Wojerecy (KD/SN). Wučerjo zakładneje šule „Handrij Zejler“ we Wojerecach sposrědkuja swojim šulerjam w koncepće 2plus wobšěrnje serbsko-němsku dwurěčnosć. Tole nječinja pak jenož w rjadowniskej rumnosći. Šulerjo 2plus a němsce wuknjacy šulerjo třećeho lětnika pobychu njedawno we Wojerowskej měšćanskej bibliotece, zo bychu tam knižny rjad „Dolina při rěce“ Lubiny Hajduk-Veljkovićoweje w hornjoserbskej a němskej rěčnej wersiji zeznali. Spisowaćelka, maćernorěčna wučerka hornjoserbšćiny w dalekubłanju dorosćenych, je někotre swojich stawiznow z myškomaj Mirka a Kiki, zajacom Ferdijom, šwincom Dorianom a sowu Lunu předčitała a z dźěćimi serbski alfabet zdźěłała.

Cyłkownje dźewjeć rěčow, w kotrychž je knižna serija dotal wušła, přeprošuja k pućowanju po swěće, kaž Lubina Hajduk-Veljkovićowa rjekny. Wurězki słuchoknižneje wersije w hornjoserbšćinje, němčinje, jendźelšćinje a španišćinje su Artur, Marta a druzy šulerjo spóznali. ­Lubina Hajduk-Veljkovićowa je šulerjam tež pomhała, rozdźěle mjez serbišćinu, serbšćinu a pólšćinu namakać.

Kwalitu serbskeho kubłanja na zakładźe zhromadneho dźěła zwyšeć, je stajne wužadanje. Tež serbski kubłanski puć so hižo w pěstowarni započina – tohodla přeprošujetej Domowina a Serbske šulske towarstwo (SŠT) 13. winowca na fachowu konferencu pod hesłom „Dyrbimy rěčeć!“ do kubłanišća swjateho Bena w Smochćicach. Konferenca je předewšěm na nošerstwa přesahowacu kooperaciju wusměrjena.

Budyšin (SN/at). Domowina a Serbske šulske towarstwo chcetej z konferencu staršich, kubłarki a nošerjow pěstowarnjow docpěć. W srjedźišću steja metoda imersije, wšědneho dospołneho zanu­rjenja do našeje maćeršćiny, runje tak kaž nazhonjenja danskeje mjeńšiny w Schleswigsko-Holsteinskej z daledawanjom swojeje rěče a diskusijne koła wo praktiskich prašenjach.

Studentki towarstwa „Bjarnat Krawc Drježdźany“ su k startej do noweho zymskeho semestra měšćansku rallye organizowali. K tomu běchu předwčerawšim wosebje studowacych prěnjeho semestra, ale tež wšitkich dalšich zajimcow přeprosyli, zo bychu předewšěm kontakty nawjazali. 27 ludźi poda so po pjeć stacijach přez stare město k Łobju. Při tym mějachu skupiny rozdźělne nadawki spjelnić, kotrež tematizowachu Drježdźanske studentske žiwjenje a wuznamne serbske wosobiny kaž Bjarnata Krawca a Alojsa Andrickeho. Dobyćerskemu mustwu kiwaše jako myto ­wačok z logom towarstwa. Měšćansku rallye su prěni raz přewjedli. Dobreho ­wothłosa dla chcedźa klětu podobny poskitk organizować. Foto: Gloria Žurec

Wostrowc (SN/JBo). Na štwórtej sakskej Slawiniadźe wobdźěli so 38 wuknjacych minjeny pjatk a sobotu w Mjezynarodnym zetkawanskim centrumje Marijinym dole pola Wostrowca. Po oficialnym zahajenju, na kotrymž mjez druhim serbski rěčespytnik dr. Fabian Kaulfürst přitomnych na žiwe wašnje tež w serbskej rěči witaše, poskićachu młodym za słowjanske rěče so horjacym pospytowanske kursy w pólšćinje, rušćinje, čěšćinje, ukrainšćinje a serbšćinje. Alena Hiccyna, wučerka Serbskeho gymnazija Budyšin za rušćinu a serbšćinu, kaž tež wědomostna sobudźěłaćerka Serbskeho instituta dr. Jana Šołćina, stej z mnohostronskimi prezentacijemi a interaktiwnymi dźěłarničkami wosebitosće Serbow předstajiłoj. Předewšěm, tak pozadkowa ideja Slawiniady, maja so młodostni tu z pomocu w šuli nawuknjeneje słowjanskeje rěče, tamnu, jim hišće cuzu słowjansku rěč wotkrywać a spytać, někotre rěčne konteksty rozumić. Sobotu wobdźěłachu šulerjo a šulerki w měšanych mustwach rěčne nadawki na dwěmaj stacijomaj. Na zakónčacym zarjadowanju najlěpšich mytowachu.