Štóž so na wulkim wubědźowanju wobdźěli a dyrbi so kritiskim wočam jurorow předstajić, tón chce so wězo tak derje kaž móžno prezentować. Při wubědźowanju wsow njeje to hinak. Potom wjesnjenjo tež posledni kućik rjenje wurjedźa a swoje najrjeńše blečki pokazaja. Po cyrkwinskej protyce drje so jutrowny čas ze swjatkami skónči. Zo pak w Němcach krótko do swjatkow křižerjo jěchaja a za jurorow „jutry hraja“, zawostaja we mni jěry přisłód. Nałožk z hłubokim nabožnym pozadkom njeje tola žana atrakcija, kotruž móžeš ­cyłe lěto jako kekliju předstajeć. To dopomina mje na naprašowanje, kiž bě před tójšto lětami do Domowinskeho zarjada dóšło. Skupina japanskich turistow chcyše rady raz křižerjow dožiwić. Štož su tehdy přećelnje wotpokazali, dźensa po wšěm zdaću žadyn problem wjace njeje. Snano w přichodźe tež prěnje swjate woprawjenje abo firmowanje abo procesion na Bože ćěło „hrajemy“, zo móhli swoju wjes prawje rjenje prezentować. Marian Wjeńka

Podstupim/Drježdźany (dpa/SN). Podłu němskich awtodróhow pobrachuja tysacy parkowanišćow za nakładne awta. Tole je po měnjenju Awtomobiloweho kluba Europa strašne wohroženje nadróžneho wobchada. Wot 15. apryla hač do 3. junija su w nadawku kluba ličili, kelko nakładnych awtow wječor wot 20.30 hodź. při awtodróhach parkuje. Při tym zwěsćichu, zo je předewšěm na južnym Berlinskim wobkruhu A10 a podłu A24 w Mecklenburgsko-Předpomorskej situacija wopak parkowacych awtow dla strašna.

Z wućeženjom 165 procentow je w Sakskej wosebje parkowanišćo Hornja Łužica sewjer při A4 negatiwnje napadnyło. Podłu A17 pola Drježdźan zwěsćichu 120 procentow wućeženja. „Wot 16 hodź. šoferojo wšědnje wo parkowanišća wojuja“, rjekny rěčnik předsydstwa Zwjazka nakładnych wozydłownistwow Dirk Engelhardt. Parkowanišća su wječor a w nocy masiwne přećežene a wobchad wotstajenych wozydłow dla zdźěla strašnje wohroženy. Tak steja nakładne awta na zajězdach, kiž na parkowanišća wjedu abo na parkowanskich płoninach, kiž su za wosobowe awta rezerwowane.

Swěru wothladane młode baćony w swojim hnězdźe w Dešnje wotrostuja. Dešno je jedne z dźesać městnow po wšej Němskej, hdźež najwjace baćonow hnězdźi. ­Tuchwilu maja ptaki tam wjace hač 20 městnow za hnězdźenje. Połojca z nich je kóžde lěto wobsadźena. Spočatk apryla běchu so baćony do swojich hnězdow we wsy nawróćili. Přerěznje wulahnu dwě do tři jeja. Su pak tež wuwzaća. Kelko młodźatow na kóncu přežiwi a narosće, wotwisuje wot poskitka picy. Tuchwilne włóžne wjedro baćonam wočiwidnje tyje. Kónc awgusta so baćony a jich dorost na łukach hromadźa a na wotlět do juha hotuja. Foto: Michael Helbig

Drježdźany (dpa/SN). Zastupowaca mi­nisterska prezidentka Sakskeje Petra ­Köpping (SPD) je sej wěsta, zo je w zwisku z miliardy eurow wopřijacym programom zwjazkoweho knježerstwa na dobro inwesticijow do přichoda hišće wjele dźěła. „Wurjadne zamóženje w tutej formje njebudźe w Sakskej a na wuchodźe scyła skutkować“, rjekny Köpping w Drježdźanach. „Wuměnjenja, zo móhli tute srědki zasadźić, su sprostnjene.“ Tak je z jeje wida problematiske, zo maja so srědki w času napjatych etatow jenož za přidatne a nowe inwesticije nałožować. „To je wulki zadźěwk za trěbne inwesticije“, wona rjekny. Krajam hrozy z wulkim konjunkturnym programom mjenje dawkowych dochodow. Nimo toho wažne wobłuki kaž sport a kultura dospołnje ze spěchowanskeho programa wupadnu. „W tutych dypkach trjebamy jasne polěpšenja.“

Zwjazkowy financny minister Lars Klingbeil (SPD) chce sta miliardy eurow wobsahowacy wurjadny fonds za inwesticije, infrastrukturu a škit klimy hišće tutón měsac zeskutkownić. Z dawkami financowane wurjadne zamóženje 24. junija w kabineće wobzamknu.