Strasbourg (dpa/SN). Madźarski ministerski prezident Viktor Orbán žada sej jako reakciju na dale trajacu ilegalnu migraciju do Europskeje unije prawidłowne wjerškowe zetkanja statnych a knježerstwowych šefow Schengenskich krajow. Je to migraciska kriza, kotruž je EU posledni raz w lěće 2015 tak dožiwiła, rjekny Orbán dźensa w narěči před Europskim parlamentom. Wobsteji strach, zo Schengenski rum, kiž bě jako pasmo bjez pomjeznych kontrolow mysleny, rozpadnje. Na přede­wzaću wobdźěla so tuchwilu 25 z cyłkownje 27 krajow. Konkretnje Orbán namjetuje, azylowe jednanja přichodnje zwonka EU přewjesć, zo njebychu migranća bjez přizwolenja do EU přišli. „Móžemy jenož tych do EU pušćić, kotrymž smy to do toho dowolili.“ Prezidentka komisije EU Ursula von der Leyen skedźbni na wobstejace rjadowanja EU, kotrež měli so přesadźić. Orbánej wumjetowaše, zo ilegalnu migraciju podpěruje. Tak kraj pašowarjow dočasnje z jastwa pušći, Rusam zapućowanje do EU dowola a chinskej policiji zmóžnja, w Madźarskej dźěłać.

Zwjazkowe knježerstwo reaguje na słabe wuwiće hospodarstwa

Berlin (dpa/SN). Zwjazkowy minister za hospodarstwo Robert Habeck (Zeleni) chcyše dźensa popołdnju w Berlinje nowy posudk zwjazkoweho knježerstwa nastupajo wuhlady na wuwiće hospodarstwa předstajić. Powšitkownje wočakowachu, zo knježerstwo nowu prognozu zniži. Wšako hospodarski wukon Němskeje dale woteběra.

Poprawom bě Habeck za lěto 2024 snadny rozrost nutřkokrajneho bruttoprodukta, 0,3 procenty, wočakował. Nětko liča z minusom: 0,2 procentaj. Klětu liči Habeck zaso z rozrostom nutřko­krajneho bruttoprodukta – sumy wšěch na­dźěłanych hódnotow – něhdźe 1,1 procenta.

Ličby su zakład wočakowaneho trochowanja dawkowych dochodow. Snadniše dawkowe dochody hač wobličene kaž tež wyše wudawki za socialne za­wěsćenje, móhli etatowe jednanja amploweje koalicije SPD, Zelenych a FDP poćežować. Zdobom pak woznamjenjeja špatniše wuhlady na hospodarski rozrost, zo smě zwjazkowe knježerstwo na zakładźe mechanizma borzdźidła zadołženja wjace kreditow brać.

Pragmatiske dźěło město ideologiskich murjow! Zjawny list něhdyšich wodźacych čłonow CDU, krajnych radow, zapósłancow zwjazkoweho a krajneho sejma a samo bywšeho generalneho sekretara strony zasłuži sej respekt. „Trjebamy nowu ­politisku kulturu mjezsobneho wobchadźenja“, awtorojo lista pisaja. Woni wědźa, zo njemóža 30 procentow sakskich wolerjow AfD prosće ignorować, chcedźa-li centralne prašeja rozrisać. Jeli so křesćanskodemokratiska strona dale jenož na lěwicarske strony orientuje, móhła wona swoju identitu a tak tež nahladnosć mjez wolerjemi přisadźić. Njezabudźmy na wolerjow. Woni nowe wuwiće do­kładnje wobkedźbuja. Dyrbjało-li so wopokazać, zo AfD jenož horcy powětr produkuje, spěšnje zaso na nahladnosći zhubi. Wolerjo njeznaja žanu hnadu. Hla­dajmy na strony Berlinskeje amploweje koalicije SPD, Zelenych a FDP, kotrež su w Sakskej jasnu kwitowanku za swoju politiku dóstali. Marko Wjeńka

Beirut (dpa/SN). Na juhu Libanona su njeznaći skupinu italskich žurnalistow w měsće Sidon nadběhowali. To italske medije rozprawjeja. Roznjemdrjena syła ludźi bě so jězdźidłu zjawno-prawni­skeho sćelaka Rai 3 bližiła a žurnalistow wohrozyła. Libanonski šofer skupiny ­poćerpje na to infarkt wutroby. Najebać ­reanimacije wón swoje žiwjenje přisadźi. Kónčinu kontroluje milica šiitow His­bollah. Žurnalisća běchu w měsće rozprawu zhotowili a za to z ludźimi rěčeli. Pozdźišo bě wobrónjeny muž spytał, jim kameru wutorhnyć. Na to so skupina muži žurnalistow wohrožowaše. Při diskusiji z wobrónjenymi poćerpi šofer infarkt.

Konflikt mjez Hisbollah a Israelom so po morjenju dalšeju centralneju nawodow milicy dale přiwótřa. Tež za žurnalistow je rozprawnistwo w konfliktnych kónčinach dale a strašniše. Ludźo w po­trjechenych kónčinach so boja, zo móhli jim rozprawy wukrajnych žurnalistow na škodu być, jeli israelska tajna słužba material do rukow dóstanje. Njepřestajne ataki israelskich lětadłow žiwjenje žurnalistow přidatnje wohrožuja.