Na 5. warjenskim wubědźowanju wjerći so přichodny tydźeń wšitko wokoło kisałeje juški, wokoło stawiznow a potajnstwa, kotrež nochcedźa hišće nikomu přeradźić.

Slepo (JR/SN). Što maja warjeny twarožk, prampany kał, kwasna poliwka a štrajzlowy tykanc zhromadneho? Tute jědźe su na zašłych warjenskich wubědźowanjach w Slepom mnoho hosći zahorili. Nětko slěduje dalše kulinariske wužadanje. Štwórtk, 19. nowembra, wot 17 hodź. přeprošuje Domowinska župa „Jakub Lorenc-Zalěski“­ na 5. Slepjanske warjenske wubědźowanje do stareje šule w Brězowce. W srjedźišću steji zaso wosebita serbska jědź: kisała juška.

„Chcemy tomu zadźěwać, zo so stare recepty pozabudu. Kóžda swójba na swoje­ wašnje wari, ma swoje potajnstwa a swoje dopomnjenki. Runje to chcemy pokazać“, praji regionalna rěčnica župy Diana Maticowa. Přeprošene su swójby, towarstwa a předewzaća, kotrež chcedźa so ze swojim receptom wobdźělić. Přizjewjenja móža w Slepjanskim Serbskim kulturnym centrumje wotedać.