Serbja swjeća – a to porjadnje. To tež němscy wobydlerjo dwurěčneje Łužicy wědźa a tuž serbske poskitki wopytaja – znajmjeńša ći, kotřiž wědźa sej wosebitosć dwurěčnosće w jich domiznje wažić. Tuž přeju Rěčnemu centrumej WITAJ, zo by prawje wjele ludźi tutu njedźelu do Serbskeho ludoweho ansambla přichwatało a sej swójbnu schadźowanku lubić dało. Někotryžkuli móhł sej myslić, zo je samozrozumliwje sej tón dźeń tam dóńć. Tomu pak tak njeje. Přetož 1. měrc je lětsa wosebje požadany termin w protyce. W Serbskim domje witaja přez cyły dźeń na jutrowne wiki, RCW wita do SLA a nic naposledk wjesela so w Němsko-Serbskim ludowym dźiwadle tohorunja popołdnju na wulku syłu přihladowarjow k serbskorěčnemu dźiwadłowemu předstajenju „Skazany Pryzlak“. Kajka to šansa serbski swět na přewšo kompaktne wašnje dožiwić – na jeničkej njedźeli. Nadźijomnje to syły ludźi serbskich, němskich a druhich runje tak widźa! Milenka Rječcyna

Tójšto ludźi přiwabili su tradicionalne powołanske wiki „Impuls“, kotrež su tydźenja w Choćebuzu přewjedli. Wjace hač 150 wustajerjow swoje poskitki na najwjetšich wikach Braniborskeje za powołanja a wukubłanje prezentowaše. Mjez wustajerjemi bě tež Choćebuski centrum Sana, kiž je na lěkowanje wutroby specializowany. Wopytowarjo mějachu składnosć, z pomocu chorobneje sotry Annegret Eder (nalěwo) raz sami operacisku ranu zašić. Wiki chcedźa informacije posrědkować a młodo-stnym pomhać, powołanske šansy w regionje zeznać. Dale a wjace młodostnych tež krótko do zakónčenja šule hišće njewě, što chcedźa wuknyć. Foto: Michael Helbig

Do chorownje zapokazali su norwegskeho krala Haralda V. na kupje Teneriffa. Tole zdźěla kralowski dwór w Oslu. Krala lěkuja tam natyknjenja a wusušenja dla. Wosobinski lěkar krala chce so po najspěšnišim puću na kanarisku kupu po­dać, zo by Haralda při wuhojenju podpěrował. Norwegski monarch bě před dnjemi swoje 89. narodniny woswjećił.

Dwanaćelětny namócny skućićel je so po brutalnym nadpadźe na 26lětneho w Berlinje-Neuköllnje pola policije přizjewił. Tole je rěčnik policije powěsćerni dpa zdźělił. Dwanaćelětny bě 26lětneho minjenu njedźelu w Berlinje po schodźe dwórnišća teptał. Muž so při tym zrani. Njepołnolětny je so předwčerawšim, wutoru, wječor na policajskej straži zastojnikam stajił. Třo dalši skućićeljo w starobje 15 a dwójce 14 lět su so po njeskutku tohorunja pola policije přizjewili.

Choćebuz (NC/JFK/SN). Kak móhli sej serbski futurizm předstajić? Z tym zaběraše so intensiwnje w Lipsku bydlaca serbska wuměłča Karoline Krawcec. Wuslědki jeje wuměłskeho rozestajenja widźiš w jeje wustajeńcy „jama: pśichod/Grube: Zukunft“, kotraž bu minjeny pjatk w Braniborskim krajnym muzeju za moderne wuměłstwo (BLMK) wotewrjena. Multimedialna instalacija wobswětluje serbske tradicije zwonka ryzy folklory. Wopytowarjo móža so po wšelakich tematiskich kapitlach hibać a při tym dožiwić, kak wuměłča na kolektiwnym pomjatku dwěluje a w čim so perspektiwy identitow, přisłušnosćow a sebjereprezentacijow jewja. Byrnjež so Krawcec na swójske serbske korjenje złožowała, so na nje njewobmjezuje. W jednotnym rumje prezentuje mnohe ze symboliku kipjace objekty, k tomu wideja, keramiku a tak mjenowanu augmented reality. W jich zhromadnym skutkowanju so zašłosć, přitomnosć a přichod runočasnje wuwiwaja a kulturne procesy wotbłyšćuja.