Skónčnje lěćne prózdniny!
Ze stipendijom sej swójske talenty wotkrył
Šuler Artsiom Tsitsenkous pochadźa z Běłoruskeje, wuknje na Wojerowskim gymnaziju a hori so za sport
Artsiom Tsitsenkous pochadźa z Běłoruskeje. Šuler Wojerowskeho Léona- Foucaultoweho-gymnazija bydli mjeztym nimale lětdźesatk zhromadnje ze staršimaj we Łužicy.
„Chceš-li něšto docpěć, štož ći na wutrobje leži, potom dyrbiš cyłu swoju energiju swojej ideji abo projektej wěnować.“ Toho je sej Artsiom Tsitsenkous wěsty. Wosebje zajimuje so 16lětny młodostny z Wulkich Zdźarow za sport, w prěnim rjedźe za mjetańcu.
„Dyrbiš při hraću sobu myslić, njesměrnje spěšny być, hrajnišćo derje přewidźeć a w teamje integrowany być“, wón praji. Jako čłon Łužiskeho mjetarskeho towarstwa LHV Wojerecy hraje w regionalnej wyšej lize. Lětsa je sej mustwo prěnje městno wuwojowało a nětko hraje wo postup. Artsiom je kruty dźěl mustwa a derje integrowany. Mjez druhim ma tež styki k serbskim młodostnym: „Znaju někotrych młodych Serbow, kotřiž mi serbsku kulturu zbližuja. Nimo toho sym w šuli wo serbskej kulturje zhonił. Powšitkownje mam serbsku kulturu a tradicije za jara rjane.“
Wurjadne wukony šulerjow počesćili
Zanurić so do bajkojteho swěta dźiwow
Lětuša inscenacija na Budyskim Hrodźe přenjese kuzło na jewišću na přihladowarjow kóždeježkuli staroby
Hač do 20. julija čakaja hišće mnohe předstajenja inscenacije „Alice im Wunderland“ po sławnym romanje Lewisa Carrolla na přihladowarjow Budyskeho lěćneho dźiwadła. Štóž hru hač donětka hišće widźał njeje, tomu njech je doporučene, nic hakle krótko do započatka předstajenja na Budyski Hród přińć, sej na kóždy pad programowy zešiwk kupić a tutón dočasnje studować. To pomha jara při zrozumjenju jednanja a pozadkach bajkojtych figurow krucha. Štóž pak so scyła intelektualnje wužadać nochce, tón móže so wězo tež jednorje sobu storhnyć dać wot z wjele hrajnym wjeselom agěrowacych hrajerjow. Pisany jewišćowy wobraz a žortne kostimy kaž tež spěwanje a rejowanje wobkuzłuja kóždeho. Musical skića staršim runje tak kaž dźěćom jenak dobru zabawu. Dźěći budu so do figury něhdźe jědnaćelětneje Alice zamyslić móc, kotrej njemóže scyła spěšnje dosć hić, so skónčnje dorosćena stać.
Ja du domoj, zaso domoj ...
Spěwajo wot Wulkich Zdźarow přez Wojerecy do Chrósćic.
Rěčne hnězdo DOMOJ Wulke Zdźary swoje prěnje dožiwjenja w Serbskich Nowinach wozjewi.
Wulke Zdźary. Njezapomnity dźeń połny hudźby, rěče a zhromadnosće leži za nami! Naša wuknjenska skupina wopyta serbski kulturny festiwal SubSorb, kotryž woswjećichu srjedź meje druhi raz a to zaso w Kulturnej fabrice we Wojerecach. Z hosćom bě wuměłstwowy kolektiw Serbsko-Waliziske přećelstwo, kotrež dźěłaše w tamnišim studiju na nowym albumje. Woni zmóžnichu nam zhotowjenje małeho přinoška: Spěw Domoj Blues, kotryž bě naš skupinski čłon a wuměłc Jacke Schwarz (Jakub Čornak z Njebjelčic) ekstra za nas napisał. Jón běchmy do toho w rěčnym hnězdźe jako chór nazwučowali a móžachmy jón nětko zhromadnje zaspěwać. Mnozy z nas běchu prěni raz w profesionalnym zwukowym studiju a to bjez nazhonjenja w chórowym spěwanju. Wosebite dožiwjenje, kotrež nam hišće dołho w pomjatku wostanje.
Powołanske wiki w Slepom přewjedli
Na słownik hišće chwilku čakać
W planje za wudawanje wučbnicow za přichodne šulske lěto 2025/2026 steji mjez 33 wudaćemi němsko-serbski šulski słownik. Na tutym ćežišćowym titulu Rěčny centrum WITAJ hižo wjacore lěta dźěła.
Budyšin (SN/MiR). Nowy němsko-serbski šulski słownik ma so lětsa dozhotowić a ćišćeć. Po planje ma to w štwórtym kwartalu zdokonjane być. Bayerske předewzaće je datowu banku nadźěłało a so wo sadźbu wobsaha starała. Sobudźěłaćerjo RCW su runočasnje gramatiski dźěl nadźěłali a čitaja mjeztym korektury. K zahajenju noweho šulskeho lěta 2025/2026 pak njebudu słownik šulam a šulerjam hišće přewostajić móc. Jako wuknjenski a wuwučowanski srědk, kotryž maja šulerjo přichodnje tež při pruwowanjach wužiwać, ma so słownik wot sakskeho statneho ministerstwa za kultus dopušćić. „Njewěmy, kak dołho proces pruwowanja traje“, rjekny wotrjadnica za wuwiwanje rěče a pedagogiku w RCW Annett Dźědźikowa. „Chcemy ze Załožbu za serbski lud wosebite rjadowanje za wudawanje namakać, tak zo móža šulerjo słownik klětu hišće do zakónčenja prěnjeho šulskeho połlěta wužiwać.“
Maćična akademija z přednoškom wo hornjoserbskej rěčnej syntezy
Minjeny štwórtk přeprošowaše Maćica Serbska (MS) na swoju lětušu prěnju akademiju. W srjedźišću steješe tak mjenowana rěčna synteza, potajkim spóznawanje a modulacija rěče w digitalnym swěće, kotraž zmóžnja na přikład awtomatiske přełoženje a předčitanje tekstow.
Před 25 lětami Witaj w pěstowarni na Horach zahajili
Hory. W pěstowarni na Horach pola Wojerec su zawčerawšim 25lětne wobstaće projekta Witaj woswjećili. Wjesnjanostka gmejny Halštrowska hola Antje Gasterstädt w swojich postrownych słowach pozitiwne wuwiće projekta w pěstowarni kaž tež zaměrne prócowanje wo zachowanje serbskeje rěče chwaleše. Škoda pak za nju je, zo njepokročuja z wučbu serbšćiny po zakładnej šuli. Bywši wjesnjanosta Dietmar Koark chwaleše iniciatiwu tehdyšich staršich a iniciatorow wokoło Jana Barta a Rafaela Wowčerja za Witaj-projekt.
Mjez gratulantami běchu tež zastupnicy Wojerowskeje župy „Handrij Zejler“, Syće za regionalnu identitu a serbsku rěč ZARI kaž tež Rěčneho centruma WITAJ z Budyšina. W lěće 2000 su w pěstowarni na Horach z jednej skupinu a jednej maćernorěčnej pěstowarku serbske kubłanje w pěstowarni zahajili. Dźensa ma kubłanišćo w nošerstwje gmejny Halštrowska hola štyri Witaj-skupiny, wo kotrež so štyri maćernorěčne kubłarki staraja.
Serbska skupina dźěći wohrožena
Drježdźany (SN/mb). Popołdnjo za swójby je so wčera na zahrodźe Drježdźanskeje serbskeje dnjowskeje skupiny za małe dźěći w nowym měsće wotměło. Wona je wot 2023 w nošerstwje Serbskeho šulskeho towarstwa (SŠT). Tam su so serbske a dalše swójby we wobłuku projektneho tydźenja nošerjow za hladanje dźěći w skupinach dnjowych maćerjow a nanow w Drježdźanach schadźowali. Tak předsyda towarstwa Serbow w sakskej stolicy „Stup dale“ Christoph Cyž informowaše.
Dalše wobstaće serbskeje dźěćaceje skupiny w sakskej stolicy je wohrožene. Dotal běše skupina serbskeje dnjoweje maćerje Sabiny Wagneroweje přeco ze znajmjeńša pjeć dźěćimi wuknihowana. Wot nazymy budźe hladajo na wot- a přichady po tuchwilnym stawje najskerje mjenje hač pjeć dźěći w skupinje. Aktualnje prócuja so tři wot pjeć swójbow wo podlěšenje pobytka swojich dźěći w serbskej skupinje. Jim pak město Drježdźany dotal hišće městno přizwoliło njeje.
