39lětneho podhladneho je awstriska policija wčera w zwisku ze zajědojćenymi škleńčkami jědźe za ćěšenki firmy Hipp w awstriskim zwjazkowym kraju Salzburg zajała. Tuchwilu jeho hišće pře­słyšuja. W běhu dnja chcedźa muža do jastwa Eisenstadt na wuchodźe Awstriskeje dowjezć. Za dalšej zajědojćenej škleńčku policija nadal slědźi. Hač je skućićel w padźe wudrěwanja sam jednał abo hač měješe pomocnikow, tuchwilu jasne njeje.

Za něhdźe 56 miliardow dolarow chce předewzaće Gamestop, kiž je so na widejowe hry specializowało, eBay přewzać. Gamestop hižo něhdźe pjeć procentow akcijow eBay wobsedźi. Šef předewzaća Ryan Cohen zdźěli, zo chce wón eBay – najwjetše online-wikowanišćo swěta za trjebane twory – ke chutnišemu konkurentej předewzaća Amazon přetwarić.

Berlin (dpa/SN). Statny minister za kulturu Wolfram Weimer (njestronjan) njesmě wobsedźerjow knihownje „Zur schwankenden Weltkugel“ w Berlinje politiskich ekstremistow mjenować. Tole je zarjadniske sudnistwo w Berlinje w spěšnym jednanju rozsudźiło, rjekny rěčnica sudnistwa. Wuprajenje rani powšitkowne prawo wosobiny wobsedźerjow, sudnistwo swój rozsud wobkrući.

Krótki přiměr móžny

Moskwa (dpa/SN). Prezidentaj Ruskeje a USA, Wladimir Putin a Donald Trump, staj so w telefonaće wo wobmjezowanym přiměrje we wójnje w Ukrainje rozmołwjałoj. Putin je zwólniwy, brónjam za čas wopominanja Druheje swětoweje wójny mjelčeć dać, rjekny poradźowar za wonkownu politiku Krjemla, Juri Uschakow. Dale wón rjekny, zo bě rozmołwa wotewrjena a wěcowna. Ruska bě rozmołwu iniciěrowała. Trump w Běłym domje twjerdźeše, zo bě wón Putinej přiměr namjetował: „Myslu sej, zo móhł wón tomu přizwolić.“

Zaso mjenje dobytka