Podstupim (dpa/SN). Braniborske strowotniske ministerstwo warnuje zawody w swojim kraju připowědźenych wysokich temperaturow dla. „Dźěłodawar dyrbi garantować, zo ma škit před horcotu na dźěłowym městnje“, praji ministerka za strowotnistwo Britta Müller (bjezstronska). K temu słuša znjesliwa temperatura w rumnosći kaž tež škit před słóncom. Hdyž je horcyšo hač 35 stopjenjow celsiusa, njesmě so rumnosć hižo wužiwać, chiba zo hodźi so klima­tizować. Tohorunja ma so ćežke dźěło w horcych hodźinach wobeńć abo znajmjeńša redukować.

Němscy meteorologojo su za přichodne dny temperatury nad 30 stopjenjow celsiusa wěšćili.

Brüssel (dpa/SN). Komisija EU je jednanja z Ukrainu wo předźěłanym zrěčenju wo swobodnym wikowanju zakónčiła. Ze zrěčenjom chcedźa Ukrainu poněčim do europskich hospodarskich wikow zapřijeć, komisija EU zdźěla. Po słowach prezidentki komisije EU Ursule von der Leyen maja so ze zrěčenjom puće tworow zaručić a solidarita z wot Ruskeje nadpadnjenej Ukrainu zwuraznić. EU změje swoje lěpšiny, dokelž su cła niske abo dospołnje wotstronjene. Ukraina móže swoje wudźěłki dale do krajow Europskeje unije eksportować. W srjedźišću zrěčenja steja ratarske wudźěłki. Wobě stronje stej so na kontingenty dojednałoj, kotrež móža so do wobeju směrow předawać. Za twory kaž pšeńcu, kukuricu, cokor, měd, mjaso pjerizny a jeja z Ukrainy płaća dale wosebje krute předpisy za eksport do krajow EU. Hladajo na starosće europskich ratarjow běchu hižo loni krute směrnicy wukazali.

Wobě stronje dyrbitej zrěčenje hišće wobkrućić. Komisija EU chce dojednanje čłonskim krajam EU přepołožić.  

Dźensa před 35 lětami je z měnowej uniju zapadna hriwna do NDR přišła

Berlin (dpa/SN). Štóž je podawk 1. julija 1990 sobu dožiwił, jón njezabudźe: ­Njesměrnu euforiju, jako zawjedźechu w tehdyšej NDR zapadnu hriwnu, D-Mark. Mnohim bě to symbol wulkeje swobody a noweho započatka po 35 lětach socialistiskeho hospodarjenja.

Wěrno je, zo započa so 1. julija 1990 hospodarski eksperiment pjenježneje, hospodarskeje a socialneje unije bjez runjeća. Wobydlerjo tehdyšeje NDR swoje zamóženje do zapadneje měny změnichu. Wšitke mzdy, renty a podruže buchu w poměrje jedyn k jedyn přestajene.

Tři měsacy do zjednoćenja Němskeje płaćachu naraz zapadoněmske prawidła socialneho wičneho hospodarstwa w NDR. Dźensa wěmy, zo bě tole z tójšto njelěpšinami zwjazane. Sćěhi dramatiskeje změny su hač do dźensa politisce a hospodarsce čujomne. Zwostanje prašenje, hač bě druhich móžnosćow.

So wě, zo njeje prof. Wornar w stejišću k listej nastupajo sorabistiku pokiw wuwostajił: „W Sakskej płaći princip wysokošulskeje awtonomije, a tutón list hodźi so jako pospyt wobhladować, do swobody slědźenja a wučby zasahnyć.“ Tohodla ­njeje wotpósłar lista ministrej konkretnje poručił, kak maja so namjetowane naprawy zwoprawdźić. W žadanju za dalšimi profesurami móhli sej jednaćelski direktor sorabistiki a podpěraćeljo lista chětře přezjedni być. Hdźe z kooperaciju klaca, njech akterojo za jednym blidom sedźo dorěča. Zo tuchwilu dostudowani sorabisća naše redakcionelne teksty bjezporočnje korigować njezamóža, nima jenož z uniwersitu,­ ale tež ze šulu činić. Přiwšěm je list wažny nastork za wěcownu debatu bjez tabuwow, wšako njemóžeš sej přichod serbšćiny prěnjotnje z pjenjezami wukupić. Hladajo na termin wozjewjenja, spočatk wulkich prózdnin w Sakskej, ­poskićam, zo temu za šěsć njedźel zaso wobjednawamy. Marcel Brauman