Wjace hač 300 000 wopytowarjow bě minjene dny na tradicionalny Dixieland-festiwal do Drježdźan přichwatało. Prěni raz běchu lětsa tradicionalny wjeršk swjedźenja – njedźelnišu paradu – wotprajili. Zarjadowarjo wopodstatnichu swój rozsud z njewočakowano wysokimi wěstotnymi žadanjemi města Drježdźany. Přiwšěm pak wabješe dohromady 50 zarjadowanjow do lóštneje zabawy, dwanaće z nich bě bjezpłatnych. Dwójce podachu so tež parniki na muzikaliski wulět po Łobju, tak mjenowany „River Boat Shuffle“. Pjatk wječor so na tym tež čěska dujerska kapała Rakovnik (na foće) wobdźěli. Foto: Jürgen Männel

Berlin (dpa/SN). Zwjazkowe knježerstwo so hladajo na škit klimy dosć njeprócuje, měni rada ekspertow za prašenja nastupajo klimu. Wuskutki programa za škit klimy, kotryž bě wobswětowy minister Carsten Schneider (SPD) wóndano předstajił, móhli wo tójšto słabše być, hač sej to zwjazkowe knježerstwo same wuliča, eksperća w swojim najnowšim posudku pisaja. Samo hdy by knježerstwo cyły program zwoprawdźiło, njespjelni žadyn z klimowych cilow za lěto 2040. Tole ­měni rada ekspertow, kotraž knježerstwo jako njewotwisny gremij poradźuje. Zo 2000 nowych wětrnikow, kotrež Schneider w planje připowědźa, woprawdźe 6,5 milionow tonow wuhlikoweho dioksyda zalutuje, na tym mjez druhim tež ekonom a čłon rady Oliver Bettzüge dwěluje. Wobličenja zwjazkoweho zarjada za wobswět nastupajo mnóstwo škódnych płunow, kotrež Němska hač do lěta 2030 produkuje, zastopnjuja eksperća jako přeoptimistiske. Tole potrjechi wosebje emisije w energijowym a twarskim sektoru. Minister Schneider chce kritiku ­rady ekspertow nětko intensiwnje pruwować.

Něhdyša zwjazkowa kanclerka Angela Merkel (CDU) by so komisije ekspertow woprašała, by-li wona rozsudźić dyrbjała, što ma so z wjelrybu Timmyjom stać, ­kotruž běchu z Baltiskeho morja wuchowali a kiž je nětko před Danskej kupu ­zahinyła. Póndźelu běchu so jeje w podcasće „0630“ sćelaka WDR za tym prašeli. „Sym so woprawdźe prašała, što bych ja nětko činiła“, wona přizna.

Wjace hač 100 000 eurow je 55lětny hotelej w Berlinje dołžny, w kotrymž je cyłe lěto bydlił, bjez toho zo by hdy zličbowanku za to zapłaćił. Muž bě pječa planował, přebytk njezapłaćić. Jemu nětko wobšudźenje we wulkim stilu wumje­tuja. Statne rěčnistwo wo tym informuje, zo je muž stwu w měšćanskim dźělu Treptow-Köpenick w aprylu 2023 wot­najał. Wón bě twjerdźił, zo druzy zlič­bowanku zapłaća.

Vatikan (B/SN). Bamž Franciskus je dźesać studijnych skupin swětoweje synody zawjedł. Skupina za wuzwolenje biskopow je kónčnu rozprawu předpołožiła. Wona sej přeje, zo by kóžda cyrkej ze zapřijećom gremijow diecezy swoje potrjeby pruwowała. „Kóždy čłon gremija“ měł w začinjenym lisće biskopej mjena měšnikow napisać, kotřiž bychu so za zastojnstwo biskopa hodźeli. Po tym zo je komisija wuradźowała, rozsudźi nuncius.

Bamžowske změny

Vatikan (B/SN). Bamž Leo XIV. bydli zaso w bamžowskim bydlenju. Wón přebywa prawidłownje w Castelu Gandolfo, wužiwa aktiwnje internet, na ruce nosy smartwatch. Po časopisu Vogue słuša bamž k 55 najlěpje zdrasćenym wosobinam lěta 2025. W politice je za diplomatiju a njeda so wobwliwować. Někotre rozsudy předchadnika drje je Leo XIV. změnił, ale w cyłku je wón tradiciji bamžow swěrny.

Cyrkej w Iraku sylnić