Gazaske pasmo wobsadźić
Gaza (dpa/SN). Israelske wójsko chce po informacijach medijow w běhu někotrych tydźenjow tři štwórćiny Gazaskeho pasma wobsadźić. Dotal wójsko 40 procentow dospołnje zawrjeneho pobrjóžneho teritorija kontroluje, Times of Israel rozprawja. Wobydlerjow Gazaskeho pasma chcedźa na štwórćinu dotalneho teritorija hromadu stłóčić, zo bychu Gazaske pasmo wot Hamas wuswobodźili, mjeztym tež Wall Street Journal piše.
Žane němske brónje do Israela
Berlin (dpa/SN). Wjacori zapósłancy SPD w zwjazkowym sejmje žadaja sej postupowanja Israela w Gazaskim pasmje dla, eksport němskich brónjow do Israela hnydom skónčić. „Němske brónje njesměli so za rozšěrjenje humanitarnych katastrofow a za łamanje prawa ludow znjewužiwać“, rjekny wonkopolitiski rěčnik frakcije SPD Adis Ahmetovic nowinarjam. Tež Ralf Stegner žada sej kónc dodawanja němskich brónjow, zo njeby so humanitarna katastrofa w Gazy podlěšiła.
Dröge za spěšne staćanstwo
We wobłuku swjatočneje gale su předwčerawšim w Zgorzelecu ...
Merz na wjeršku nordiskich krajow
Policija žada sej konsekwency
Trump: Putin dospołnje kołwrótny
Washington (dpa/SN). Hladajo na najnowše masiwne ruske lětarske nadpady na Ukrainu je prezident USA Donald Trump ruskeho prezidenta Wladimira Putina kołwrótneho mjenował. „Wón je absolutnje skołwrótnił. Wón mori njetrjebawšo tójšto ludźi, a njerěču jenož wo wojakach“, piše Trump na swojej internetnej platformje Truth Social.
Ruske wójsko je kónc tydźenja Ukrainu masiwnje z raketami a stami trutow nadběhowało. Při najćešich nalětach minjenych měsacow su wjace hač dźesać ludźi morili. Ukrainski prezident Wolodymyr Zelenskyj wumjetuje Ruskej teror a žada sej wjace ćišća na Moskwu. Ruska twjerdźi, zo nadpaduje ukrainske wojerske objekty, kiž chowaja so w ciwilnych bydlenskich kónčinach.
Trump kritizowaše w tym zwisku tež ukrainskeho prezidenta Wolodymyra Zelenskeho. Tón swojemu krajej škodźi, hdyž dale tak rěči kaž dotal. Wójna w Ukrainje njeby nihdy wudyriła, by-li Trump prezident był. „Nětko dyrbju wohenje hašeć, kiž su druzy zamiškrili.“
„Na wopačnym městnje pytali“
Dokumentaciski centrum za wopory NSU w Kamjenicy wotewrjeny
Kamjenica (dpa/SN). „Žanu kónčnu smužku“ pod mordarske njeskutki tak mjenowaneje nacionalsocialistiskeje teroroweje skupiny NSU – to bě hłowne hesło při wotewrjenju noweho dokumentaciskeho centruma. W nim chcedźa wotnětka wopory prawicarskeho terora wopominać a zdobom na pozadki njeskutkow a na zaprajenje wěstotnych mocow pokazać. Runočasnje wěnuja so nadawkam, kotrež demokratija ma, zo móhła so wobarać. Při wčerawšim zahajenju centruma su tež mjena wšitkich dźesać woporow NSU předčitali.
Při zahajenju porěčachu zdobom zawostajeni morjenych. Gamze Kubasik, kotrejež nana běchu terorisća NSU 4. apryla 2006 w Dortmundźe morili, měnješe, zo měł tajki centrum dawno załoženy być. Kamjenica je prawe městno za njón. „Kamjenica njeje někajke městno.“ NSU je so tule wjacore lěta pohibowała. „Tule namakachu skućićeljo schow. Woni su z tym tež dźěl měšćanskich stawiznow.“
Što radosć rjeńšu dała ...
Tež winowatosć sobu zakótwić
Dalše drohoćinki Pücklera namrěwcam wróćili
Rogeńc (MH/SN). Swjatočnje su minjeny štwórtk w Rogeńskim hrodźe cyłkownje 109 wuměłskich objektow zjednoćenstwu namrěwcow wjercha Pücklera wróćili. Při tym jedna so wo brónje ze 16. lětstotka, grafiki, plany z časa wjercha Pücklera kaž tež cyle wosobinske dźěćace rysowanki a fotografije z kónca 19. lětstotka. Eksponaty běchu we wobsydstwje Choćebuskeho měšćanskeho muzeja. Fachowcy běchu po wobšěrnym slědźenju zwěsćili, zo słušeja wone do w lětomaj 1945/46 wuswojenych objektow swójby Pücklera.
Zastupnica namrěwcow, hrabinka Elke Pückler rjekny: „Čujemy so jako swójba wusko z Rogeńcom zwjazani. Chcemy tomu přinošować, zo su zdźědźene objekty, kotrež běchu po wuswojenju zhubjene, zjawnosći zaso přistupne. Smy čłonojo dołheho rynka namrěwcow, kotřiž su Łužicu sobu wobwliwowali a čujemy so za swójbu dale zamołwići.“
Nawoda załožby hrabje Pücklera dr. Stefan Körner potwjerdźi, zo je město zhromadnje ze załožbu na dobrym puću, njeprawdu zašłosće wotkryć a muzealne skutkowanje za přichod zaručić. Přez wróćenje nabywaja objekty zaso swój stawizniski a emocionalny wuznam.
To a tamne (26.05.25)
Cyły ćah blokował je muž w delnjosakskim Lehrte. Pytajo na słuchatkami, kotrež běchu mjez sedłom a sćěnu ćaha padnyli, bě muž tam z ruku tčacy wostał. Na kóncu dyrbješe jeho wohnjowa wobora w dlěje trajacej akciji wuswobodźić, dokelž bě ruka zaćekła. Wobornicy sedło wottwarichu a ručnu zepěru wotrězachu. Sobujěducy dyrbjachu do druheho ćaha přelězć. „Wuchowanje“ muža traješe cyłe połdra hodźiny.
Tójšto diskusije a samo protest wuwabi akcija měšćanosty idyliskeho městačka Viechtal w Bayerskej. Zo by kedźbnosć zbudźił a turistow přiwabił, zarjadowaše wón mjezynarodne wubědźowanje w grilowanju swini. Na to bě organizacija za škit zwěrjatow Peta protest připowědźiła. Skónčnje dyrbješe policija zarjadowanje škitać. Na wubědźowanju wobdźěli so cyłkownje 16 skupin.
