Rakecy (SN/AN). Zajim běše přewšo wulki, jako prošachu na wčerawšim popołdnju wučerki Rakečan zakładneje šule „Bjarnat Krawc“ na dźeń wotewrjenych duri. Nimo rjadowniskich rumnosćow předstajichu wone tež cyłodnjowske šulske poskitki. Wo sławnym wótčincu, po kotrymž je šula pomjenowana, serbskim komponisće Bjarnaće Krawcu, informuja witriny, kotrež su po cyłym domskim postajene. Šulerki a šulerjo su je sami wuhotowali a předstajeja tu wažne stacije jeho žiwjenja kaž tež někotre dźěćace spěwy, kotrež je skomponował. Tute spěwy su tež dźensa hišće wobstatk wučby serbšćiny na šuli.

Jako wosebitej hosćej na wčerawšim zarjadowanju běštej kubłanska referentka Domowiny Katrin Suchec-Dźisławkowa a rěčna motiwatorka za Rakečan kónčinu Raphaela Wićazowa přichwatałoj. Wonej předstajištej zajimowanym staršim fakultatiwny poskitk wučby serbšćiny na šuli. Skedźbništej tež na wosebity wuznam serbskeje rěče w Rakečanskej kónčinje, w srjedźišću dwurěčneho wokrjesa Budyšin.