Zhromadnje z profijemi rejować
Z profijemi rejować je přeće, kotrež bychu sej mnohe dźěći a młodostni rady spjelnili. Na Worklečanskej zakładnej šuli „Michał Hórnik“ to jutře, štwórtk, někotři šulerjo móža.
Worklecy (SN/MiR). Za čas pandemije njebě móžno w rumnosćach poskićeć zarjadowanja, na kotrychž rejwarjo a rejwarki swoje zamóžnosće pokazuja. Drježdźanska choreografka Helena Fernandino – wona je wjacore lěta w Zhorjelcu skutkowała – zrodźi tuž ideju, rejowanje zjawnje předstajeć. Jeje projekt, w kotrymž sej pjeć rejwarjow łužiske hrajkanišća mjez druhim we Wostrowcu (Ostritz), Mužakowje a na kulturnej kupje Einsiedel zdobywa, mjenuje so PLAY.GROUND. Jedna tajka stacija, hdźež rejuja, budu jutře Worklecy. „Andreas Ošika, kotrehož dźěći na našej šuli wuknu, bě wo projekće zahorjeny a je mje narěčał, hač njebychmy sej profijow na polu reje do našeje šule přeprosyć chcyli“, wuswětla nawodnica Worklečanskeho zakładnošulskeho stejnišća Sabina Hejdušcyna.
„Ofensiwa prózdninskich praktikumow“ zahajena
Drježdźany (SN). Za lěćne prózdniny je sakske kultusowe ministerstwo nětko „ofensiwu prózdninskich praktikumow“ zahajiło. Šulerki a šulerjo dalewjeducych kubłanišćow, kotřiž njemóžachu so koronapandemije dla na regularnym zawodowym praktikumje wobdźělić, móža so nětko w online-bursy praktikumowych městnow wo tajke požadać. Wo tym je ministerstwo spočatk tydźenja w Drježdźanach informowało. Za to zarjadowana platforma ma pytanje za zbywacy čas hač do lěćnych prózdnin wolóžić.
Šulerki a šulerjo maja za powołansku orientaciju wot 7. do 10. lětnika znajmjeńša jedyn winowatostny praktikum wukonjeć. Koronapandemije dla njeje to mnohim wuknjacym dotal móžno było. „Ofensiwu prózdninskich praktikumow“ financuja we wobłuku akciskeho programa „Nachwatać po koronje za dźěći a młodostnych“.
Malešanske dźěćace dnjowe přebywanišćo „K wódnemu mužej“, ...
Serbšćinarjo w zelenym so zetkali
Online-kurs serbšćiny za Drježdźanske dźěći je wuspěšnje zakótwjeny. Na nim wobdźěla so tuchwilu 27 šulerjow 1. do 8. lětnika. Woni wuknu w třoch skupinach. Zańdźenu sobotu su so wučerjo, kursanća a jich starši w Drježdźanskej Wulkej zahrodźe prěni króć wosobinsce zetkali.
Drježdźany (GN/SN). Hladajo na popušćacu ličbu koronanatyknjenjow wjeselachu so wšitcy, mjezwoči z kompjutera raz wosobinsce widźeć. Wosebje rjenje bě, zo zeznachu šulerjo skónčnje swojeju „wučerjow“ Tadeja Špitanka a Mateja Wjeńku. Studentomaj pedagogiki w Lipsku bě wutrobna naležnosć, nawjazać zwisk z dźěćimi a dać nastorki za dalše kursowe hodźiny hač do kónca šulskeho lěta.
SMK młodemu serbskemu wučerjej dowěrja
Beno Hojer skutkuje jako referent w sakskim kultusowym ministerstwje z nadawkom pedagogow wabić
Beno Hojer je mnohim Serbam znaty jako angažowany gmejnski radźićel w Chrósćicach a jako aktiwny wohnjowy wobornik. Předewšěm pak znaja jeho ludźo jako kreatiwneho wučerja na Serbskej wyšej šuli „Michał Hórnik“ Worklecy. Wot lońšeho wón na mjenowanym kubłanišću njeskutkuje. Milenka Rječcyna je so z referentom w Sakskim statnym ministerstwje za kultus (SMK) rozmołwjała.
Wot kotreho časa njejsće hižo wučer na šuli?
B. Hojer: Sym dale wučer, tež hdyž nětko hinaše zastojnstwo wukonjam. Městno w SMK bě loni wupisane, a sym so na nje požadał. Njejsym pak z tym ličił, zo změju woprawdźitu šansu na při-stajenje. Wot 1. septembra 2020 mjeztym w Drježdźanach skutkuju.
Što su Waše direktne nadawki?
B. Hojer: Mam wosebje wabić za wučerski dorost, staram so dale wo šulske asistencne systemy a sym zamołwity za wuwiwanje personalneho koncepta za wučerjow. Dale sym sakskemu knježerstwu partner za funkcionalny analfabetizm a alfabetizowanje dorosćenych.
Pytaja ludźi za zabawu, sport a posrědkowanje wědy
Radwor/Budyšin (SN/MiR). Njeklaca tuchwilu jeničce na tym, zo pobrachuja wučerjo. Mjeztym pytaja šule tež ludźi, kotřiž chcyli wuknjacym we wobłuku cyłodnjowskich poskitkow wědu posrědkować a jich zabawjeć. Štóž ma lóšt, ideje a zajim, móže so mjez druhim na Radworskej Serbskej zakładnej šuli „Dr. Marja Grólmusec“ přizjewić. Kaž šulska nawodnica Angela Rynčowa zdźěli, wjesela so na ludźi, kiž rady sportuja a kotřiž su kreatiwni. „Rady bychmy našim šulerjam w nowym šulskim lěće wjacore sportowe družiny zwonka šulskeho sporta poskićeli. Nimo kopańcy je wšitko móžne“, wona rozłoži. Tež měrniše wašnje pohiba, kaž joga, móhło poskitk šulerjam po wučbje być, zo wotpinaja a so přiwšěm ćělnje napinaja. Dalša tajka zaběra je šach, kotryž słuša tohorunja k sportowym družinam. Witani su dale dorosćeni, kotřiž bychu z dźěćimi rady rysowali/molowali, abo w nich na hinaše wašnje kreatiwny duch wuwabili.
Skruća zwonkašulsku městnosć
Wjelcej/Podstupim (SN). Archeotechniski centrum (ATZ) we Wjelcej je zwonkašulska městnosć wuknjenja, hdźež rozestajeja so z kulturnymi stawiznami kaž tež z přirodu a naslědnosću regionalnych žiwidłow. Rólu hraja tohorunja formaty kołowokoło drjewoweho rjemjeslnistwa a technologiske dalewuwiće w ratarstwje. Tak chcedźa dorostowacym dohlad do dźěłoweho swěta w zašłosći, přitomnosći a přichodźe sposrědkować.
W zwisku ze strukturnej změnu je regionalna iniciatiwa namjetowała, zarjadnišćo blisko brunicoweje jamy Wjelcej-juh skrućić. Dźensa dósta ATZ spěchowanje 1,27 milionow eurow ze srědkow zakonja wo skrućenju strukturow, kaž statna kenclija w Podstupimje informuje.
Budyskej pěstowarni „Jan Radyserb-Wjela“ kotraž je w nošerstwje ...
Wulki hudźbny wuspěch žnjał
Fritz Vogel z Wojerec je na lětušim 58. wurisanju „Młodźina hudźi“ na zwjazkowej runinje z 25 dypkami najwjac móžnych dypkow docpěł. 18lětnemu pozawnistej je to wulki wuspěch. Přiwšěm wobhladuje bywši chowanc Wojerowskeho Lessingoweho gymnazija kaž tež měšćanskeje hudźbneje šule dobyćerski titul „jenož“ jako dalši měznik. Młodemu dobyćerjej a bórzomnemu powołanskemu hudźbnikej je puć cil! Silke Richter je so z Wojerowčanom wo dobyću a wo wuhladach do přichoda rozmołwjała.
Sće jedyn z mało wobdźělnikow z regiona, kotřiž su skok na zwjazkowe hudźbne wubědźowanje docpěli. Kak je scyła k tomu dóšło?
F. Vogel: Kaž wšitcy tamni startowach tež ja najprjedy na regionalnym wubědźowanju. Tam su moje wukony za dobre měli a mje dale na krajne wurisanje delegowali. Tež tam wot wukonow wotwisuje, štó dale na cyłoněmske wurisanje přińdźe. Dóstach dobre hódnoćenja, a tuž je so mi poradźiło so za zwjazkowe wubědźowanje skwalifikować. Nad 25 dypkami, štož je najwjac móžnych dypkow a štož wotpowěduje prěnjemu městnu, sym so jara zwjeselił.
Digitalizacija tež na powšitkownje kubłacych šulach dale přiběra
Z wobzamknjenym digitalnym paktom planuje zwjazkowe knježerstwo digitalizacije na powšitkownje kubłacych šulach spěchować a pohonjeć. Tež na Wyšej šuli „Korla Awgust Kocor“ Kulow so digitalizacija pospěša. Po planowanju a stajenju próstwy wo srědki za wyšu šulu běchu prěnje widźomne naprawy loni w lěćnych prózdninach widźomne. Po cyłym šulskim twarjenju su na wjacorych etažach dźěry do sćěnow točili, zo bychu na to we wšitkich rumnosćach z pomocu kablowych překopow internetny přizamk zmóžnili. Tež serwerowa technika z klimatizaciju bu kompletnje wobnowjena. Mnohe kable z cyłeho šulskeho twarjenja su w pincy hromadu wjedli.
