Přeće znowa słyšeć było

Donnerstag, 14. März 2019 geschrieben von:
Maćerje Malešanskich Witaj-dźěći wědźachu, čehodla su wčera na staršiski wječork wo dwurěčnym kubłanju do Stróžanskeho Domu tysac hatow přišli. Informacijow bě tójšto, hačrunjež su přitomni wšelake aspekty tu abo tam zawěsće hižo raz słyšeli. Wažne bě přiznaće zamołwitych, zo njejsu w spočatnych lětach nastupajo wabjenje za dwurěčnosć poziciju staršich dosć wobkedźbowali. Dźěćo dźě druhu rěč, serbšćinu, nawuknje; staršej pak chcetaj na tym wobdźělenaj być. Zapřijeći być, na to stej Malešanskej maćeri, kotrejž sym tež wčera na zarjadowanju wuhladał, hižo před dobrym měsacom na rozmołwje z předsydu Domowiny skedźbniłoj. Z dźěćimi a maćerjemi abo nanami so popoł­dnju zetkać, po dohladowanju w pěstowarni, zo bychu sej tak nowy rěčny swět dźowki abo syna spřistupnili – tele přeće bě wčera znowa słyšeć. Zeskutkownjene je přeće dobre wuchadźišćo, chcedźa-li w šulach Malešanskeje gmejny serbšćinu zaso bóle zadomić. Axel Arlt

Po štyrceći lětach jako nawodnica Radworskeho katolskeho dźěćaceho domu so Monika Bukowa na wuměnk podała

Ličba 40 ma wěsty symboliski charakter wosebje hladajo na křesćanske stawi­zny. Mjenje abo bóle připadnje je tule ličbu tež Monika Bukowa docpěła, kotraž bě Radworski katolski dźěćacy dom „Alojs Andricki“ štyrceći lět dołho nawjedowała. Kónc februara poda so wona na zasłuženy wuměnk. Čas jeje wjelelětneho skutkowanja pak bě zdobom čas změnow, kotrež je wuspěšnje zmištrowała.

Wot puća so nihdy njewotsaliła

Nowy partner

Dienstag, 12. März 2019 geschrieben von:

Choćebuz (SN). 53. centralna olympiada serbskeje rěče za šulerjow a šulerki 6. lětnika Delnjeje a Hornjeje Łužicy budźe wot 8. do 10. apryla we Wodowych Hendrichecach. Měsac do toho stej předsydka Serbskeho šulskeho towarstwa Ludmila Budarjowa a nawodnica Dźěłanišća za serbske kubłanske wuwiwanje Choćebuz ABC dr. Christiana Piniekowa kooperaciske zrěčenje podpisałoj. SŠT je nošer wubědźowanja. ABC jako krajna institucija Braniborskeje budźe SŠT prěni króć oficialnje nastupajo delnjoserbske nadawki za olympiadu podpěrać a chce tež na městnje z fachowo-pedagogiskim a rěčnym přewodom prezentna być.

Zetkanje je zymski wjeršk

Montag, 11. März 2019 geschrieben von:

Najbóle wopytana swójbna schadźowanka dotal

Chrósćicy (MaU/SN). Swójbna schadźowanka w Chrósćicach wuwiwa so na wulki zymski wjeršk. Wosebje dźěći a jich starši maja termin kruće do kalendra zapisany, wšako móža so tón dźeń mjez sobu zetkać a bjesadować. Dźěći pak wužiwaja zarjadowanje za to, so zabawjeć. Tomu běše tež wčera popołdnju tak. Budyski Rěčny centrum WITAJ a Kamjenska župa „Michał Hórnik“ běštej na wot­měnjawe popołdnjo do Chróšćanskeje „Jednoty“­ přeprosyłoj. Wot 15 hač do 18 hodź. knježeše w hali kaž tež w rumnosćach Serbskeje zakładneje šule „Jurij Chěžka“ čiłe žiwjenje. Cilowa skupina zarjadowanja­ su dźěći wot nul do dwa­naće lět zhromadnje ze swojimi swójbnymi. Na wšě 400 ludźi wčera přichwata. „Tak je lětuša swójbna schadźowanka z dotal wotměwacych so najbóle wopytana“, zwěsći regionalna rěčnica za teri­torij župy Katarina Jurkowa. Budyšanka Franciska Krawcowa rjekny: „Smy mjeztym druhi króć na swójbnej schadźowance byli. Mi so zarjadowanje jara spodoba. Bydlimy w Budyšinje. Naju syn ma tule składnosć zwiski k wjesnym dźěćom­ nawjazać a wobstejace skrućić.

Wučerjow spěšnišo do słužby dóstać

Dienstag, 26. Februar 2019 geschrieben von:

Drježdźany (SN/JaW). Sakske kultusowe ministerstwo chce z rjadom změnow pruwowanskeho porjada za studentow wučerstwa spěšnišo a zdobom wjac móžnych nowych wučerjow do powołanja dóstać a do praksy pósłać. Zdobom chce tak studentow samych kaž tež wysoke šule wolóžić. Wo tym rozprawja kultus na swojich internetnych stronach. Pła­ćiwosće nabyć ma změnjeny pruwowanski porjad w Sakskej hižo lětsa spočatk apryla, kaž z medijoweje zdźělenki ministerstwa wuchadźa.

Wjelelětnu nawodnicu rozžohnowali

Montag, 25. Februar 2019 geschrieben von:
We wobłuku swjatočneje dwurěčneje Božeje mšě su wčera w Radworju wjelelětnu nawodnicu tamnišeho katolskeho dźěćaceho domu „Alojs Andricki“ Moniku Bukowu (nalěwo) na wuměnk rozžohnowali. Direktor Carity Drježdźansko-Mišnjanskeho biskopstwa Matthias Mitzscherlich (naprawo) wuzběhny dźěło Moniki Bukoweje, kotraž je dom na wšě 40 lět nawjedowała. Za dobre zhromadne dźěło dźakował je so jej tež wjesnjanosta Wincenc Baberška (CDU). Nowa nawodnica dźěćaceho domu je 32lětna Andrea Henichowa. Po kemšach běchu wosadni na přijeće a bjesadu do dźě­ćaceho domu prošeni. Foto: Bosćij Handrik

W Smjerdźečanskim kubłanskim srjedźišću LIPA su wčera kurs za šiće z mašinu zakónčili. Wot póndźele běchu so na nim Hanna­ Schickert, Wanda Schweitzer, Alina Šołćic, Viola Schickert, Leoni Bulankec, Emila Šwanec a Marta Handrikec (wotlěwa) wobdźělili. Pod wěcywustojnym nawodom Weroniki Köhleroweje šijachu sej dźěći mjez druhim pisane toški. Foto: Feliks Haza

Wučerjo najebać přistajenjadale trěbni

Donnerstag, 21. Februar 2019 geschrieben von:

Drježdźany/Budyšin (SN/JaW). Druhe połlěto 2018/2019 zahaja na sakskich šulach z něhdźe 670 nowowob­sadźenymi wučerskimi městnami. Přiwšěm wučerjo we wšěch šulskich družinach dale pobrachuja. Wo tym informuje medijowy rěčnik sakskeho kultusoweho ministerstwa Dirk Reelfs w nowinskej zdźělence. „Štyri razy wob lěto swobodne městna na kubłanišćach wupisujemy. Terminaj 1. nowember a 1. meja stej při tym skerje na přidružnikow wu­směrje­nej, k 1. februarej a 1. awgustej pytamy wukubłanych pedagogow“, rozłožuje nowinski rěčnik Reelfs.

Tež Budyski Serbski muzej ma w zymskich prózdninach wosebite poskitki za šulerjow. Wčera wužištaj Johan a Sarah składnosć, so hromadźe z Rebeccu Wöppelowej (wotlěwa) z wuměłskimi twórbami zaběrać. Jutře, štwórtk, steji žiwjenje Milčanow a Łužičanow w srjedźišću prózdninskeho poskitka. Foto: SN/Maćij Bulank

Premjera zabawneho popołdnja

Freitag, 15. Februar 2019 geschrieben von:
Mjez wopytowarjemi prěnjeho zabawneho popołdnja za dźěći a staršich pod hesłom „Hrajkownja“ bě tež Mersiowskec swójba z Budyšina. Na poskitk běchu woni přez flajer storčili. W Röhrscheidtowej bašće je sobudźěłaćer Rěčneho centruma WITAJ­ Lorenc Jankowsky (zady) wčera hrajki, towaršne deskowe hry kaž tež tykanc, sad a kofej spřihotował. Ze zarjadowanjom chce wón k tomu přinošować, serbskosć w sprjewinym měsće šěrić. Kubłanski projekt je wuslědk namjeta, kotryž bě Jankowsky we wobłuku zeńdźenja rozmołwneho koła Budyski kraj předstajił a je jón nětko zhromadnje z RCW zwoprawdźił. Foto: SN/Maćij Bulank

Serbska debata

Neuheiten LND