Na 18. hrajnym dnju, kotryž bě zdobom posledni w sakskej klasy stafla wuchod, je prěnje wolejbulowe mustwo muži Viktorije Worklecy w Drježdźanach přećiwo VC Drježdźanam 0:3 (18:25, 18:25, 17:25) přěhrało. Najlěpši hrajer hosći bě kapitan Jakub Bobka.

Tež druhe wolejbulowe mustwo muži Viktorije Worklecy je swoju poslednju domjacu hru sezony 2025/2026 1:3 (25:27, 18:25, 25:23, 16:25) přećiwo rezerwje Módro-běłych Wojerecy přěhrało. Jako najlěpšeho hrajerja domjaceho cyłka wuzwolichu Floriana Bulanka.

Worklečanki přěhrachu we wobwodnej lize w Běłej Wodźe přećiwo TSG Hamorej/Běłej Wodźe 0:3 (8:25, 17:25. 15:25). Tam pokaza kapitanka hosći Diana Hajnec najlěpši wukon.

Hrubjelčan Kito Budar, kotryž startuje za Uniwersitne sportowe towarstwo Techniskeje uniwersity Drježdźany w mocosporće, je sej sobotu w Budyšinje na krajnym mišterstwje titul sakskeho mištra w křižnym zběhanju wudobył. Zdobom polěpši 17lětny šuler Serbskeho gymnazija Budyšin z 250,50 kg sakski rekord. Po wubědźowanju rjekny Budar: ,,Ja so jara wjeselu, wosebje tež dokelž běše to moje prěnje wubědźowanje jako jednotliwc, a to z tajkim wuspěchom ...‘‘