Wo starym šulstwje
Njeswačidło. „Šulstwo Njeswačanskeje wosady po reformaciji hač do lěta 1945“ rěka nowa wosebita wustajeńca w tamnišim domizniskim muzeju, kotraž so njedźelu w 14 hodź. wotewrje. Handrij Wirth je přehladku wo stawiznach štyrjoch šulow we wosadźe zestajał z wjele dokumentami, wučbnicami a zajimawymi podawkami w tutych kubłanišćach. W Njeswačanskej wosadźe běchu něhdy cyrkwinska šula w Njeswačidle, dalše šule w Bóšicach, w Zarěču a we Łuze.
Do přirodowědneje stacije
Bjedrichecy. Biosferowy rezerwat Hornjołužiska hola a haty přeprošuje njedźelu, 14. julija, na lěćny swjedźeń do Bjedrichec. Při přirodoškitnej staciji wobsteji wot 15 do 19 hodźin składnosć so informować a mnohe poskitki wužiwać. Lětuši swjedźeń steji pod hesłom ratarstwo. Wustajeńca pokaza ratarske nastroje. Wopytowarjo dožiwja na ležownosći žně. Fotowa wustajeńca wěnuje so stawizniskim stacijam Bjedrichec. Dźěći zabawja so při klankodźiwadle a při paslenju.
Swětło a čas zeznać
Pytaja kralownu žonopa
Budyšin. Žonop a Budyšin – to prosće hromadźe słuša! Za Tydźenje žonopa, kotrež so lětsa wot 6. awgusta do 1. septembra wotměwaja, pyta město Budyšin kralownu žonopa. Hač dosrjedź awgusta njech so zajimowane žony w starobje wot 18 lět pola měšćanskeho zarjada wo čestne zastojnstwo přizjewja. Kotru požadarku na kóncu „krónuja“, rozsudźi wosebita jury. Kralowna žonopa wustupi na wosebitych zarjadowanjach w měsće. W krónowanskej ceremoniji dóstanje wona ekstra zhotowjeny šat z modoweho studija e.elle, w ručnym dźěle zhotowjeny diadem kaž tež wušiwanu šerpu. „Doba zastojnstwa“ kralowny traje dwě lěće.
Hudźbna dźěłarnička
Kickerowy turněr a hiphop
Budyšin. Towarstwo Dźěłań dźeń wuhotuje sobotu, 13. julija, kickerowy turněr w swojej „dobrej jstwě“ na Sukelnskej. Wot 14 hodź. wuhraje so 2. Rabatz-cup, a to po modusu DYP. Skrótšenka steji za „Draw your partner“, mustwa so potajkim za kóždu hru algoritmisce po principje připada znowa zestajeja. Dočasne přizjewjenje trěbne njeje, startowy pjenjez sej nježadaja. Po finalu chce Choćebuski rapper STOI hosći z delnjoserbskim a němskim hiphopom zahorić. Koncert ma so po planje něhdźe w 21 hodź. započinać. Zastup je darmotny.
Předstaja wuměłske rjemjesło
Njeswačidło. Sobotu a njedźelu, 13. a 14. julija, stajnje wot 10 do 18 hodź. wotměwaja so w Njeswačanskim hrodowym parku rjemjeslniske wiki. Na nje přichwataja wustajerjo z Łužicy a cyłeje Němskeje.
Wurjedźa „bydlensku stwu“
Kamjenc. Něhdźe 250 čitarjow wšědnje Měšćansku biblioteku G. E. Lessinga w Kamjencu wopytuje. Zo by jim dołho hišće nanajlěpše wuměnjenja poskićić móhła, dyrbi so „bydlenska stwa“ města dokładnje wurjedźić. Tuž wostanje wona póndźelu, 22. julija, zawrjena.
Wodźenja w čěšćinje
Wojerecy. Měšćanski muzej a hród Wojerecy poskića zajimcam štwórtk, 11. julija, w 11 a 13 hodź. wodźeni po wustajenišću w čěšćinje. Nimo regularneho zastupa sej přidatny popłatk nježadaja. Dźeń pozdźišo slědujetej w 11 a 13 hodź. – tohorunja w čěšćinje – wodźeni po bywšim lěhwje wójnskich jatych w Narću. Popłatk na wosobu wučinja 5 eurow resp. potuńšeny 3 eura. Přizjewjenja su pak telefonisce pod čo. 03571-20937504 pak z mejlku na móžne.
Wopominaja Kaeublera
Budyšin. Składnostnje 100. posmjertnin zasłužbneho něhdyšeho Budyskeho wyšeho měšćanosty dr. jur. Konrada Johannesa Kaeublera přeproša Muzej Budyšin štwórtk, 11. julija, na wopomnjenske zarjadowanje. W 19 hodź. přednošuje Eveline Günther wo „wusahowacym žiwjenskim skutku Kaeublera, kotremuž mamy so na přikład za twar Mosta měra a dźensnišeho krajnoradneho zarjada dźakować“. Nimo toho chce wobydlerska iniciatiwa Die Eumeniden wo žiwjenju Kaeublera informować. Zastup je darmotny.
Štyri filmy při Sprjewi
Budyšin. Towarstwo Kamjentny dom pokročuje wot srjedy, 10. julija, ze swojim rjadom předstajenjow filmow „Kino při Sprjewinym kole“ pod hołym njebjom. Na arealu bywšeho woclo- a sudobjotwarstwa na Sprjewinej pokazaja w tydźenskim rytmusu paski „ručež je ćma dosć“. Prěni film budźe wulce wuznamjenjena produkcija „Barbie“ režiserki Grety Gerwig. Slěduja tragikomedija „Es sind die kleinen Dinge“, drama „Eine Million Minuten“ a komedija „Enkel für Fortgeschrittene“. Zastup płaći 8 eurow.
Hobby njehladajo na starobu
Kamjenc. Muzej zapadneje Łužicy w Kamjencu prezentuje we wobłuku swojeje aktualneje wosebiteje wustajeńcy „Dźiwje pazoraki Němskeje“ fachowy přednošk „Greifvogelfotografie bis ins hohe Alter – Nur die Verstecke ändern sich“. Wutoru, 9. julija w 19 hodź, chce Friedhelm Richter zajimcam rozłožić, kak „lajscy fotografojo přirody swój hobby tež we wysokej starobje pěstować móža, byrnjež hižo po štomach a skaliskach krosnować njemóhli“. Přednošk wotměje so w Elementarijumje. Zastup płaći 3 eura, potuńšeny 2 euraj.
Wuhladko přesunjene
Budyšin. Přichodne wusyłanje Wuhladka w telewiziji MDR so wo tydźeń přesunje – a to na sobotu, 13. julija. W 11.45 hodź. chcedźa potom połhodźinsku reportažu wo Europeadźe w namjeznej němsko-danskej kónčinje pokazać a „mjezynarodny sportowy wjeršk mjez morjomaj“ wuhódnoćić.
Na swójske dobro filmy hladać
Wudwor. Dźěći ze staršimi su dźensa, pjatk, na dźěćace kino a praženu kołbasku do Krollec zahrodnistwa we Wudworju přeprošeni. Přičina krótkodobneho poskitka je crowdfunding-akcija na dobro dožiwjenskeje přestrjenje „Kobłarnja Wudwor“, kotraž ma tam jako městnosć zhromadnosće a kultury nastać. Pjenježne dary na městnje su witane. Tež na konto gmejny móža darićeljo pjenjezy přepokazać, za čož kwitowanku wupisanu dóstanu. W cyłku chcedźa Wudworčenjo 4 000 eurow nazběrać.
Folkrock pod lipu
Za camp so přizjewić
Tołmača z rukomaj
Budyšin. „Spuk unterm Riesenrad – Jetzt ist Bautzen dran“ pokaza Němsko-Serbske ludowe dźiwadło sobotu, 6. julija, w 21.30 hodź. z tołmačenjom za hłuchich a na słuch słabych wopytowarjow.
Na Gig-festiwal
Róžant. Lětuši „God is good (Gig)-festiwal“ wotměje so wot 5. do 7. julija w Róžeńće. Pjatk wječor budźe w 19 hodź. Boža mša w hnadownej cyrkwi. Na jewišću putniskeje łuki wustupi mjez druhim pólske duwo Koncert Dwa Serca. Sobotu přihotuja organizatorojo dźěłarnički a njedźelu dźěćacy swjedźeń.
Krimi we wobchodźe
Budyšin. We wobłuku rjadu „Literarna kofejownja“ čita zajutřišim, pjatk, we 18.30 hodź. Hrubjelčanski awtor Křesćan Krawc. W srjedźišću wječorka steji jeho němskorěčna kriminalka „Der Wassermannräuber“. Zastup je darmotny, ale proša wo pjenježny dar.
Dalši „Snobjed z kulturu“
Biskopicy. We wobłuku rjadu „Kultur.Frittag“ wuhotuje Biskopičanski Dom zetkawanja B28 kóždu prěnju njedźelu měsaca „Snobjed z kulturu – kultura k snobjedej“. Přichodne zarjadowanje zaha- ja 7. julija, w 10 hodź., wobmjezowaneho městna dla proša zarjadowarjo wo přizjewjenje, a to telefonisce pod čo. 03594 256 210 161 abo z mejlku na . Z trochu zbožom pak je brunch tež krótkodobnje přistupny. W 12 hodź. slěduje předstajenje klankoweho jewišća Hellwig z „Hru za wulkich“.
Kralownje zaklinčitej
Budyšin. We wobłuku rjadu Budyskeho pišćeloweho lěća přeproša Budyski cyrkwinskohudźbny skutk na dalši „koncert za dwoje pišćele“. Jutře, 3. julija, chcetaj tachantski kantor Kamil Maksymilian Kulawik na Kohlowych a cyrkwinskohudźbny direktor Michael Vetter na Eulowych pišćelach Budyskeje tachantskeje cyrkwje swj. Pětra připosłucharjow z rědkimi twórbami putać. Tydźeń pozdźišo koncertuje Tomaš Žur we wobłuku rjadu w Budyšinje. Koncertaj započnjetaj so wobě w 19.30 hodź., zastup je stajnje darmotny. Pjenježne dary pak so njewotpokazuja.
