje su w zwjazkowym přirunanju jara derje digitalizowane. Tole je wuslědk woprašowanja konsorciuma „DigitalRadar Krankenhaus“, kotrež bě zwjazkowe strowotniske ministerstwo do nadawka dało. Z 60,3 wot 100 móžnych dypkow steji Sakska mjez zwjazkowymi krajemi na prěnim městnje, před Berlinom, kiž docpě 59,4 dypki. Zwjazkowy přerězk je 55 dypkow. „Digitalizacija sakskich chorownjow derje postupuje. Nětko dyrbja tole tež pacientki a pacienća konsekwentnje pytnyć“, nawoda chorobneje kasy Techniker w Sakskej, Alexander Krauß, wuslědki komentuje.
Stopjeń digitalneje zrałosće měrja w sydom dimensijach, a to na zakładźe toho, kak so chorownje same posudźuja. Lětsa běchu we wšěch dimensijach polěpšenja zwěsćili. W lěće 2020 bě Zwjazk tak mjenowany zakoń wo přichodźe chorownjow schwalił. Z tym zwisuje tež fonds, kotryž ma wuwiće chorownjow financielnje podpěrać. Dohromady steja tam 4,3 miliardy eurow za digitalizaciju k dispoziciji. Sakska dóstanje z toho 212 milionow eurow.
Supertalent do Choćebuza
To a tamne (30.07.26)
Wopušćene awto, kotrehož warnowanske lampki běchu hišće zaswěćene, nadeńdźe policija wčera, srjedu, na awtodróze 94 w Hornjej Bayerskej. Muž a žona, kotrajž běštaj z awtom po puću na lětanišćo w Mnichowje, běštaj je prosće stejo wostajiłoj. Awto bě so skóncowało a muž dyrbješe nuznje swoje lětadło dosćahnyć. Trampujo běštaj so na dalši puć nastajiłoj. Policiju wo tym informowałoj njeběštaj.
Za 26 400 dolarow su črije Justina Bibera přesadźili, kotrež měješe wón na swojim wustupje w połčasnej přestawce finala swětoweho koparskeho mišterstwa wobute. Tole zdźěli awkciski dom Chritie’s. Sneakery marki SKYLRK, kotraž Biberej słuša, běchu beige z róžojtym detailom na pjaće. Po wuprajenjach awkciskeho domu bě Biber tule kombinaciju barbow w koparskim stadionje prěni raz prezentował.
W Krupce putniske kemše swjećili
Łužičanka mjez stipendiatkami
Borkowy (SN/MiR). Dobyćerki 18. błótowskeho literarneho stipendija su wuzwolene. Mjez nimi je w lěće 1993 narodźena Ruth-Maria Thomas, kotraž je w Choćebuzu wotrostła. Wona smě klětu w nalěću štyri njedźele w hotelu Bleiche w Błótach přebywać, zo by nowu prozowu twórbu napisała. Thomas je jako socialna dźěłaćerka w młodźinskej pomocy skutkowała a po tym w Lipsku, hdźež dźensa bydli, na Němskim literarnym instituće studowała. Ze swojim debitowym romanom „Najrjeńša wersija“ poradźi so jej w lěće 2024 literarny přełam. Kniha steješe mjez druhim na lisćinje za Němske knižne myto a bu z mytom Ulle Hahn wuznamjenjena. Lěto pozdźišo je wona podcast „Łamk – žony mjez wuchodom a tučasom“ wozjewiła. Lětsa ma jeje roman „Druha najwjetša lubosć“ wuńć. W swojich twórbach rozestaja so wona z namocu přećiwo žonam. Po Reinhardźe Stöckelu je wona druha z Łužicy pochadźaca awtorka, kotrejž bu stipendij přiznaty.
Wěstotna rada so schadźuje
Bagdad (dpa/SN). USA a Sawdi-Arabska su minjenu nóc milicy w Iraku nadpadnyli, kotrež z Iranom sympatizuja. Milica mobilizowarjow ludu wozjewi, zo je při tym 20 jeje wojowarjow swoje žiwjenje přisadźiło, dalšich 32 je zranjenych. Ministerski prezident Iraka Ali al-Saidi je dźensa dopołdnja wěstotnu radu na nuzowe posedźenje zwołał. Při bombardementach běchu USA a Sawdi-Arabska twarjenja a infrastrukturu we wjacorych kónčinach kraja zničili.
Telko dołha kaž hišće ženje
Wiesbaden (dpa/SN). Zjawne zadołženje bě loni tak wysoke kaž nihdy do toho. Dołh w zjawnym etaće, kiž běchu zwjazk, kraje a komuny nahromadźili, wučinješe dohromady 2 662,2 miliardow eurow. Kónc lěta 2025 bě to po informacijach Zwjazkoweho zarjada za statistiku 31 887 eurow na kóždeho w Němskej bydlaceho.
BMW pušći 8 000 ludźi
