Hudźbna šula zaso online dźěła
Budyšin (SN/MiR). Spočatk tydźenja hišće steješe na internetnej stronje Budyskeje wokrjesneje hudźbneje šule, zo chcedźa dale we wobmjezowanym wobłuku wuwučować. Předwidźane běše, zo jenož jedyn wučer a jedyn šuler zhromadnje hudźitaj. Samsny dźeń pak so situacija změni, a poskitk njehodźi so zwoprawdźić. Wšako sakske postajenja wo škiće před koronu hudźbnym šulam prezencne dźěło zakazuja. „Njezadwělujemy pak“, měni nawodnica zarjadnišća Charlotte Garnys, „naši wučerjo su hižo za čas lockdowna dopokazali, zo sej pomhać wědźa.“ Wjace hač 70 procentow šulerjow bě nalěto z wučerjemi online zwučowało. A tak wědźa sej to nawodnica a fachowi wučerjo tež tónkróć předstajić. Zdźěla wuwučuja woni w swójskich rumnosćach hudźbneje šule, štož je w Budyšinje a Kamjencu móžne.
Wjeleworštowe dopomnjeće
Europska uniwersita Viadrina a Filmowy festiwal Choćebuz kooperujetej
Choćebuz/Frankfurt nad Wódru (RD/SN). „Stawizniske wobrazy a předstajenja wójny we (wuchodo)europskim filmje“ je titul masterskeho seminara na fakulće za kulturne wědomosće Europskeje uniwersity Viadrina Frankfurt nad Wódru w zymskim semestrje 2020/2021. Seminar wuhotuja we wobłuku zhromadneho dźěła z Filmowym festiwalom Choćebuz, z online-časopisom „Novinki“ a ze Swobodnej uniwersitu Berlin.
W srjedźišću seminara steji ćežišćo „Close Up WWII“ Choćebuskeho filmoweho festiwala, z kotrymž wěnuja so z rozdźělnych perspektiwow Druhej swětowej wójnje w aktualnych filmach a w filmach- klasikarjach. Studowacy so na festiwalu wobdźěleja, kotryž bu koronapandemije dla na 8. do 13. decembra přestorčeny. Woni rozestajeja so we wobłuku seminara wědomostnje z tym, kak su stawizny we festiwalowych přinoškach předstajene a publikuja na kóncu semestra filmokritiske eseje w „Novinkach“.
Adwentna knižka wušła
Prěni z dwanaće projektow ze swjedźenjom zwjazali
Malešecy (LuK/SN). Malešanska Witaj-pěstowarnja „K wódnemu mužej“, kotraž je w nošerstwje Serbskeho šulskeho towarstwa, zhladuje lětsa na 20lětne wobstaće. 2. oktobra zetkachu so tuž jeje chowancy, jich starši a kubłarki pěstowarnje, zo bychu zhromadnje tónle wosebity podawk woswjećili. Koronawirusa dla njejsu sej na to žanych hosći přeprosyli, ale su zhromadnu twarsku akciju na pěstowarskej zahrodźe přewjedli. Zaměr dźěłow njebě jenož hajić mjezsobnu zhromadnosć, ale skrućić serbskorěčne znajomosće dźěći a jich staršich. Za potwjerdźenje tohole naroka su wšitcy wobdźěleni zhotowili taflički z wobrazami wšelakich gratow, kotrež za dźěło trjebaja. Tež wosebite jědźe běchu tam pomjenowane. Na tafličkach, kotrež běchu laminěrowali, móža nětko serbske pomjenowanja słyšeć. Za to je jim Sakski wukubłanski a wupruwowanski kanal (SAEK) Budyšin wosom Bookii-pisakow přewostajił. Tónle poskitk wosebje dźěći, zdźěla pak tež starši wužiwaja.
Dźěći Radworskeho serbskeho katolskeho dźěćaceho domu „Alojs ...
Na zastup do powołanskeho žiwjenja přihotowani
Budyšin (CS/SN). W ramiku swjatočneje eksmatrikulacije na Budyskej powołanskej akademiji (BA) přija zańdźeny pjatk w Němsko-Serbskim ludowym dźiwadle 127 absolwentow swoje wopismo. Woni běchu w lěće 2017 započeli na BA studować. Jenož 13 dyrbja dalši króć na pruwowanjach swoje zamóžnosće dopokazać.
Nowych studentow witał
Na přichod wusměrjeni
Radwor (SN/BŠe). W gmejnje Radwor skutkowaca staršiska iniciatiwa je na swojim wčerawšim zetkanju w hosćencu „Meja“ wo tym rěčała, kak měła so do přichoda organizować a kotre struktury za to trjeba. Kaž rěčnica iniciatiwy Katrin Suchec-Dźisławkowa zdźěli, wusměrja so iniciatiwa předewšěm na rozšěrjenje cyłotneho serbskorěčneho kubłanja na šuli. Wšitke dźěći dyrbjeli wobšěrny přistup k serbskej rěči dóstać. Němskich staršich měli podpěrać a přewodźeć, tak zo móhli so wšitcy na serbskim žiwjenju wobdźělić a serbske rěčne rumy dožiwić. „Kóždy staršiski dom je nam wažny“, rěčnica iniciatiwy podšmórny. Nětko chcedźa akterojo sep rěčnych naprawow zestajeć, trěbnu organizatorisku strukturu pruwować a zhromadne dźěło ze šulskimaj nawodnistwomaj zesylnić.
Wčera přitomnaj jednaćel Domowiny Marko Kowar a regionalna rěčnica za Budysku župu Katja Liznarjec wužištaj składnosć, wo dźěławosći iniciatiwy, wo aktualnym połoženju šule a stawje serbskorěčneho kubłanja so nadrobnje wobhonić. Kónc měsaca chce so staršiska iniciatiwa znowa schadźować.
Za fiktiwny dźenik žurka samo nowe słowa tworili
Kamjenc (SN/at). Sławne Lessingowe šulerske pisanske wubědźowanje, kotrež wuhotuje Kamjenski Lessingowy muzej, je so lětsa koronapandemije dla do wulkich ćežow dóstało. We hłownej fazy, jako mějachu wubědźowanske přinoški dochadźeć, su wobmjezowanja korony dla po cyłej republice šulske žiwjenje lemili. Wučerki a wučerjo němčiny jako najwažniši multiplikatorojo tohole wurisanja njemóžachu tuž swojich šulerjow abo swoje šulerki pohonjeć, zo bychu so pjera jimali. Što pak w tajkej situaciji činić? Rozsud Lessingoweho muzeja, čas zapodaća hač do kónca lětnich prózdnin podlěšić, je so jako prawy wopokazał. 56 tekstow, mjez nimi dwaj žurnalistiskej, juroram skónčnje předležeše. Připad to chcyše, zo mytowachu minjeny pjatk šěsć lawreatkow, kotrež wuknjechu za čas pisanja w Kamjencu, Drježdźanach, Mišnje a Neubrandenburgu.
Móža produktiwnje wuknyć
Lochko sej tući šulerjo nimaja, dokelž su wohroženi, zo njemóža šulski čas zakónčić. Zwjetša mějachu lěto wob lěto njewuspěch a njejsu k swojim šulskim towaršam z wukonami hižo nawjazać móhli. Na tymle městnje započina so projekt „Produktiwne wuknjenje“ za kotryž móža so šulerjo 8. lětnika sami požadać.
Wojerecy (SiR/SN). Zajimcow za „produktiwne wuknjenje“ we Wojerecach je stajnje wjele, tak zo nimaja za wšěch městno. Su to młodostni, kotřiž chodźa do 8. a 9. lětnika. Projekt zahaja tam kóžde lěto znowa ze šěsćtydźenskej fazu orientacije. Po tym móža šulerjo kaž tež wučerjo rjec, hač so projekt za jednotliwca hodźi.
Wjace hač dwacećo běchu so w tymle šulskim lěće požadali. Dźewjatnaćo su fazu orientacije wuspěšnje zmištrowali. Woni móža so nětko na wosebitym kubłanskim poskitku noweje wyšeje šule Wojerecy wobdźělić. Zańdźeny pjatk su jim wučerjo Ines Fichte a Gerd Spee trěbne certifikaty přepodali.
