Chrósćicy (SN/MG). Wjacezaměrowa hala „Jednota“ je była połna wobsadźena ze staršimi, přiwuznymi, přećelemi lětušich maturantkow a maturantow Budyskeho Serbskeho gymnazija (SGB). Napjatosć w rumje bě přewšo prezentna a jako zaćahnu chowancy gymnazija do hale, bě ta abo tamna sylza we wočomaj přitomnych wuhladać. 1. serbska kulturna brigada wotewri swjatočnosć ze kruchomaj z oratorija „Hrodźišćo“. Po spěwanju młodych wuměłcow, powita šulski nawoda René Wjacławk wšěch přitomnycho.