Krawc čita w hospodźe
Chrósćicy. Na předwječoru štwórteho adwenta přeprošuje Chróšćanska putniska hospoda jutře, sobotu, w 19.45 hodź. w přitulnej atmosferje na měrny čitanski wječork z Křesćanom Krawcom z Hrubjelčic. Jedna z nowšich knihow spisowaćela je roman „Paradiz“ wo stawiznach serbskeje swójby přez tři generacije. Z njeje předstaji Krawc wosebje epizodźe „Gretcyne hody“ a „Serbski kwas“. Wšitcy lubowarjo serbskeje literatury su wutrobnje přeprošeni. Hižo w 16 hodź je dźěćace kino, pokaza so trikowy film.
Hrajki w muzeju widźeć
Njeswačidło. Wosebite wodźenje budźe njedźelu, 18. decembra, wot 13 hodź. po hodownej wustajeńcy w Njeswačanskim domizniskim muzeju. Tamnišu přehladku metalowych hrajkow jich zběraćel a wustajer Matthias Stein rozłoži a je tohorunja demonstruje. Tak budźe so hoberske koło runje tak wjerćeć kaž někotre dalše eksponaty. Přehladka je hač dosrjedź januara kóždu njedźelu wot 13 do 17 hodź. wotewrjena. Tež na hodownych a nowolětnych swjatych dnjach su wopytowarjo w muzeju witani, zdźěli Njeswačanske towarstwo přećelow domizny a kultury, kotrež so wo muzej stara.
Luhmann nowy změrc
Pančicy-Kukow. Nowy změrc (Friedensrichter) za pjeć gmejnow zarjadniskeho zwjazka Při Klóšterskej wodźe budźe wot 1. januara 2017 Eduard Luhmann ze Smjerdźaceje. 70lětny bě jako jenički za tele čestnohamtske zastojnstwo kandidował, a zhromadźizna zarjadniskeho zwjazka je jeho zawčerawšim wuzwoliła. Wólbna doba noweho změrca traje hač do kónca lěta 2021.
Z wjerchowku a dźěćatkom
Wojerecy. Hač do njedźele přeprošeja we Wojerecach na Teschenske wiki, kaž tam swoje dohodowne wiki mjenuja. Wjerchowka von Teschen, Wojerowske dźěćatko a rumpodich su je dźensa wotewrěli. Nimo mnohich předawanskich budkow a kulinariskich poskitkow maja tam tež wobšěrne kulturne zarjadowanja, kaž koncerty, kinowe předstajenja a klankodźiwadło. Tohorunja hač do njedźele, ale stajnje hakle wot 16 hodź. su na Wojerowskim hrodźe wosebite romantiske wiki rjemjesła, hdźež předstajeja so blidar, pčołarka, módroćišćerka a dalši.
Po Italskej putnikowałoj
Chrósćicy. Přichodne zarjadowanje w Chróšćanskej putniskej hospodźe budźe sobotu, 10. decembra, w 19.45 hodź. To rozprawjatej Elvira Juhl a Karina Städter z Lubija wo swojim putnikowanju po italskim putniskim puću Via Francigena z Mailanda do Roma. Po pjeć tydźenjach docpěštej wone Pětrowe naměsto z Pětrowej cyrkwju w Romje a dožiwištej tam nazajtra generalnu awdiencu z bamžom Franciskusom w prěnim rynku. Wo tym a dalšich dožiwjenjach chcetej zajutřišim powědać. Hižo w 16 hodź. budźe w hospodźe dźěćace kino z trikowym filmom.
Jutře na škot
Radwor. Lubowarjo škota njech njeskomdźa sej jutře wječor do Radworja dojěć. W tamnišim „Słodeńku“, bywšej wotnožce wokrjesneje lutowarnje, wuhotuje chór Meja adwentny škotowy turněr. Započatk budźe w 19.15 hodź. Wšitcy zajimcy su přeprošeni.
Jutře žane rěčne hodźiny
Pančicy-Kukow. Štóž ma přichodne dny něšto w přizjewjenskim zarjedźe zarjadniskeho zwjazka Při Klóšterskej wodźe wobstarać, njech wobkedźbuje, zo tam jutře, 6. decembra, žane rěčne hodźiny njezměja.
Wopyta pěstowarnje
Pančicy-Kukow (SN). Tradicionelnje zapósłanc Sakskeho krajneho sejma Alojs Mikławšk (CDU) dohodowny čas wužiwa, zo by pěstowarnje swojeho regiona wopytał. Tak so wón zdobom za dźěło a angažement kubłarkow dźakuje. Prěnja bě dźensa dopołdnja pěstowarnja w Pančicach-Kukowje w nošerstwje Křesćansko-socialneho kubłanskeho skutka. Tam přepoda wón wobrazowe ramiki z ćěsta, kotrež móža dźěći hodownje wupyšić. Za najkreatiwniši wobraz smědźa dźěći Zelnakec pjekarnju w Pančicach-Kukowje wopytać.
Wustaja kleplowane wobrazy
Chrósćicy. Přehladku kleplowanych wobrazow Weroniki Suchoweje ze Sćijec wotewru sobotu, 3. hodownika, w 19.45 hodź. w Chróšćanskej putniskej hospodźe. Ludowa wuměłča zaběra so z tymle trochu njewšědnym tworjenjom w kružku hižo dlěje hač 15 lět. Jeje najwoblubowaniše motiwy su figury kaž mać z dźěsćom, motiwy z přirody, ale tež rjany dekor k hodam a jutram. Kelko prócy za zhotowjenjom tči, chce Weronika Suchowa jutře wječor wosobinsce demonstrować. Hižo w 16 hodź. su dźěći jutře na serbske kino přeprošene.
Klankar předstaji słuchohru
Štó chcył hrajki darić?
Pančicy-Kukow. Na adwentnych wikach w klóšterskej bróžni w Pančicach-Kukowje 2. a 3. decembra chcedźa trjebane hrajki za dobry zaměr předawać. Štóž chce k tomu přinošować, móže hrajki wšědnje w dźěłarni za zbrašenych swj. Michała wotedać. Wunošk přepodadźa babje Christinje Pólkec, kotraž chce je klětu za šulu w afriskim Malawiju wužiwać. Po swojim dobrowólnym socialnym lěće 2012/13 w Malawiju chce Christina Pólkec klětu znowa w jednej z tamnišich chorownjow wupomhać. Kóždažkuli podpěra je tuž witana.
Poprjancy we wustajeńcy
Łaz. Lětuša hodowna wustajeńca we Łazowskim Domje Zejlerja a Smolerja wěnuje so Połčničanskim poprjancam. Wustajeńcu wotewru njedźelu, 27. nowembra, w 14.30 hodź., Zajimcy su wutrobnje witani. Přehladka znazornja stawizny poprjancow a demonstruje, kak so wone zhotowjeja. Nimo toho pokazaja wšelake nastroje, kotrež su za tele dźěło trěbne.
Předstaji knihu bratra
Wosadne popołdnjo
Bukecy (JKr/SN) Dwójce wob lěto přeprošuje superintendent Jan Malink Serbow Bukečanskeje a wokolnych wosadow na popołdnjo na wosadnej žurli w Bukecach. W srjedźišću zetkanja minjenu sobotu steješe pokutny dźeń a jeho wu- znam za křesćanow dźensa. Z dobrej tradiciju mjeztym je, zo ma na nazymskim zetkanju Arnd Zoba přinošk wo swojich pućowanjach přihotowany. Lětsa bě sej ze swojej mandźelskej do krajiny Wachau nad Dunajom, w kotrejž leži tež sławny klóšter Melk, wulećał. Z tójšto skutkownymi wobrazami a informacijemi wo stawiznach krajiny wědźeše wón znowa zajimawje rozprawjeć.
Berlinska finisaža
Swjeća prěni raz kermušku
Lipsk. Na swoju prěnju kermušku zetkaja so njedźelu, 13. nowembra, Lipšćanske serbske dźěći w starobje žłobika a pěstowarnje a jich starši w rumnosćach kreatiwneje dźěłarnički „Zwergpiraten“ na Konstantinowej 6. Wot 15 hodź. chcedźa tam zhromadnje spěwać a rejwać, krótke klankodźiwadło dožiwić a sej zhromadnu swačinu słodźeć dać. W tym zwisku skedźbnjeja zarjadowarjo hižo nětko na to, zo budźe lětuša zhromadna hodownička Lipšćanskich serbskich dźěći 3. adwenta.
Na popołdnjo a bjesadu
Bukecy. Na serbske wosadne popołdnjo ze superintendentom Janom Malinkom přeprošuje Bukečanska wosada jutře, sobotu, w 14.30 hodź. na wosadnu žurlu. Dale skedźbnjeja na přichodnu serbsku Bjesadu, kotraž wotměje so štwórtk, 17. nowembra, we 18.30 hodź. na Bukečanskej farje.
Do hornčernje pohladnyć
Bóšicy. Lubowarjo keramiki njeměli skomdźić sej do Bóščanskeje Barchmannec hornčernje dojěć, hdźež změja jutře a njedźelu stajnje wot 9 do 17 hodź. dźeń wotewrjenych duri. Tam móžeš sej wobhladać, kak z jednoreje hliny taler abo šalka nastawa, dźěći móža hornčerić a jedyn kruch sami pomolować. Nimo toho čaka na wopytowarjow we wobchodźe wobšěrny sortiment, tež hodowna keramika.
Dalše nazymske koncerty
Rogow/Worklecy/Budyšin. Skupina Přezpólni wuhotuje jutře, sobotu, w 19 hodź. nazymski koncert w Rogowje. Smjerdźečanska rejwanska skupina a folklorna skupina Sprjewjan chcetej ludźi njedźelu, 6. nowembra, we Worklečanskim hosćencu zawjeselić. Wot 14.30 hodź. poskića tam kofej a tykanc, program započnje so w 15.30 hodź. Samsnej cyłkaj wuhotujetej nazymski koncert sobotu, 12. nowembra, w 16.30 hodź. w Budyskim Serbskim domje. Za čłonow Budyskich Domowinskich skupin zapłaća zastup ze skupinskich pokładnjow.
Literatura a bjesada
Drjenow. Na literarnu kermušu přeprošuje Ludowe nakładnistwo Domowina njedźelu, 13. nowembra, w 15 hodź. do hosćenca „Hońtwjerski dwór“ w Drjenowje.
Wulět do stawiznow
Komorow (Hag/SN). Z mnohimi hosćimi zetkachu so čłonojo Domowinskeje skupiny Komorow-Trupin-Rakecy minjenu sobotu w młodźinskim klubje při Komorowskim sportnišću na přednošk dr. Lubiny Malinkoweje. Po zhromadnym kofeju porěča wona wo wuznamje a wuskutkach Ochranowskeho hibanja na Serbow a pokaza k tomu wobrazy. Po tym zo měješe Domowinska skupina loni skupinski wulět do Ochranowa a so hižo tam z tutym hibanjom zaběraše, běše přednošk Lubiny Malinkoweje wulět do stawiznow Serbow. Župa „Jan Arnošt Smoler“ je zarjadowanje spěchowała. Wosebje wjeselili so skupinarjo su, zo so Rakečanski wjesnjanosta Swen Nowotny, kiž w Komorowje bydli, ze swojej mandźelskej na zarjadowanju wobdźěli.
Hajnicy na nyšporu
