Mje je přeco hižo estetisce myliło, hdyž dyrbjach na dróze ludźom přihladować, kotřiž swój fastfood do so tykaja (najebać to, zo sym to druhdy tež činił). Nochcemy to radšo zakazać? Singapur pokazuje, što je wšo móžno. Tam njesměš žwjenkačk ani w zaku měć, wšako móhł jón ewentualnje na ławku w parku zlěpić. Tež při wobmjezowanju kurjenja pod hołym njebjom mamy hišće wulke rezerwy. Čehodla njepłaći pakćik cigaretkow dawno sto eurow? W Berlinje sej Zeleni a druzy wagony za žony w U- a S-ćahach žadaja, to tola tež we wšelakich muslimiskich krajach funguje. A zo so hólcy w lěću na open-air-koncerće T-shirt sleku, je mjeztym w Němskej dale a husćišo zakazane. Za čas młodosće sym sej druhdy hodźiny čakanja w nocy na dwórnišćach z nopaškom čerwjeneho wina wolóžił – mjeztym wobhladuje so tajke něšto jako asocialne resp. ma so zasadnje zakazać. Někotři maja to wšo za postup ciwilizacije. Mam za legitimne, na tym dwělować. Marcel Brauman

Magdeburg/Berlin (dpa/SN). Štóž je po puću a pyta online za hosćencom abo hotelom, orientuje so husto po recensijach na Google Maps a po tym, z kelko hwězdami buchu domy tam hódnoćene. Pola někotrych hosćencow a hotelow Google hižo dlěje na to skedźbnja, zo buchu hódnoćenja w zašłych lětach wotstronjene. Z tutym pokiwom chce so Google wo wjac transparency hladajo na posudki w syći starać.

Z testa Němskeje powěsćernje (dpa) mjez wjace hač 3 700 hosćencami a hotelemi wuchadźa, zo su posudki na mnohich stronach wotstronjene. Zdobom přepytowanje wotbłyšćuje, zo jewi so pokiw na wotstronjenje we wjetšich městach husćišo hač w mjeńšich sydlišćach. W Lipsku měješe něhdźe 20 procentow profilow tajki pokiw. W Drježdźanach, Halle a Magdeburgu bě to stajnje něhdźe 15 proc. a w Erfurće něhdźe 13 proc. profilow, kotrež je dpa přepytowała. W Berlinje, Kölnje a Frankfurće běše samo něhdźe kóždy třeći zawod potrjecheny. Porno tomu wučinješe podźěl w mjeńšich městach ně­hdźe dźesać procentow a we Wittenbergu a Stendalu jenož pjeć procentow.

Dźensa dokónči Ralbičanski farar, kanonik Šćěpan Delan, swoje 70. žiwjenske lěto. Po rańšim postrowje pěstowarskich dźěći jemu duchowni sobubratřa w připołdnišich hodźinach k jubilejej gratulowachu. Na pózdnim popołdnju swjeći farar Delan ze swojej wosadu, w kotrejž mjeztym nimale­ jědnaće lět skutkuje. Do toho běše wón 18 lět w Radworju z fararjom. Wot 2011 přisłuša Drježdźanskemu tachantskemu kapitlej­ swjateho Pětra, wot 2024 je zdobom­ čestny kanonik w Litoměřickim katedralnym­ kapitlu swjateho Šćěpana. Foto: Konstantin Hrjehor

W muzeju bikinijow na kupje Usedom wisa pódla kupanskeho wobleka ikony Pamele Anderson ze serije Baywatch a dopomnjenkow Davida Hasselhoffa z Hollywooda w přichodźe dalši eksponat: oranžojte najlubše kupanske cho­lowy bywšeho boksera Axela Schulza. Wuspěšny němski sportowc je muzejej swoje kupanske cholowy přewostajił. Cholowy změja tam krute městno we wustajeńcy „Swět so kupa – 200 lět kupanska kultura wot Usedoma hač do Hollywooda“, kotraž budźe hač do nazymy w muzeju přistupna.

Mjedwjedź je po wšěm zdaću w južnym Oberallgäuju po puću. Bayerski krajny zarjad za wobswět bu informowany, zo su ludźo ekskrementy našli. Tuchwilu fachowcy­ genetiske proby wuhódnoćeja.