Wón dźěše do horow a so wjace žiwy njenawróći. Tale hłuboko zrudźaca sada steji za našeho wjelelětneho kolegu Rolfa Leidlera. Wón lubowaše hory, wosebje Alpy. Při nawróće z wjerška hory je wón znjezbožił a zemrěł.
Rolf Leidler narodźi so 1947 jako druhe dźěćo do swójby serbskeho apotekarja Pawoła Leidlera w Budyšinje. Na Hošic hasy dožiwi njewobćežene dźěćatstwo. Z mnoho swójbnych pućowanjow a přez přikład nana wuwiwaše so w nim wosebity zajim za přirodu a regionalne stawizny. Maturował bě runja swojemu bratrej a swojej sotře na Serbskej rozšěrjenej wyšej šuli w Małym Wjelkowje. Po studiju wučerstwa za biologiju a chemiju nawróći so do Łužicy a dźěłaše na někotrych šulach sewjerneho kraja wokrjesa Budyšina. W tutym času załoži sej sam swójbu a narodźištaj so jemu dźowka a syn. W lěće 1986 zmóžni so jemu „nachwilne“ wučerske městno na SRWŠ, kotraž bě tehdy hišće na Naměsće měra, dóstać.