Berlin (dpa/SN). Ze swojim wuprajenjom, zo je „ministerstwo wšitke zakłady za reformu BAföGa stworiło, zo pak z toho wuńdu, zo frakciji knježerstwa reformu njepodpěrujetej“, je zwjazkowa ministerka za slědźenje Dorothee Bär (CDU) zwadu w koaliciji nastorčiła. Reforma mjez druhim předwidźi, měsačnu by­dlensku pawšalu za studowacych wot přichodneho zymskeho semestra wot tuchwilu 380 na 440 eurow zwyšić.

Poprawom běštej so frakciji CDU/CSU a SPD po diskusijach kónc apryla na reformu dojednałoj. Znajmjeńša SPD wot toho časa kruće z toho wuchadźeše, zo reforma steji. Ćim iritěrowaniši reagowachu socialni demokraća na wčerawše wuprajenja ministerki.

Berlin (dpa/SN). Zhromadnje ze sydom dalšimi wuzwolenymi su wčera w Berlinje spěwytwórca Wolfa Biermanna z rjadom Pour le mérite za wědomosće a wuměłstwa počesćili. Zhromadźenstwu mytowanych přisłuša jenož něhdźe 80 wusahowacych wosobinow z Němskeje a druhich krajow, mjez nimi mnozy lawreaća Nobeloweho myta. W zjawnosći mało znaty rjad je pruski kral Friedrich Wilhelm IV. w 19. lětstotku załožił, pa­tronatstwo wukonja dźensa zwjazkowy prezident Frank-Walter Steinmeier.

Stawiznar Karl Schlögel hódnoćeše Biermanna jako „přewšo politisku wo­sobinu a swojorazneho wliwapołneho wuměłca, kotrehož spěwy zwuraznjeja žiwjenske začuće cyłeje generacije“. Biermann sam naspomni, zo dyrbješe so hladajo na myto „najprjedy raz pola Google naprašować“. Na „wojerskich korjenjach myta“ so „hižo njepostorkuje“, wón rjekny a doda, zo je „zasadnje bóle za měr, tola druhdy tež za wójnu – mjenujcy, dźe-li wo bój swobodneje towaršnosće a demokratije přećiwo potłóčowanju“.

Strack-Zimmermann na stronskim zjězdźe FDP z kandidaturu překwapiła

Berlin (dpa/SN). Hišće někotre mjeńšiny do wólbow prezidija a zwjazkoweho předsydstwa na kónctydźenskim zwjazkowym stronskim zjězdźe FDP běše Wolfgang Kubicki jenički požadar wo zastojnstwo stronskeho předsydy. Njejapcy pak zhonichu wón a mnozy delegaća, zo tež europska politikarka Marie-Agnes Strack-Zimmermann kandiduje. Dokelž běštaj w tydźenjach do zjězda dotalny šef FDP Christian Dürr kaž tež krajny předsyda strony w Sewjerorynsko-Westfalskej Henning Höne swoju kandidaturu cofnyłoj, „je sej strona šansu na wotewrjene a fairne wubědźowanje sama sćazała“, Strack-Zimmermann pozdźišo podšmórny. Wona doda, zo chcyše ze swojej krótkodobnej kandidaturu stronskim čłonam móžnosć wróćić, so rozsudźić móc. Porno konserwatiwno-liberalnemu Kubickijej słuša Strack-Zimmermann skerje do lěhwa tradicionelneho socialnoliberalneho politiskeho kursa.

Z tym njejsym hižo ličiła: Jako dźensa rano w awće Serbski rozhłós zapiknych, słyšach powěsć, zo so porodźernja w Kamjencu tola njezačini – najprjedy raz hač do kónca lěta. Tež, hdyž mje wjac wosobinsce njepotrjechi, je mje powěsć jara zwjeseliła. Wšako smědźach tam před něšto lětami sama dwójnikow na swět přinjesć a někotre dny přebywać. Runje při tajkim rozbudźacym podawku kaž porodźe je přijomna a wěsta atmosfera za mać a tež nana wažna. A tajku namakachu serbskich lěkarjow a babow dla tu wosebje tež serbske swójby. Ale nic jenož tohodla mam zdźerženje porodźernje za dobry rozsud. Druhdy ma dźěćo jara nuznje na swět přińć a móže riziko za mać a dźěćo być, njedóstanjetej-li dołheho puća do chorownje dla sčasom pomoc. Tuž je wobchowanje porodźernje wosebje za młode swójby a wšitkich, kotřiž su z cyłeje mocy přećiwo zawrjenju wojowali, małe dobyće a da nadźiju, zo so puće nańdu, ju tež přichodnje zdźeržeć. Chrystina Delanowa