Lutz Rathenow wliw Lessinga na swójske tworjenje znazornił
Kamjenc (SN/MiP). Po spožčenju myta Zejlerja srjedu běše Kamjenska cyrkej swj. Hany wčera wječor wospjet połna, jako so tam 13. Kamjenska narěč wotmě. Jako referenta běchu sej tónraz w Durinskej rodźeneho spisowaćela Lutza Rathenowa přeprosyli. Swojej narěči spožči wón titul „Frohgemute Ungewissheit im Aufklärungslabyrinth“.
Přichwatanych hosći, mjez kotrymiž njeběchu jeničce Kamjenčenjo, witaše prof. dr. Carsten Gansel z Gießena, předsyda wědomostneje přirady Kamjenskeho dźěłanišća za recepciju Lessinga, kotrež seriju přednoškow prawidłownje zarjaduje. Wón skedźbni na najwažniše žiwjenske stacije 74lětneho. „Rathenow běše posrědkowar mjez literarisko-wuměłskej scenu a politiskej opoziciju NDR. Mjezsobna wuměna a dialog stej wažnej temje w jeho žiwjenju. Runje dźensa wšak stej wažnišej hač hdy prjedy“, wón podšmórny.
