Wokrjesny sejmik w Budyšinje je drje do prózdnin wobzamknył, zo měli po móžnosći před šulemi w nošerstwje wokrjesa chorhoje stajnje zmawować. Kak so to zwoprawdźi, pak jasne njeje.

Budyšin (mj/SN). Na lisćinje potrjechenych kubłanišćow stejitej tež powołanskej šulskej centrumaj w Kamjencu a we Wojerecach. Wjetšina wokrjesnych radźićelow je so po namjeće krajnoradneho zarjada za priority rozsudźiła. Hdźež njeje štyrjoch sćežorow za němsku, saksku, serbsku a europsku chorhoj, maja najprjedy němsku, potom saksku a serbsku chorhoj pójsnyć. We Wojerecach maja tři sćežory, potajkim by tam jenož europska chorhoj pobrachowała. Dokelž steji w serbskim sydlenskim rumje serbska chorhoj na prěnim městnje wobzamknjenych prioritow, bychu na sćežoromaj před Kamjenskim stejnišćom městno za serbske a němske barby měli.

Naprašowanje Serbskich Nowin pak je krótko do kónca prózdnin wunjesło, zo we Wojerecach wo tutej winowatosći hišće ničo zhonili njejsu. W Kamjencu njejsu sej ani wěsći, zo stej sćežoraj hišće kmanej za stajne wužiwanje.

Drježdźany (SN/MiR). Nastupajo fotografowanje a filmowanje je sakska zamołwita za škit datow a transparencu (SDTB) dr. Juliane Hundert na internetnej stronje www.datenschutz.de směrnicy wozjewiła. Tak poruča wona staršim šulskich nowačkow, zo jenož swoje dźěćo fotografuja. To płaći tež za přiwuznych. Tele fota a wideja smědźa so w swójbnym a přećelskim kruhu dale dawać. Ručež pak so do socialnych syćow abo na zjawne webstrony staja resp. wjetšemu kruhej wužiwarjow zwonka swójbneho wobłuka přistupnja, je přizwolenje potrjechenych wosobow trěbne. „Su-li nimo swójskeho dźěsća dalše dźěći widźeć, dyrbja starši přeća a prawa tych swójbow wobkedźbować“, Juliane Hundert potwjerdźa. Mnohe šule zarjaduja na swjedźenju zastupa do šule fotowe cony, hdźež je fotografowanje dowolene. Někotre kubłanišća skazaja sej profesionelnych fotografow. Tež w tym padźe, a wosebje hdyž maja so fota abo zwuki šulerjow na šulskej webstronje wozjewić, trjeba kubłanišćo dowolnosć staršeju. Młodostni wot 14 lět móža w Sakskej, maja-li dohlad, sami wo wšěm tym rozsudźić.

Sakski kultusowy minister Conrad Clemens­ (CDU) rěči jutře dopołdnja w Drježdźanach wo přihotach na šulske lěto 2025/2026. Tež we Łužicy so ludźo prašeja, kelko wučerjow budźe pobrachować.

Nawodnistwa gymnazijow w Sakskej su zašłe šulske lěto 2024/25 wšo dohromady 277 „wosebitych podawkow“ přizjewili. Něhdźe 50 razow bě to hroženje z bombu abo nadpadom.

Drježdźany/Budyšin (SN/mb). Jeničce póndźelu poslednjeho tydźenja lětušeho róžownika dožiwi 16 gymnazijow po cyłej Sakskej tajke hroženje. To wuchadźa z lisćiny, kotruž je kultusowe ministerstwo wotmołwje kubłanskopolitiskej rěčnicy frakcije AfD w Sakskim krajnym sejmje Romy Penz připołožiło. Kaž hižo nastupajo tajke podawki na wyšich a zakładnych šulach (SN rozprawjachu) njejsu prašenje za staćanstwom wobdźělenych šulerjow a konsekwencami ze stron šulow wotmołwili, dokelž by hewak jedyn połnje dźěłacy sobudźěłaćer ministerstwa znajmjeńša tři njedźele z rešeršemi zaběrany był.