Budyšin (SN/MiP). Za šulerjow 7. lětnika Budyskeho Serbskeho gymnazija běše wutora wosebity dźeń, wšako njemějachu regularnu wučbu. Město toho je Sakska centrala za přetrjebarjow (VZS) z nimi zakónčacy dźeń zhromadneho projekta pod hesłom „Naslědne zežiwjenje“ přewjedła. Na dohromady třoch dnjach w běhu šulskeho lěta su šulerjo w dźě­łarničkach na tutej temje hižo dźěłali. ­Budyski Serbski gymnazij słuša nětko k třom modelowym šulam za naslědne zežiwjenje w Sakskej. Kubłanske dźěło VZS je wažny wobstatk cyłkowneje Sakskeje strategije za kubłanje w zmysle naslědnosće.

„Čehodla jěmy, štož jěmy – štó abo što nas wobwliwuje? Zežiwidła we wotpadkach – kak to wobeńdu? Što słuša scyła k strowemu zežiwjenju? – W projekće smy ze šulerjemi za wotmołwami na tajke a dalše prašenja pytali a je tež namakali“, praj nam Silvia Melde, zežiwjenska poradźowarka Wojerowskeje filiale VZS. Wona je projekt na Serbskim gymnaziju zahibnyła a chwali spěšnu zwólniwosć a wulku podpěru zamołwitych šule. „To njeje samozrozumliwe! Na druhich šulach to hinak dožiwjam“, wona doda.