Chrósćicy. Swoje wuměnkarki a swojich wuměnkarjow přeprošuje Chróšćanska gmejna na adwentničku srjedu, 7. decembra, w 15 hodź. do wjacezaměroweje hale Jednota. Dla organizatoriskich přičin proša wo přizjewjenje na gmejnje hač do 1. decembra pod telefonowym čisłom 035796/ 96 210 abo přez mejlku na adresu .

Radźićeljo wuradźuja

Worklecy. Wustawki wo wotrunanju čestnohamtskeho dźěła we Worklečanskej gmejnje budu jedna z temow přichodneho posedźenja Worklečanskeje gmejnskeje rady štwórtk, 1. decembra, w 19 hodź. w tamnišej šuli. Dale póńdźe wo wohnjowu alarmowu připrawu za Worklečansku pěstowarnju „K wódnemu mužej“ a wo nadawk za wobstaranje drasty a wuhotowanja za gmejnsku wohnjowu woboru.

Budyšin. Na adwentnych sobotach budźe Serbska kulturna informacija přidatnje wot 10 do 15 hodź. wotewrjena a skića kóždu sobotu wosebite zarjadowanja. Tak přewjedu tam jutře dźěłarničku debjenja hodownych kulow. Na dalšich sobotach zhotowjeja tykački, podadźa so na slědy Serbow w Budyšinje a zhotowjeja šćěpjelowe taflički z wosobinskimi motiwami. Přizjewjenja přijimuja pod telefonowym čisłom 03591 42105.

Wuhotuja adwentne wiki

Ćisk. Zhromadne adwentne wiki wuhotuja Ćišćanske towarstwa jutře, sobotu, wot 14 do 19 hodź. na tamnišej nawsy. Wohnjowi wobornicy staraja so wo lěhwowy woheń a dźěćace towarstwo organizuje pječenje chlěba na kiju. Młodźina poskićuje pražene kołbaski, kulturne towarstwo pak plincy, kofej a tykanc. Horce wino dóstanu wopytowarjo při stejnišću rejwanskeje skupiny. Na Ćišćanskim ­statoku předawaja plećene, drjewowe a keramiske wudźěłki kaž tež tajke z Rudnych horin. W 17.30 hodź. wočakuja rumpodicha, z kotrymž chcedźa sej zhromadnje zaspěwać.

Spěwaja do adwenta

Choćebuz. Zymskim wjeselam wěnuje so nowa wosebita wustajeńca, kotruž jutře, pjatk, w 17 hodź. w Choćebuskim Serbskim muzeju wotewru. W přehladce předstajeja zymske zaběry runje tak kaž najwšelakoriše nałožki w tym času. Zymske wjesela započnu so w serbskej Delnjej Łužicy ze wšelakimi nałožkami kónc nowembra a spočatk decembra, přiměrja so křesćanskemu hodownemu swjedźenjej a traja hač do februara. Wjerški kaž Janšojski bog, pječenje nowolětkow, woklapnica, ptači kwas a zapust z camprowanjom a swjedźenskim ćahom po wsy su so hač do dźensnišeho zachowali. W rozdźělnych regionach maja swójske wašnja, kak tute nałožki přewjedu. Wo tym swědča w přehladce wustajene objekty a wuměłske twórby. Filmowe přinoški dokumentuja hajenje nałožkow w nowšim času. W adwentnych powědančkach za małych a wjetšich připosłucharjow zhonja wopytowarjo wosebiteje wustajeńcy wo móžnych a njemóžnych podawkach a hodownej stwě. Přehladka je přistupna hač do 26. februara 2023.

Chrósćicy. Za adwentnu kubłansku jězbu župy „Michał Hórnik“ sobotu, 26. nowembra, do Błótow su krótkodobnje hišće swobodne městna. Wotjězd je planowany w 10 hodź. při Chróšćanskej Jednoće. Wobdźělnicy wopytaja mjez druhim hodowne wiki w Lubnjowje a podadźa so wottam z čołmom na Lědy. Wotjězd w Lubnjowje budźe w 17 hodź., wječer we 18.30 hodź. w Klóšterskej Nowej Wsy. Bus nawróći so w 21 hodź do Chrósćic. Jězba płaći na wosobu 15 eurow. Swoje zastaranje płaći kóždy wobdźělnik sam. Zajimcy njech přizjewja so e-mailnje pod abo pod telefonowym čisłom 0174 301 02 00.

Radźićeljo wuradźuja

Lejno. Zdźěłanje twarskeho plana za wjacore ležownosće w Časecach budu jedna z temow přichodneho posedźenja gmejnskeje rady Pančicy-Kukow jutře, štwórtk, w 19 hodź. w Lejnjanskim hosćencu. Dale porěča radźićeljo wo nakupje zamkoweje připrawy za serbsku zakładnu Šulu Ćišinskeho. Wobydlerjo su wutrobnje přeprošeni.