Prawicarske počinki na juhu Braniborskeje tema zetkanja byli

Grodk (dpa/SN). Nutřkowny minister Braniborskeje René Wilke (njestronjan) chce zhromadnje z łužiskimi gmejnami sylnišo prawicarskemu ekstremizmej zadźěwać. Za to ma wón tež dohladowanje z widejom za zmysłapołne. Zdobom je wón na zetkanju z wjesnjanostami a měšćanostami w Grodku nowe strategije přećiwo manipulaciji prawicarskich skupinow w socialnych syćach wozjewił.

Južna Braniborska je ćežišćo prawicarskeho ekstremizma w susodnym zwjazkowym kraju. Po palnym lisće měšćanostki Grodka, Christine Herntier (njestronjanka), znowa wo tym debatuja. W juliju bě Herntier zjawnje rjekła, zo počinki prawicarjow w měsće přiběraja (SN rozprawjachu).