Budyšin (SN/MiR). Bórze podadźa so sakscy­ šulerjo do lětnich prózdnin. Šule pak hižo nowe šulske lěto přihotuja. Tak wuńdźe njedawno we wučbnicowym rjedźe­ „Wuknu serbsce/Zwučuju serbsce“ dźěłowy zešiwk za 8. lětnik za předmjet serbšćina jako cuza rěč. Sobudźěłaćerjo Rěčneho centruma WITAJ su wuwučowanske wobsahi žadanjam wučbneho plana přiměrili. Wobkedźbowali su předewšěm lekcije, předstajace aktualne podaw­ki, wosobiny abo načasne temy. Dźěłowy zešiwk hodźi so jako wučbnicu wu­do­społnjacy wužiwać. Material, płaći 8,90 eurow a je w Smolerjec kniharni kaž tež w online-wobchodźe Ludoweho nakładnistwa Domowina na předań.

Serbja w Choćebuzu so wjesela, zo je serbske mjeno tamnišeho centruma wyšeho kubłanja (OSZ) zaso dospołne. Na woběmaj bokomaj su tež smužki zaso widźeć. Lěta dołho běštej němske a serbske pomjenowani w dezolatnym stawje. Hdyž běchu pismiki­ wuporjedźeli, na te serbske zdźěla zabychu. Posledni raz bě Nowy Casnik njedostatk loni w silwesterskim wudaću kritizował. Rjenje wšak by było, bychu-li ­za swoje powołanske wukubłanje we woknach tež serbskorěčnje wabili. Na OSZ dźě móža přichodne kubłarki/přichodni kubłarjo tohorunja serbšćinu wuknyć, zo bychu pozdźišo we Witaj-pěstowarnjach dźěłali. Foto: Christiana Piniekowa

Z profijemi rejować je přeće, kotrež bychu­ sej mnohe dźěći a młodostni rady­ spjelnili. Na Worklečanskej zakładnej šuli „Michał Hórnik“ to jutře, štwórtk, někotři šulerjo móža.

Worklecy (SN/MiR). Za čas pandemije njebě móžno w rumnosćach poskićeć zarja­dowanja, na kotrychž rejwarjo a rejwarki swoje zamóžnosće pokazuja. Drježdźanska choreografka Helena Fernandino – wona je wjacore lěta w Zho­rjelcu skutkowała – zrodźi tuž ideju, re­jowanje zjawnje předstajeć. Jeje projekt, w kotrymž sej pjeć rejwarjow łužiske hrajkanišća mjez druhim we Wostrowcu (Ostritz), Mužakowje a na kulturnej kupje Einsiedel zdobywa, mjenuje so PLAY.GROUND. Jedna tajka stacija, hdźež rejuja, budu jutře Worklecy. „Andreas Ošika, kotrehož dźěći na našej šuli wu­knu, bě wo projekće zahorjeny a je mje narěčał, hač njebychmy sej pro­fijow na po­lu reje do našeje šule pře­prosyć chcyli“, wuswětla nawodnica Worklečanskeho zakładnošulskeho stejnišća Sabina Hejdušcyna.

Drježdźany (SN). Za lěćne prózdniny je sakske kultusowe ministerstwo nětko „ofensiwu prózdninskich praktikumow“ zahajiło. Šulerki a šulerjo dalewjeducych kubłanišćow, kotřiž njemóžachu so ko­ronapandemije dla na regularnym za­wodowym praktikumje wobdźělić, móža so nětko w online-bursy praktikumowych městnow wo tajke požadać. Wo tym je ministerstwo spočatk tydźenja w Drježdźanach informowało. Za to zarjadowana platforma ma pytanje za zbywacy čas hač do lěćnych prózdnin wolóžić.

Šulerki a šulerjo maja za powołansku orientaciju wot 7. do 10. lětnika znajmjeńša jedyn winowatostny praktikum wukonjeć. Koronapandemije dla njeje to mnohim wuknjacym dotal móžno było. „Ofensiwu prózdninskich praktikumow“ financuja we wobłuku akciskeho pro­grama „Nachwatać po koronje za dźěći a młodostnych“.