Delegacija w Brüsselu nawjazuje – tak čitamy w jeje zdźělence – tež na lětušu 30. róčnicu konkordata mjez Swjatym stołom a Sakskej, dwě lěće do toho bu statne zrěčenje z ewangelskej cyrkwju podpisane. W konkordaće jewja so regionalne wosebitosće kaž „škit katolsce wobwliwowaneho serbskeho kulturneho kubła“. Tohodla je chwalobne, zo su předsydu Domowiny ­zapřijeli. Tež naspomnjene zakładne hódnoty kóždy rozumny čłowjek podpisa. Po wozjewjenym planje w Brüsselu ze zastupjerjemi stronow konferuja, kiž w Sakskej dobru połojcu wolerstwa reprezentuja. Liberalna byrgarska demokratija pak je lětstotkaj wot wubědźowanja lěweho a praweho lěhwa žiwa. Nimo toho je něhdyši němski bamž Benedikt XVI. hišće po wotstupje wuski poćah mjez němskim statom a „njeduchownej běrokratiju“ resp. „eta­blěrowanym, wysoce płaćenym katoli­cizmom“ kritizował. Budźmy wćipni, kelko njewotwisneho křesćanskeho myslenja so w Brüsselu jewi. Marcel Brauman

Ze šansonom „La Bohème“ Charlesa Aznavoura staj francoski prezident Emmanuel Macron spěwajo a armeniski premierminister Nikol Pašinjan za bijadłom hosći statneho banketa w Jerjewanje překwapiłoj. Něšto pozdźišo so ­jimaj na křidle hrajo armeniski pre­zident Wahagn Chačaturjan přidruži. Na bankeće wobdźělichu so zastupjerjo 40 europskich statow.

W dešćowej role tčaceje kóčki dla bě wobydler póndźelu wohnjowych wobornikow w Neustadće pola Coburga na pomoc wołał. Na kreatiwne wašnje woni swój słužbny nadawk wuspěšnje spjelnichu. Dokelž běše roła do murje zatwarjena, kotruž zastojnicy njetrjebawšo rozbić nochcychu, pomhachu sej z wosebitym srěbakom. Zatłusnjene zwěrjatko su na kóncu wuspěšnje wuchowali, to pak njebě kóčka, ale kuna.

Na wuchodźe Awstriskeje bydli słowjanski ludźik, kotryž je Serbam w mnohim podobny a skutkuje jako jich wěsty „dwójnik“. Su to (Gradźišćanscy) burgenlandscy Chorwaća, kotrychž prjedownicy běchu w 16./17. lětstotku z teritorija dźensnišeje Chorwatskeje kaž tež Bosniskeje wupućowali, dokelž bu jich domizna wot Turkow wohrožowana. Podawši so do sewjera zasydlichu so wuchodnje Wiena. Kónčina dźensa rěka Gradźišćanska (Burgenland) (chorwatsce Gradišće) a je jedyn z dźewjeć zwjazkowych krajow Awstriskeje.

Kijew/Moskwa (dpa/SN). Po Ruskej je tež Ukraina njewočakowano přestawku wojowanjow připowědźiła. Po słowach ukrainskeho prezidenta Wolodymyra Zelenskeho ma so krótki přiměr hižo přichodnu nóc zahajić. Kak dołho ma trać, wón pak njerjekny. Do toho bě ruski prezident Wladimir Putin přiměr za pjatk a sobotu připowědźił. 9. meje swjeći Ruska tradicionalnje dobyće Sowjetskeho zwjazka nad Němskej.

Płaćizny dodatnje njezwyša

Berlin (dpa/SN). Pućowanske předewzaća w Němskej nochcedźa płaćizny za ­hižo knihowane jězby kupcow zwyšić, byrnjež płaćizny kerozina stupali. Tole rozprawjeja poskićerjo Tui, Alltours a Dertour na naprašowanje nowiny ­„Tagesspiegel“. Za knihowanja w přichodźe pak móhło so to změnić. Zarjadowarjo smědźa płaćizny jězbow dodatnje zwyšić, jeli bu to w zrěčenju dojednane. Jeli so jězba wo wjace hač wosom procentow podróši, maja kupcy wosebite prawo ju cofnyć.

Za koaliciju rěčał