Lětdźesatki bě statuwa – wjetša hač ­čłowjek – na naměsće před Němsko-Serbskim ludowym dźiwadłom dźěl měšćanskeho napohlada. Nětko ma so wona do wědomja ludźi wróćić – wězo pod hinašimi wuměnjenjemi.

Budyšin (UM/SN). Za staršich wobydlerjow Budyšina słušeše pomnik komunista a dźěłaćerskeho nawody Ernsta Thälmanna do wšědneho měšćanskeho napohlada. Skulptura bě runje tak samo­zrozumliwa kaž Stara wodarnja a Bohata hasa. Generacije šulerjow 4. lětnika běchu tule do rjadow Thälmannowych pioněrow přiwzali. Skulpturu postajichu 11. septembra 1960 składnostnje wopomnjenskeho dnja za wopory fašizma. Stworił bě ju wuměłc Wieland Förster.