Našim čitarjam
Jutřišeho Božeho spěća dla dóstanjeće přichodne wudaće SN pjatk, 15. meje.
Redakcija SN
To a tamne (13.05.26)
Mäc Geiz – wobchod za tunje produkty – je tutón tydźeń próstwu wo insolwencu zapodał. Předań w dohromady 180 filialach pak ma tuchwilu pokročować, zdźěla zamołwići na internetnej stronje předewzaća, kotrež ma w Saksko-Anhaltskim Landsbergu swoje sydło a w kotrymž něhdźe 1 200 ludźi dźěła. Jako přičinu za rozsud mjenuja zasadnu zdźeržliwosć kupcow w časach hospodarskeje njewěstosće.
Howjada z pastwy pokradnyli su paduši w Braniborskej – a to hižo trěći raz w běhu minjenych tydźenjow. Njeskutk sta so tónraz we wjesce Grano we wokrjesu Sprjewja-Nysa. Potrjecheny plahowar zhubi 31 howjadow. W zdźělence powěsćernje dpa zwurazni prezident Krajneho burskeho zwjazka Henrik Wendorff, zo ma za prawdźepodobne, zo skućićeljo zwěrjata do wukraja wjezu a je tam zarězaja.
Rěče mjeńšinow njewobmjezować
Wyše dawki za wysoke zasłužby
Berlin (dpa/SN). Zwjazkowy financny minister Lars Klingbeil (SPD) je na zwjazkowym kongresu DGB w Berlinje připowědźił, zo chce so za wyše dawki za wysoke zasłužby zasadźować. „Towaršnosć, w kotrejž su rozdźěle dźeń a wjetše, hižo produktiwna njeje“, wón wuzběhny. Dokelž tež kóšty wšědneho žiwjenja stupaja, „trjebamy financne wolóženje za ludźi, kotřiž 2 000 do 4 000 eurow wob měsac zasłužeja“, wón podšmórny.
AfD w Zehdenicku dobyła
Zehdenick (dpa/SN). Kandidat AfD René Stadtkewitz je njedźelu wólby wo zastojnstwo měšćanosty braniborskeho města Zehdenick (wokrjes Hornja Habola) z 58 procentami dobył. Wón je z tym prěni hłownohamtski wjesnjanosta/měšćanosta w Braniborskej. Wustawoškit je braniborsku AfD jako „wěsće prawicarsku“ zastopnjował.
Pokročuje z přetwarom železnicy
„Ukraina je strategiski partner Němskeje“, wuzběhny zwjazkowy ...
Fahimi znowana čole DGB
Wjace lěkoww EU produkować
Premier Starmer w krizy
London (dpa/SN). Po katastrofalnych wuslědkach swojeje Labour-strony w regionalnych a komunalnych wólbach minjeny tydźeń we Wulkej Britaniskej steji tamniši premierminister Keir Starmer pod dźeń a wjetšim ćišćom. Nutřkowna ministerka Shabana Mahmood a wonkowna ministerka Yvette Cooper stej jemu radźiłoj, zo parlamentej časowy plan hač k złoženju swojeho zastojnstwa předpołoži. Wot něhdźe 400 zapósłancow Labour je Starmerej wjace hač 70 w běhu wčerawšeho dnja podpěru wupowědźiło. Wjacori parlamentariscy asistenća ministrow knježerstwa připowědźichu, zo wróćo stupja. Starmer sam je žadanja złožić zastojnstwo wospjet wotpokazał.
Wjace hač 1 400 mandatow je Labour w komunalnych gremijach zhubiła. Tójšto z nich je sej prawicarsko-populistiska strona Reform UK zdobyła. We Walesu, hdźež bě Labour lětdźesatki dołho najsylniša strona, je mjeztym jenož hišće na třećim městnje, za stronomaj Plaid Cymru a Reform UK, kotraž zamó w Šotiskej ličbu wolerjow podwojić.
Škitnu murju spotorhali
Rumunscy socialdemokraća z prawicarskej stronu knježerstwo wotsadźili
Bukarest (dpa/SN). Němske medije su podawkam minjeneho tydźenja w Rumunskej jenož mało kedźbnosće wěnowali. Prawicarsko-ekstremistiska strona AUR je w parlamenće zhromadnje ze stronu socialdemokratow PSD wothłosowanje wo wuprajenju njedowěry nastorčiła. Z wulkej wjetšinu su zapósłancy tydźenja wutoru za wotsadźenje knježerstwa pod nawodom Europskej uniji přichileneho ministerskeho prezidenta Ilie Bolojana hłosowali. Podobnje kaž w Němskej běchu so rumunscy demokraća stajnje za škitnu murju přećiwo prawo-nacionalnej stronje AUR wuprajili. Tule murju je PSD nětko spotorhała.
