Wojerecy (KD/SN). Wot lěta 1921 maja we Wojerecach Lessingowy gymnazij, kotryž bě tehdy prěnja dale wjeduca šula w měsće. Wučbu serbšćiny pak podawaja tam hakle wot lěta 1992, jako bu kubłanišćo po swojim času jako rozšěrjena wyša šula znowa załožene, wě so tehdyši šulski rada wokrjesa Wojerecy Werner Böhme dopomnić. Tak započachu po nowym puću kročić, zo njetrjebaja wuknjacy 5. lětnika ze srjedźneje Łužicy hižo na Budyski Serbski gymnazij hić a tam w internaće bydlić, zo bychu serbšćinu wuknyli abo so w swojej maćeršćinje wukmanili.

Dźensa ma wučerka serbšćiny Lubina Kühnowa na Wojerowskim Lessingowym gymnaziju kóžde lěto šulerki a šulerjow w 5. a 6. lětniku, kotřiž chcedźa rěč wuknyć. Někotři su maćernorěčni, dalši maja znajomosće z wučby serbšćiny na zakładnej šuli „Handrij Zejler“ a dalši gymnaziasća so prosće za serbšćinu zajimuja, Lubina Kühnowa rozłožuje. Štóž chce so wot 7. do 12. lětnika dale na wučbje serbšćiny wobdźěleć, móže to na cyło­dnjowskim poskitku serbšćina, kotryž so samo dopołdnja wotměwa.