Ze seminarami informuje KiJu wo temje „psychiska strowota dźěći a młodostnych“

Biskopicy (SN/MiP). „Z rozumom, z rukomaj a z wutrobu!“ – w tutym jadriwym hesle je Andreas Mikus, nawoda Syće ­za dźěći a młodźinu (KiJu), na nowinarskej rozmołwje w Biskopicach tydźenja štwórtk dźěławosć swojeho teama wo­pisał. W projekće, kotryž je před 30 lětami z jeničkej sobudźěłaćerku startował, dźěła dźensa dohromady 27 ludźi hłownohamtsce na dobro dźěći a młodostnych w Budyskim wokrjesu. „Hladajo na tute wuwiće wšak njemóžemy njespokojni być“, praji nawoda syće. „Přiwšěm je naš bój wo přizwolenje srědkow a dźěłowych městnow nadal běžna tema za nas“, wón doda.

Wězo ma Diana Šołćina, nawodnica Serbskeje wyšeje šule „Michał Hórnik“ we Worklecach, prawje: „Kubłanska awtonomija“ a „dale kaž dotal“ njejstej jeničkej alternatiwje za přichod serbskeho kubłanja. Ale titul druheje „serbskeje debaty“ na přeprošenje Krajneje centrale za politiske kubłanje Sakskeje, Serbskich Nowin a Załožby za serbski lud wopisuje takrjec měznikaj wulkeho pola, na kotrymž je wjele móžnosćow, něšto worać. Zo je za tajke zjawne zhromadne rozmyslowanje najwjetši čas, pokazuje runje zašłe posedźenje Serbskeje rady w Drježdźanach: Mjeztym zo wědomostnicy hišće wuslědki kubłanskeho modela „2plus“ wuhódnoćeja, zwěsći předsyda Serbskeje rady Marko Suchy, zo tón model ze wšelakich přičin w realiće faktisce docyła njeeksistuje. Snadź by hižo wuspěch druheje serbskeje debaty był, zo wotkrywaja sej wučerjo, starši, šulerjo a dalši angažowani Serbja podobny wid na realitu na šulach, to by konkluzije w konsensu wolóžiło. Marcel Brauman

Budyšin (CS/SN). Bliži so kónc šulskeho časa, maja so šulscy wotchadnicy z tym zaběrać, hač a hdźe chcedźa powołanje nawuknyć abo studować. Wukubłanske wiki „Nawi přichoda“, kotrež wotměwaja so po tradiciji po zymskich prózdninach w Budyskej Powołanskej akademiji (BA), poskićeja w komprimowanej formje ­přehlad wo wukubłanskich a studijnych móžnosćach w regionje. Wuhotowarjo wikow su Sakska Studijna akademija ze swojej Budyskej wotnožku BA, Budyski Powołanski šulski centrum, Agentura za dźěło, Budyske wokrjesne rjemjeslnistwo, Industrijowa a wikowanska komora (IHK) kaž tež město a wokrjes Budyšin. Wšitcy zhromadnje sej přeja, zo wostanu šulscy wotchadnicy po zakónčenju swojeho šulskeho časa po wjetšinje we domiznje.

Chrósćicy (SN/AN). Mjeztym hižo 13. raz wuhotowa wčera popołdnju Rěčny centrum Witaj (RCW) swoju schadźowanku za swójby, kotraž wotměwaše so tež lětsa zaso z podpěru Kamjenskeje župy „Michał Hórnik“ w Chróšćan „Jednoće“.

„Dźensa zličichmy něhdźe 280 ludźi, mjez kotrymiž běše k našemu wjeselu zaso jara wjele nowych wobličow“, rozprawja regionalna rěčnica župy „Michał Hórnik“ Katharina Jurkowa. Zabawne zhromadne popołdnjo z najwšelakorišimi poskitkami zahaji so z krótkim programom rejowarkow „Łužičankow“. Po tym běchu wšitcy přeprošeni paslić, sportować, čitać, so z roboterami zaběrać abo cyle jednorje při šalce kofeja a dobrym kusku tykanca do rozmołwy přińć.