Kamjenc (dpa/SN). Ličba bjezdomnych je so w Sakskej porno předlětu wo něhdźe pjećinu znižiła. Składnostnje dźensnišeho dnja bjezdomnych Statistiski krajny zarjad zdźěli, zo bě spočatk lěta 5 590 bjezdomnych registrowanych, to je 1 295 mjenje hač loni. Třo wot pjećoch potrjechenych su mužojo. Z dohromady 4 340 registrowanymi su ludźo bjez němskeho staćanstwa najwjetša skupina mjez bjezdomnymi.
Bilancu žnjow předstajił
Stołpin (dpa/SN). Bilancu žnjow sakskich ratarjow je prezident Sakskeho burskeho zwjazka Torsten Krawczyk wčera předstajił. Horcoty a přemało spadkow dla su wunoški lětušich žnjow pod přerězkom. Wón na to skedźbni, zo je poměr mjez produkciskimi kóštami a dochodami ratarjow lěto a špatniši. Samo dobre wunoški hižo njedosahaja, zo bychu swoje wudawki zapłaćić móhli. „Nimamy žane financielne srědki za nuznje trěbne inwesticije“, Krawczyk wuzběhny a doda: „Wot politiki wočakujemy spěšne rozsudy na dobro našich ratarjow, město toho zo jich pospochi poćežuje.“
Sakska financielnje stabilna
