Radźićeljo wuradźuja

Mittwoch, 27. April 2022 geschrieben von:

Róžant. Přichodne posedźenje gmejnskeje rady Ralbicy-Róžant wotměje so jutře, štwórtk, we 18.30 hodź. w Róžeńčanskim gmejnskim zarjadnistwje. Mjez druhim zaběraja so radźićeljo z hospodarskim planom za lěto 2022. Nimo toho steja dodatne wustawki „Konjecy – zapadny dźěl“ na dnjowym porjedźe posedźenja.

Njebjelčicy. Tohorunja jutře, ale hakle w 19.30 hodź. zetkaja so čłonojo Njebjelčanskeje gmejnskeje rady k swojemu wuradźowanju w gmejnskim zarjadnistwje. Woni rozjimaja mjez druhim Leaderowu wuwićowu strategiju za dobu wot 2023 do 2027 a wotzamknu wotnajenske zrěčenje za solarnu připrawu. Nimo toho wobjednaja Njebjelčanscy radźićeljo tež swój hospodarski plan za 2022. Na wobě posedźeni su zajimcy witani.

Fit w starobje

Piwo w srjedźišću

Dienstag, 26. April 2022 geschrieben von:

Wojerecy. Składnostnje dnja němskeho piwa přeprošuje Wojerowska dźěćaca a młodźinska farma jutře, srjedu, w 19 hodź. na dalše zarjadowanje w rjedźe „Zetkanišćo strowe zežiwjenje“. W srjedźišću maja regionalne piwowe speciality stać. Tobias Frenzel z Budyskeje piwoweje manufaktury poda dohlad do produkcije wšelakich družin piwa. Kuchar Ramnowskeho barokneho hrodu Axel Göber rozłoži pokiwy, kak móžež piwo w kuchni sobu wužiwać. Wobdźělenje płaći dźewjeć eurow na wosobu. Zajimcy ­njech přizjewja so pod telefonowym čisłom 03571/ 979 164.

B 96 nětko zawrjena

Wulke Ždźary. Znajmjeńša hač do 16. julija wostanje zwjazkowa dróha B 96 we Wulkich Ždźarach dospołnje zawrjena. Tam zwoprawdźeja prěnjej twarskej wot­rězkaj wopłóčkoweje syće. Nimo toho kładźe Kamjenska EWAG nowe wodowody. Łazowska gmejna wutwari w tym zwisku busowej čakarni.

Sport za žony

Zahaja předpředań

Freitag, 22. April 2022 geschrieben von:

Budyšin. Za lětuše 26. Budyske lětnje dźiwadło započnje so jutře, sobotu, w 11 hodź. předpředań zastupnych lisćikow při dźiwadłowej kasy na Seminarskej. Hižo krótko do toho pokazaja prěnje sceniske a hudźbne zaćišće z hry „Sherlock Holmes a Budyska bestija“. Předstajenja pokazaja wot 23. junija hač do 31. julija stajnje wot srjedy hač do njedźele. Přeco wutoru wječor wotměja so w tym času Budyske filmowe nocy.

Dialogowe pućowanje

Njebjelčicy. Drježdźanske towarstwo Kultur aktiv, towarstwo Kamjenjak kaž tež akterojo z regiona a Njebjelčanskeje gmejny přeprošuja jutře, sobotu, na dialogowe pućowanje pod hesłom „Łamki a mosty“ do Njebjelčic. Započatk budźe w 15 hodź. na parkowanišću při gmejnskim centrumje. Čara powjedźe k Miłočanskej žabje, k Miłočanskej skale a skónči so w Miłoćicach pola Neumannec. Tam poskićuja zakuski, film a móžnosće k rozmołwje.

Na adresu njezabyć!

Zaběraja so ze zelemi

Donnerstag, 21. April 2022 geschrieben von:

Smjerdźaca. Pod nawodom pedagogowki za hojenske rostliny a zela Reginy Krawcoweje poskićitej Serbske šulske towarstwo a Kubłanske srjedźišćo LIPA zelowe wuchodźowanja kołowokoło Smjerdźaceje, Łazka, Róžanta a Smječkec. Při tym sposrědkuja přehlad wo domizniskich hojenskich rostlinach a zelach, jich skutkowanju a móžnosćach wužiwanja. Prěnje terminy su 28. apryla w Smjerdźacej, 19. meje we Łazku a 23. junija w Smječkecach. Poskitk wotměje so stajnje wot 17 do 19 hodź. Dalše terminy sćěhuja. Přizjewjenja přijimuja hač do 27. apryla e-mailnje pod abo pod telefonowym čisłom 0172 7811959. Wobdźělenje na wuchodźowanju płaći wosom eurow.

Startuja do sezony

Dźensa a jutře „Zynki a linki“

Mittwoch, 20. April 2022 geschrieben von:

Njebjelčicy. Hudźbno-literarny wječor z Madlenku Šołćic wotměje so dźensa w 19 hodź. w Njebjelčanskej „Bjesadźe“. Dramaturgowka a zastupjerka intendanta za serbske dźiwadło při Němsko-Serbskim ludowym dźiwadle Madlenka Šołćic čita ze spisowaćelskeho tworjenja ­patera Romualda Domaški (1869-1945) štyri humoristiske powědančka. Wone satiriske skicy słušeja do jeho najza­jimawšich wuměłskich wupłodow. Dujerski kwintet SLA wobrubi literarne čitanje z wubranymi hudźbnymi kruchami z pjera Kurta Mederacke. Publikum smě so tuž na zabawjacy wječork wjeselić. Zarjadowanje wospjetuje so jutře, štwórtk, w 19.30 hodź. na Ralbičanskim Radlubinje.

Přewjedu „rěčnu swětłownju“

Ze swójbu do zahrody

Dienstag, 19. April 2022 geschrieben von:
Pančicy-Kukow. Na swójbny dožiwjenski dźeń přeprošuja jutře, srjedu, do klóštra Marijineje hwězdy w Pančicach-Kukowje. Wot 14 do 18 hodź. změja tam poskitki k sobučinjenju a přihladowanju. Tak powjedu sotry zajimcow po klóštrje, dźěći budu ponyje, wowcy a wowčerske psy pomajkać a schowane překwapjenki jutrowneho zajaca pytać móc. Wo hudźbne wobrubjenje postarataj so „Leichtfuß und Liederliesel“. Zastup płaći za dorosćenych tři eura, za dźěći hač do 16 lět ­jedyn euro.

Wobydlerjo wothłosuja

Donnerstag, 14. April 2022 geschrieben von:

Wojerecy. W měsće a měšćanskich dźělach Wojerec móža wobydlerki a woby­dlerjo wot minjeneje wutory wo lětušim wobydlerskim etaće wothłosować. Kóždy ma tři hłosy, kiž móže swobodnje na ­zapodate namjety rozdźělić. Dohromady je 137 namjetow dóšło. Ludźo přeja sej na přikład ponowjenje hrajkanišćow a chódnikow, nastajenje ławkow a sadźenje štomow. W Němcach je jedyn z namjetow, zo měli statoki srjedź wsy tafle z mjenami něhdyšich wobsedźerjow ­dóstać.

Ze swójbu do parka

Wochozy. Na swój tradicionalny swójbny dźeń přeprošuje jutrownu póndźelu Wochožanski park błudźenkow. Na wopytowarjow čaka wot 11 hodź. hudźbny program. Wot 13.30 hodź. zahraje Orchester łužiska brunica. Swójby budu cyły dźeń z konjacym zapřahom po parku jězdźić móc. Jutrowny zajac chce rano zahe swoje překwapjenki schować, za kotrymiž móža dźěći w běhu dnja pytać.

Kupjel zaso wotewrjena

Mittwoch, 13. April 2022 geschrieben von:
Kamjenc. Kamjenska kupjel je po dlěšim zawrjenju nětko zaso za wšitkich zajimcow wotewrjena. Tež w jutrownych prózdninach móža so tam zajimcy zabawjeć a płuwać. Za to su wosebite časy wotewrjenja předwidźane a to wutoru, štwórtk a pjatk stajnje wot 6.15 do 7.30 hodź. a wot 9 do 22 hodź., srjedu wot 9 do 20 hodź., sobotu a njedźelu wot 9 do 18 hodź. Jutrownu njedźelu je kupjel zawrjena runje tak kaž sawna. Na swjatych dnjach pak móža so zajimcy w njej poćić a to w zwučenych wotewrjenskich časach.

Wulki zajim žurnalistow

Dienstag, 12. April 2022 geschrieben von:

Budyšin. Narodne zetkanje pućowanskich žurnalistow je wunjesło, zo běše we wo­błuku jězby po Sakskej, jězba do Budyšina najpožadaniša. Poskitk bě 8. apryla pjeć žurnalistow a žurnalistkow do sprjewineho města přiwabiło, zdźěli Budyske měšćanske zarjadnistwo. Tura po Hornjej Łužicy a z tym tež po Budyšinje steješe pod hesłom „Hwězdy a spirituelne městnosće podłu Via Sacry“. Nastork za tule temu­ su podawki składnostnje 300lětneho wobstaća Ochranowa a 125 lět Ochranowskeje hwězdy. Wyši měšćanosta Alexander Ahrens (SPD) je hosći postrowił.

Wobnowja dróhu

Chrósćicy. Šoferojo, kotřiž časćišo tak mjenowany „serbski highway“ z Chrósćic do Nowoslic wužiwaja, maja so přichodny tydźeń na poćeženja nastajić. Kaž krajnoradny zarjad zdźěli ponowja na S 101 mjez Chrósćicami a Hrańcu wot 19. do 22. apryla asfalt. Wot wotbóčki do Noweje Wjeski hač do Chrósćic budźe puć dospołnje zawrjeny. Wobjězdka powjedźe přez Nowu Wjesku, Worklecy, Wu­dwor a Kozarcy do Chrósćic.

Hałzy wotedać

Donnerstag, 07. April 2022 geschrieben von:

Njebjelčicy. Zo njebychu hromady chodojtypalenja lětsa přewulke byli, poskićuje Njebjelčanska gmejna zaso wosebity serwis. Wobydlerjo móža swoje wurězane hałzy z přeměrom hač do dźesać centimetrow sobotu, 9. apryla, wot 9 do 15 hodź. na dwór komunalneho twarskeho zawoda přiwjezć. Tam je roztřěskaja a za komunalne zaměry dale wužiwaja.

Poradźuje darmotnje

Budyšin. Prawiznik Hajko Kozel poskići póndźelu, 11. apryla, wot 15 do 16.30 hodź. dalši raz darmotne socialne poradźowanje. Tematiskej ćežišći budźetej aktualne dźěło- a socialnoprawniske wuskutki koronapandemije. Tola tež dalšim wobłukam chce so Kozel wěnować, maja-li zajimcy hinaše prašenja. Poradźowanje hodźi so tohorunja w ruskej a ukrainskej rěči přewjesć a wotměje so we wobydlerskim běrowje Lěwicy na Šulerskej w Budyšinje. Zajimcy njech přizjewja ­so pod telefonowym čisłom 035932/ 363727.

Serbska debata

Neuheiten LND