Kurs w hladanju sadowcow
Zhorjelc/Wostrowc. Sakska krajna załožba za přirodu a wobswět (LaNU) poskićuje tež lětsa zaso kursy w hladanju sadowcow z certifikatom. Z tym zmóžnja wona mnohim wobsedźerjam a wužiwarjam sadowych łukow přistup k spěchowanskim srědkam. Přichodny kurs započnje so njedźelu, 2. měrca, we Wostrowcu w kooperaciji z Integraciskim poradźowanskim centrumom (IBZ) Marijiny doł. 120-hodźinski kurs kónči so 22. nowembra. Jenož mało městnow je hišće swobodnych. Přizjewjenski formular a nadrobniše informacije nadeńdu zajimcy na internetnej stronje .
Swójsku pěseń skomponować
Škotowarka dobyła
Lejno. Z 2 764 dypkami je Sonja Krječmarjowa lětuši prěni škotowy turněr serbskich seniorow dobyła, kotryž su wčera popołdnju w Lejnjanskim Kubicec hosćencu přewjedli. Započatk bě w 14 hodź. Druhe městno wubědźi sej Wolfgang Klein z 2 729 dypkami a třeće Manfred Hörauf z 2 500 dypkami. Dohromady je so 25 škotowarjow a jedna škotowarka na wubědźowanju wobdźěliło. Mjez nimi běchu nowačkojo Měrćin Nowak, Achim Lukaš a Christian Čornak. Přichodny turněr serbskich škotowarjow budźe 25. februara w piwowej stwičce Karstena w Pančicach-Kukowje.
Intrigi we Vatikanje
Budyšin. Kino w Budyskim Kamjentnym domje pokazaja dźensa w 20 hodź. dramu „Konklave“ režisera Edwarda Bergera. Předłoha za film je wuspěšny roman Roberta Harrisa. Film tematizuje intrigi a boje wo móc w zwisku z wólbami noweho bamža. Hłownu rólu kardinala Lawrenca hraje znaty dźiwadźelnik Ralph Fiennes. Zastup płaći 7 eurow.
Na wjedźenje a rozmołwu
Budyšin. Serbski muzej w Budyšinje přeprošuje srjedu, 29. januara, wšitkich zajimowanych na kuratorske wjedźenje po wustajeńcy „Wěčne pućowanje. Barba a słowo w twórbje ukrainskeho wuměłca Andrija Sharana“. We 18 hodź. slěduje podijowa rozmołwa z Benediktom Dyrlichom a prof. Dietrichom Šołtu pod hesłom „Stawizny přećelstwa: Serbja a Ukrainjenjo“. Wonaj zaběrataj so z kulturnymi a literarnymi zwiskami mjez krajomaj.
Na slědach Serbow
Zły Komorow. Šula za delnjoserbsku rěč a kulturu zahaji w Złym Komorowje štwórtk, 30. januara, w 17 hodź. swój lětuši rjad přednoškow we wobydlerskim domje Serbska cyrkej. Referent dr. Pětš Šurman rozprawja w swojim přednošku wo swojich slědźenjach w zwisku ze serbskimi stawiznami Złeho Komorowa. Mjez druhim zaběra so z prašenjom, kak je so serbske žiwjenje wot časa reformacije w regionje wuwiło, kotryž je přez lětstotki pod sakskim knjejstwom stał a wot lěta 1816/18 pruskej Braniborskej přisłušał. Zamołwići proša wo přizjewjenje pod čisłom 0355 792829.
Wotewru swoju dźěłarnju
Seniorojo škotuja
Zapósłanča na rozmołwje
Projektowy chór zwučuje
Radźićeljo wuradźuja
Róžant. Z poslednimi dźěłami za nowu Ralbičansku pěstowarnju zaběraja so čłonojo gmejnskeje rady Ralbicy-Róžant na swojim posedźenju jutře, štwórtk, we 18.30 hodź. w Róžeńčanskej gmejnskej sydarni. Tónraz wuradźuja wo rjedźenju twarskeho objekta. Dale wobjednawaja přidatne dźěła při asfaltowanju Křižerskeho puća w Konjecach. A skónčnje zaběraja so delanscy radźićeljo z nowymi wuměnjenjemi za kredit.
Awtorka čita w Drježdźanach
Drježdźany. Na čitanje z Lubinu Hajduk-Veljkowićowej přeprošuje serbsko-němski dźěćacy kružk w Drježdźanach. Zarjadowanje budźe sobotu, 25. januara, w 15 hodź. w rumnosćach Freiraum na Borsbergowej 25 w Štrěžinje. Awtorka čita ze swojeje knihi „Mała wjera“. Nimo toho změja tam zabawu za mjeńše dźěći spřihotowanu. Zdobom chcedźa z hudźbu, kofejom a pječenymi srokami zhromadnje ptači kwas swjećić. Wopytowarjo móža tuž rady jako ptački předrasćeni přińć a instrumenty sobu přinjesć.
Předstaja nowu knihu
Slepo. Drasta Slepjanskich Serbow, kotruž nošachu něhdy na křćiznach, steji w srjedźišću noweje knihi „Gładźarnica“. Ju předstaji towarstwo Kólesko srjedu, 22. januara, w 17 hodź. w Slepjanskej cyrkwi. Lawdaciju změje dr. Justyna Michniuk. Spěwna skupina towarstwa Kólesko zarjadowanje hudźbnje wobrubi. Wšitcy zajimcy su wutrobnje přeprošeni.
Radźićeljo wuradźuja
Njebjelčicy. Přichodne posedźenje Njebjelčanskeje gmejnskeje rady wotměje so jutře, srjedu, w 19 hodź. w sydarni gmejnskeho zarjadnistwa w Njebjelčicach. Mjez druhim póńdźe wo twarski plan w Pěskecach.
Putnikować po domiznje
Chrósćicy. Dźiwadźelnikaj Sylvia Burza a Matthias Greupner z Lubnjowa a Choćebuza staj hižo loni we wobłuku Kulturneje zymy w Chrósćicach wo Jakubowym puću rozprawjałoj. Tehdy wopytowarjo zhonichu, kak dožiwištaj putnikowanje mjez Zhorjelcom a španiskim Santiago de Compostela. Tola pućowanje wobeju putnikow je wosrjedź puća tež hišće raz do cyle hinašeho směra wjedło. Při tym dźěše hišće raz wróćo do domizny, přetož Sylvia Burza a Matthias Greupner staj tež po Via Baltica w sewjeru republiki nóžkowałoj. Za jutře, sobotu, staj wo putniskej čarje, kotraž je hišće nimale njeznata, wobrazy a lóštne stawiznički sobu přinjesłoj. Tak sćěhujće tola dalši raz łužiskemu putniskemu porikej na jeho Jakubowym puću. Wječor započnje so w 19.45 hodź. Hižo do toho so w 16 hodź serbske dźěćace kino poskićuje. Tónraz pokaza so film „Mała wjera“.
Zahraje na pišćelach
Počesća Jakuba Skalu
Budyšin. Towarstwo Cyrila a Metoda, Maćica Serbska a Budyska wosada přeprošuja wutrobnje na wosebity nyšpor njedźelu, 19. januara, w 14 hodź. składnostnje 100. posmjertnin něhdyšeho kanonika Budyskeho tachantstwa a předsydy Maćicy Serbskeje Jakuba Skale, do Budyskeje tachantskeje cyrkwje. Po krótkim počesćenju při jeho rowje na Mikławšku přizamknje so bjesada z kofejom na Budyskej farje.
Na nowolětne přijeće
Wojerecy. Swobodne wolerske zjednoćenstwo Měšćanski přichod Wojerecy přeprošuje wšitkich wobydlerjow na nowolětne přijeće sobotu, 18. januara, wot 8 do 12 hodź. na Wojerowske Łužiske naměsto. Zajimcy móža so tam wo aktualnych temach a ćežišćach zjednoćenstwa informować a so z jeho čłonami rozmołwjeć. Wo napoje su so postarali.
Rěčna hodźina zapósłanče
