Pytaja za pokładami
Dźeń maćeršćiny a serbšćina 2023
Dźensa je mjezynarodny dźeń maćeršćiny – nastork UNESCO za „spěchowanje rěčneje a kulturneje mnohotnosće a wjacerěčnosće“. Kajke je aktualne połoženje serbšćiny w Hornjej Łužicy?
Budyšin/Lipsk (SN/mb). Z wida rěčespytnicy dr. Jany Šołćineje, kotraž dźěła w Serbskim instituće Budyšin a w Instituće za sorabistiku uniwersity Lipsk, „zda so wuwiće serbšćiny tuchwilu pozitiwne być.“ Wona je mjez druhim ekspertka za stawizny a přitomnosć serbskeje spisowneje rěče, za dwu- a wjacerěčnosć a bilingualne sposrědkowanje rěče. Za njedawne zarjadowanje Serbskeho šulskeho towarstwa w kubłanskim srjedźišću LIPA w Smjerdźacej wo dospołnej imersiji w pěstowarnjach je so dwójce telko zajimcow přizjewiło hač su městna měli. Tohodla budźe dr. Jana Šołćina kónc nalětnika wo samsnej tematice hišće raz w Ralbičan pěstowarni přednošować. Wona widźi přiběracy zajim a potrjebu za rěčne dalekubłanje. K tomu je trend hižo w młodźinje, zo ludźo mjez sobu na dobru serbšćinu dźiwaja. Tež ličba serbowacych šulerjow a šulerkow wočiwidnje stupa.
Olympiada lětsa zaso „dospołna“
Budyšin (SN/MiP). „Olympiadu hornjo- a delnjoserbskeje rěče budźemy lětsa skónčnje zaso porjadnje přewjesć móc! Po dwěmaj lětomaj wupada běše loni mjenujcy jenož šulerjam sakskich šulow – rozdźělnych korona-postajenjow w Sakskej a Braniborskej dla – wobdźělenje móžne.“ To nam koordinatorka Serbskeho šulskeho towarstwa (SŠT), Marlis Młynkowa, na naprašowanje zdźěli.
Wot 29. hač do 31. měrca zeńdu so serbscy šulerjo 6. lětnikow braniborskich a sakskich šulow w prózdninskim lěhwje we Wodowych Hendrichecach. SŠT, nošer olympiady, chce ze zarjadowanjom hornjo- a delnjoserbsku rěč spěchować a zdobom serbskim a serbsce wuknjacym šulerjam přez pozitiwne dožiwjenja ze serbšćinu lóšt přisporjeć, ju nałožować.
Póstnicy za zbrašenych w Jednoće
Nowačkow přizjewić
Worklecy (SN). Serbska wyša šula „Michał Hórnik“ we Worklecach informuje, zo je přizjewjenje za 5. lětnik w sćěhowacych časach móžne: wutoru, 14. februara, 10–17 hodź.; wot póndźele, 27. februara, do štwórtka, 2. měrca, 7.30–14 hodź., a pjatk, 3. měrca, 7.30–10 hodź.
Trěbne je předpołožić wot wobeju staršeju podpisanu próstwu wo přiwzaće, hižo wupjelnjenej formularaj „Rückmeldung für die jetzige Schule“ a „Anmeldebestätigung für die Personensorgeberechtigten“, kubłanske poručenje w originalu, narodźenske wopismo, połlětnu informaciju wot 10.2.2023, zdźělenje k wosebitemu pedagogiskemu spěchowanju (hdyž přitrjechi), zdźělenje wo samym zastaranskim prawje (hdyž přitrjechi), dopokaz šćěpjenja na wosypicy (Masern). – Termin přizjewjenja hodźi so po potrjebje tež telefonisce pod 035796 96 831 dojednać.
Prózdninske poskitki we Łužicy
Přiwćicy/Budyšin/Wojerecy/Njeswačidło (SN/mb). Za zymske prózdniny je zaso dosć zajimawych poskitkow dźěćom a młodostnym. Čas za přizjewjenje prózdninskeho medijoweho campa w Smjerdźacej so drje hakle dźensa kónči, ale po naprašowanju pola Serbskeho šulskeho towarstwa wěmy: Je wuknihowany. To samsne płaći za „zymski campus“ staršiskeje iniciatiwy Radwor w kooperaciji z Dwórnišćom inkluzije: Wšitke pjeć poskitki su hižo ze zajimcami połnje wobsadźene. Potajkim přejemy wšěm přizjewjenym wjele wjesela! Tule na dalše poskitki pokazujemy, kotrež su dóšli.
Dyrlich ze šulerjemi w rozmołwje
K 75. róčnicy časopis barbny
Budyšin (SN). Po Rozhledźe wuchadźa wot lěta 2023 tež serbski magacin za wučerjow a kubłarjow „Serbska šula“ jako barbne wudaće. „Serbska šula“ ma nimo toho nowy layout a zbliži čitarkam a čitarjam w prěnim lětušim čisle zajimawostki a wubrane wobsahi z 75lětnych stawiznow jeničkeho serbskeho pedagogiskeho časopisa a poda wuhlady do přichoda. Prěnje čisło bě 1948 wušło.
Čitajće wo Slawiniadźe jako rěče přesahowacym projekće a kak měło z nim dale hić, a wo wobsahach fachoweje didaktiki delnjoserbšćiny na uniwersiće w Lipsku. Předstaja dr. Christianu Piniekowu, dołholětnu wjednicu Dźěłanišća za serbske kubłanske wuwiwanje Choćebuz (ABC) a jeje skutkowanje na dobro delnjoserbskeje rěče. Bilanca rěčnych kursow RCW, němskorěčna studija wo rěčnych barjerach w Euroregionje stej dalšej temje. Wjace zhoniće nastupajo „Ptači časnik“ a pleńčatko za dźěći „serbski Lingufino“.
„Serbska šula“ wuchadźa w zamołwitosći pedagogiskeho wotrjada RCW. Zwonka abonementa je časopis runje tak w Smolerjec kniharni na předań.
Studenća na projektowym dnju šulerjow wćipnych na Serbow činili
Třo zmužići serbscy mužojo – a z nimi jedyn zbratřeny kadla z Čěskeje – steja před durjemi prestižneho Mjezynarodneho gymnazija w bajkojtym sakskim městačku Geithainje. Jich nadawk je jasny. W ramiku projektoweho dnja maja šulerjam 6. lětnika minjenu póndźelu serbsku kulturu, rěč, nałožki a powšitkownu wědomosć wo Serbach zbližić. W jich hłowach so nawalne myslički mjerwjachu: Změja dźěći zajim za serbstwo a serbšćinu? Smy tola w najlěpšej měrje přihotowani, tajki wažny nadawk spjelnić? Su naše pedagogiske a didaktiske kmanosće dosahace? Njejstej wučerce překrutej? Kak so sprosćić stracha před dźěćimi? Wjele časa za přemyslowanje wšak njeje, dokelž so durje gymnazija skónčnje wotewěraja a pušćeja štyrjoch rjekow nutř…
