Kubłanje

Wažna je perspektiwa

Mittwoch, 30. Oktober 2019 geschrieben von: Milenka Rječcyna

Drježdźany/Budyšin (SN/MiR). Wot pjatka do njedźele změja sej šoferojo, kotřiž chcedźa po Budyskej Tuchorskej jěć, trochu ćešo hač hewak. Spěšnemu přejězdej dróhi wobara wulki čorny bus, Fabmobil bus přichoda. Stać budźe wón před domskim z čisłom 18, hdźež namakaja zajimcy Budyski serwis za kreatiwne hłójčki HÄ?PPY-LAB. W busu, mobilnej digitalnej dźěłarni na kolesach, wotměje so wot zajutřišeho třidnjowska dźěłarnička. Iniciatoraj z Budyskeho boka, załožerjej HÄ?PPY LABa, staj Reno Rössel a André Mirtschink.

Z ptačeje perspektiwy

Mittwoch, 30. Oktober 2019 geschrieben von: Milenka Rječcyna

Njezanjechać to, štož je, ale přichod we wóčku měć wšitcy chcemy, haj samo dyrbimy. Hačrunjež je nam ćežko zwučene puće wopušćić. To pak chce projekt Fabmobila „Twoja wizija za Łužicu w lěće 2030“. Jich iniciatorojo a mjeztym wjetši kruh sobudźěłaćerjow a podpěraćelow hladaja wotwonka na Łužicu a maja takrjec wid z ptačeje perspektiwy. Tak dohladaja so prózdnych blakow na krajnej karće, kotrež hodźeli so ze žiwjenjom pjelnić. Na tamnym boku zwěsćeja, hdźe je něšto nastało, štož so hižo do časa njehodźi. Při wšěch do přichoda sahacych idejach, haj, – zarjaduja swoje mysle a přeća samo do sciencefictiona –, widźa woni přeco wobnowjenje, wosebje pak chcedźa to stare z nowym zwjazać. Wšo to z wutrobu přewodźeja. Wšako sami zdźěla z Łužicy pochadźeja a wědźa tuž jako w Berlinje abo Drježdźanach bydlacy zwisk mjez idejemi a tudyšej realitu tworić. A činja to na dobro wšěch! Milenka Rječcyna

Serbšćinu njeposkićeja

Donnerstag, 24. Oktober 2019 geschrieben von: Milenka Rječcyna

Zajim za nawuknjenje rěčow wostawa dale wulki

Wojerecy (SN/mwe/MiR). Nazymska sezona na ludowych uniwersitach Budyskeho wokrjesa je wuspěšnje zaběžała. To zdźěli Christin Steinborn, zamołwita za marketing a zjawnostne dźěło ludoweje uniwersity Wojerecy kaž tež tamnišeje hudźbneje šule pola předewzaća města Wojerec Zookultur. Program za nazymski semester 2019 hižo wot lěća předleži. Za někotre poskitki móža so zajimcy dale přizjewić, tež internetnje. Wšako njejsu tam wozjewjene kursy hišće wšitke zahajene abo maja hišće swobodne městna. „Ćežišća našich kursow su wšelakore a mamy zajimy na mnohich polach.“

Z ekskursijemi za wučerstwo wabić

Donnerstag, 24. Oktober 2019 geschrieben von: Bosćij Handrik

Na filozofiskej fakulće Uniwersity Jana Ewangelista Purkyně w čěskim Ústíju nad Labem wotmě so wčera zarjadowanje na temu „Łužica a Serbja“. Přeprošenje filozofiskeje fakulty bě něhdźe 50 studentkow a studentow kaž tež nawjedowacych sobudźěłaćerkow a sobudźěłaćerjow dalšich fakultow sćěhowało.

Ústí nad Labem (BHR/SN). Na spočatku zarjadowanja witaše nawodnica instituta za germanistiku Renata Cornejo referentow zarjadowanja. Dr. Zdeněk Valenta z pedagogiskeje fakulty tamnišeje uniwersity přednošowaše wo stawizniskich temach Serbstwa, wosebje wěnowaše so wuwiću serbskeho pismowstwa a čěsko-serbskim stykam.

Nowe puće so wotwěraja

Donnerstag, 24. Oktober 2019 geschrieben von: Milenka Rječcyna

Přeco zaso so dźiwam, kelko angažementa serbskemu ludej Češa wopokazuja. Někotři maja to bjezdwěla za samozrozumliwe – złožowacy so na stawizny słowjanskich narodow a mjezsobnu, lětstotki trajacu serbsko-čěsku wzajomnosć. Za mnje pak njeje to tak wšědne, wosebje nic w dźensa wšěm wotewrjenym swěće. Wuchadźejo z nuzy, zo w Serbach wučerjo pobrachuja, nětko Čěska sylnišo w fokusu steji. Při tym nimam w prěnim wokomiku za rozsudne, hač zarjadowanja na čěskich uniwersitach woprawdźe tomu dopomhaja wučerjow za Łužicu zdobyć. Wjele bóle mje jima, zo so na te wašnje swět Serbow a Čechow rozšěrja. Na čěskich uniwersitach, a nic hižo přewažnje jenož w Praze, zhonja młodźi ludźo wo nami. Nowe puće so wotwěraja, zdobyć sej duchownu elitu mjez druhim na uniwersitach w Liberecu, Brnje, Plzenje a Ústíju nad Labem – a tak snano tež čěskich wučerjow za Łužicu. Milenka Rječcyna