Nowy semester na Instituće za sorabistiku zahajeny
Lipsk (SN/JBo). Na Instituće za sorabistiku Lipšćanskeje uniwersity su wčera nowych studentow witali. Dohromady dźewjeć nowačkam přeješe nawoda instituta prof. Edward Wornar dobry start do noweho žiwjenskeho wotrězka.
Za studij wučerstwa su so šěsć hornjoserbskich a jedna delnjoserbska studentka rozsudźili. Mjez nowačkami je runje tak jedna hornjoserbska studentka a jedyn student z Pólskeje, kotrajž wotnětka w Lipsku sorabistiku na magistra studujetaj. Prof. Wornar rozłoži přitomnym studentam a studentkam kaž tež hosćom wažnosć słowjanskich rěčow k rozumjenju serbšćiny. Z Łužicy běchu sej předsyda Domowiny Dawid Statnik, kubłanska referentka třěšneho zwjazka Kathrin Suchec-Dźisławkowa, sobudźěłaćerka Rěčneho centruma WITAJ Manuela Smolina, předsydka Serbskeho šulskeho towarstwa Katharina Jurkowa a z Budyskeje wotnožki Krajneho zarjada za šulu a kubłanje zamołwity za serbske kubłanišća Bosćij Handrik dojěli. Tež prof. Goro Christoph Kimura z Japanskeje, kiž tučasnje w Lipsku bydli, bě wčera přitomny.
Wuspěšne certifikacije
Choćebuz (MN/SN). Na wuspěšnje přewjedźenu certifikaciju hornjo- a delnjoserbskeje rěče zhladuje Rěčny centrum WITAJ (RCW) lětsa w Hornjej a Delnjej Łužicy. W Budyšinje wotměwa so certifikacija w rytmusu nalěto a nazyma, w Delnjej Łužicy změja za to w nazymje dwaj terminaj.
Korony dla njebě móžno hornjołužiski termin w nalěću dodźeržeć, wotpowědne pruwowanja su w juliju nachwatali. W Hornjej Łužicy bě so dohromady dźewjeć kandidatkow a kandidatow pruwować w niwowach A2, B1 a B2 dało. Třo z nich běchu stipendiaća Załožby za serbski lud na Lipšćanskej uniwersiće, tamni běchu eksterni zajimcy. Wšitke wobdźělnicy a wšitcy wobdźělnicy su pruwowanja wuspěšnje złožili.
W Budyskim Kamjentnym domje wotměchu so wčera a dźensa powołanske ...
Mała šula – wulki swjedźeń
Lědma bě prěni šulski tydźeń nimo, su na dworje Ewangelskeje zakładneje a srjedźneje šule we Wóslinku wulki stan za lětuši šulski swjedźeń natwarili.
Wóslink (DJ/SN). Na Wóslinčanskej šuli su minjenu sobotu šulski swjedźeń wotměli. Jednaćel towarstwa šulskeho nošerja Henry Nitzsche je přitomnych postrowił a farar Michael Nicolaus swjedźeń z krótkim nyšporom zahaji. Na to zaćahnychu cowboyjojo do swjedźenskeho stana. Pod hesłom „Dźiwi, dźiwi wuchod …“ běchu šulerjo wotměnjawy program z akrobatiku, linedance a dresuru psa nazwučowali. Band, w kotrejž nanojo a šulerjo hudźachu, je spektakl přewodźała. Při kofeju a tykancu bě składnosć bjesadować. Byrnjež so dešćowało, knježeše přewšo dobra nalada.
Wjeršk šulskeho swjedźenja je kóžde lěto znowa běh sponsorow na sportnišću. Wot 1. do 10. lětnika su so wšitcy šulerjo wo najlěpše wukony prócowali. To bě wulkotne dožiwjenje za wobdźělenych, jich staršich a přiwuznych. Skakanski hrodźik bu čile wužiwany. Mjeńši wopytowarjo dachu so šminkować a stachu so z fablowymi postawami. Wo ćělne derjeměće starachu so pilni pomocnicy.
ABC trjeba bórze noweho nawodu
Choćebuz (CP/SN). Na Dźěłanišću za serbske kubłanske wuwiwanje Choćebuz (ABC) chcedźa dodatne městno za projektowy management měć. Zdobom chcedźa zaručić naslědnistwo nawody, kiž ma so spočatk lěta 2023 wuzwolić. Tutej a dalše naležnosće běchu wobstatk njedawneho słužbneho wuradźowanja na žurli Choćebuskeho šulskeho zarjada. Wobdźělili su so wšitke sobudźěłaćerki a wšitcy sobudźěłaćerjo ABCja. Tuchwilu je jich dwanaće na štyri a poł dźěłoweho městna. Pódla bě tohorunja nawoda šulskeho zarjada Uwe Mader.
Hłowna tema zetkanja bě předstajić planowane projekty ABCja w šulskim lěće 2021/2022. Je jich znowa wjace hač 30 trajnych a časowje wjazanych we wobłuku wuwiwanja digitalnych a ćišćanych materialijow za wučbu serbšćiny a za bilingualnu wučbu we wšěch dwanaće lětnikach, kaž su to wučbnicy, dźěłowe zešiwki, zynkonošaki abo wučerske poručenja, ale tež dalekubłanja a fachowe wuradźowanja. Po wjetšinje tež na šulach skutkowacy sobudźěłaćerjo ABCja rozjimachu tohorunja organizatoriske a techniske prašenja w zwisku z home-officeom.
Wučer a wuspěšny sportowc był
Wo 87lětneho Gerata Hrjehorja žaruje nimo swójby a přiwuznych tež wulka syła něhdyšich šulerjow Serbskeje (rozšěrjeneje) wyšeje šule resp. Serbskeho gymnazija kaž tež swójba Sokołow. Tójšto wuknjacym bě njeboćički w lětomaj 1955 a 1956 a po tym wot 1961 do 1997 woblubowany sportowy wučer. Město krutosće pozbudźowaše wón chowancow radšo ze žortnym přispomnjenjom (Ty drje maš puding w rukomaj, štož jemu za zło njebjerjechu. Tež jeho přimjeno Ludźik na žadyn pad lózyske njebě).
Sam bě Gerat Hrjehor we wolejbulu a kopańcy aktiwny. Hižo jako šuler Serbskeho gymnazija w Českej Lípje a Varnsdorfje wot decembra 1945 hač do julija 1949 bě so za sport zajimował. Po nawróće do domizny přisłušeše wón mustwu Serbskeje wyšeje šule (SWŠ), kotrež sej 1951 titul młodźinskeho mištra Sakskeje wuwojowa a lěto pozdźišo samo hišće wicemišterstwo. Z Geratom běchu w mustwje Jakub Wjacławk, Jan Wornar, Pětr Šołta, Gerat Libš, Manfred Adam a Mikławš Křižank. Pisar tohole spominanja hraješe z Geratom wot 1964 za Rotaciju Budyšin kopańcu we wokrjesnej klasy.
