Dožiwjenska šćežka z dwanaće stacijemi při Čornochołmčanskim Krabatowym młynje ma dale na wobsahu nabywać
Dwanaće stacijow zajimcow přeproša. Informaciske tafle su z drjewa robinije. Dožiwjenska šćežka rozłožuje wopytowarjam baju wo Krabaće po romanje Otfrieda Preußlera. „Dźe wo přichod Krabata do Čorneho Chołmca, wo jeho lěta jako wučomnik, jeho rjemjesło, jeho wšědny dźeń. Wobjednane su mnohe temy“, praji Magdalena Schaffer, kotraž je wot lońšeho awgusta zamołwita za dźěćace a młodźinske dźěło we wobłuku kulturne kubłanje na dožiwjenskim statoku Krabatowy młyn w Čornym Chołmcu. Wo wothłosu, rozšěrjenju a přichodźe dožiwjenskeje šćežki je so Andreas Kirschke z njej rozmołwjał.
Knjeni Schaffer, kotre předstawizny ma dožiwjenska šćežka?
M. Schaffer: Wona nasta w lěće 2010 po ideji mojeje předchadnicy Kerstin Zukunft. Na 450metrowskim pućiku je dwanaće zajimawych stacijow wutworjenych. Zakładna mysl bě, zo sej hosćo baju wo Krabaće samostatnje, z wćipnosću a z fantaziju wotkrywaja. Jako čerwjenu nitku zdźěłachmy kwis z mnohostronskimi prašenjemi.
