Washington (dpa/SN). Kandidatka za prezidentku USA Kamala Harris nochce w padźe wólbneho dobyća politiku swojeho předchadnika prosće dale wjesć. „Praju cyle jasnje, zo njebudźe moje prezidentstwo žane pokročowanje prezidentstwa Joewa Bidena“, rjekny demokratka w telewizijnej rozmołwje z konserwatiwnym sćelakom Fox News. Wona chcyła swoje žiwjenske nazhonjenja, swoje powołanske znajomosće a „čerstwe a nowe ideje“ přinošować. Nimo toho reprezentuje wona nowu generaciju.

Amtěrowacej wiceprezidentce dawaja we wólbnym boju tež sobuwinu za komdźenjach aktualneho knježerstwa Bidena wot lěta 2021. Bě to prěni interview Harris z konserwatiwnymi medijemi.

Moskwa (dpa/SN). Ruske knježerstwo ma tak mjenowany plan dobyća ukrainskeho prezidenta Wolodymyra Zelenskeho za diktat USA. Za tym njetči ničo druheho hač ameriski wotpohlad, wójnu dale wjesć a „hač k poslednjemu Ukrainjanej přećiwo nam wojować“, zdźěli rěčnik Krjemla Dmitrij Pjeskow. Po swójskich wuprajenjach pak njeje wón wustup Zelenskeho w ukrainskim parlamenće ani widźał, ruske medije rozprawjeja.

Pjeskow rjekny, zo je kónc wójny hakle móžny, hdyž Ukraina, kaž wón formulowaše, „bjezwuhladnosć swojej politiki“ skónčnje dowidźi.

Zelenskyj bě w swojim dotal tajnym planje wjacore dypki naličił, kotrež maja Ukrainje dobyće zaručić. Tak žada sej spěšne čłonstwo kraja w NATO, dalše brónje ze zapada, kiž móhli so přećiwo objektam w Ruskej zasadźić, a masiwne brónjenje Ukrainy, štož měło Rusku wottrašić. Nic naposledk poskićuje zapadnym zwjazkarjam zemske pokłady Ukrainy, kotrež su „wjacore biliony dolarow“ hódne, kaž wón rjekny.

Shellowa studija pokazuje starosće a trend do prawicarskeho směra

Berlin (dpa/SN). Młodźi ludźo njejsu najebać wulke starosće dowěru do stata zhubili. To je jadrowe poselstwo mjeztym 19. tak mjenowaneje Shelloweje młodźinskeje studije, kiž su wutoru w Berlinje předstajili. Na reprezentatiwnym naprašowanju w nadawku energijoweho předewzaća Shell je so spočatk lěta 2 500 młodych ludźi mjez dwanaće a 25 lětami wobdźěliło.

Prěni króć je 50 procentow wšěch młodostnych rjekło, zo zajimuje so za politiku. To je rekordny wuslědk přirunujo z naprašowanjom 2019, jako přihłosowaše 41 procentow tutomu prašenju. Prěni raz su tež hólcy a holcy w samsnej měrje zajimowani, rozłoži nawoda přepytowanja Mathias Albert Bielefeldskeje uniwersity. Do toho běchu młodźi mužojo stajnje bóle zajimowani.

Zo njejsmy jenož mjeńšina, ale lud, pytnješ na kóždej hłownej zhromadźiznje Domowiny: Serbja a Serbowki nic jenož z cyłeje Łužicy prezentuja serbsku mnohotnosć. Zdźěla maja při tym wšelake regionalne narodne drasty woblěkane. Lěto župow 2021/2022 z wulětom župnych předsydstwow do Błótow je nam wuwědomił, zo sedźimy w samsnym čołmiku: Bukečenjo, Chróšćenjo, Slepjenjo, Hochoženjo atd. W lěće 2020 je zwjazkowy sejm serbski lud do spěchowanja w ramiku změny strukturow zapřijał. Štož smy z toho činili, je w Braniborskej a Sakskej jara rozdźělne. Iniciator a šef wuspěšneho projekta za wožiwjenje delnjoserbšćiny „Zorja“, Maksimilian Hasacki, je swoje dźěłowe městno sobu přinjesł. Wšako do toho zwonka Serbow dźěłaše. W Hornjej Łužicy wuklukuja struktury rewitalizacije personelne resursy, kotrež potom druhim serbskim institucijam pobrachuja. Postrow na ZARI na wědomostnej konferency (hlej powěsć na 1. str.) w Palma de Mallorca! Marcel Brauman