Wotewru wustajeńcu
Budyšin. „Wuměłstwo k zběranju a darowanju“ rěka nowa wustajeńca, kotruž wustaja wot 6. nowembra w galeriji Budyskeho wuměłskeho zwjazka na Hrodowskej 19. Na wotewrjenje w 19 hodź. su zajimcy wutrobnje witani. Wo hudźbne wobrubjenje postara so Uta Šwejdźic. Serbska spěwytwórča spěwa a hraje swójske kompozicije a ludowe pěsnje. Dale porěči Tanja Böhme. W přehladce zastupjeni budu mjez druhim Iris Brankačkowa, Isa Bryccyna, Maja Nagelowa a Borbora Wisnarjec.
Silwester w kubłanišću
Smochćicy. Kubłanišćo swjateho Bena w Smochćicach přeprošuje 31. decembra na silwesterski swjedźeń do tamnišeje bróžnje. W zabawnej atmosferje móža so hosćo ze starym lětom rozžohnować a nowe witać. Zastup płaći 69 eurow a za hosći, kiž přenocuja, 59 eurow. W płaćiznje zapřijate su napoj na spočatku, rustikalna wječer, nócny zakusk a škleńca sekta w połnocy. Přizjewjenja a skazanki za stwy přijimuja hač do 15. nowembra.
Čita wo Israelu
Zhromadnje spěwać
Budyšin. Zwjazk serbskich spěwarskich towarstwow přeproša na dalše zhromadne spěwanje, a to wutoru, 3. nowembra, we 18 hodź. w chórowej rumnosći Serbskeho ludoweho ansambla.
Wotewru nowu přehladku
Njeswačidło. W Njeswačanskim domizniskim muzeju wotewru njedźelu, 1. nowembra, popołdnju w 14 hodź. nowu wosebitu wustajeńcu. Wona je cyle ručnemu dźěłu wěnowana. Kružk žonow, kotrež tutón hobby lubuja a so w zymskich měsacach tydźensce zetkawaja, prezentuja swoje dźěła. Tež wudźěłki našich prjedownikow su we wustajeńcy widźeć. Team muzeja wjeseli so na wćipnych a zajimowanych wopytowarjow. Šalka kofeja hodźi so tohorunja woptać. Wosebita prezentacija je hač do kónca lěta přistupna.
Wuzwola noweho princa
Durje šule wotewrjene
Wječor žortneje literatury
Budyšin. Towarstwo Přećeljo Smolerjec kniharnje přeprošuje štwórtk, 29. oktobra, na literarny wječor pod hesłom „Haškec mać a pater Liborius“. Wot 19 hodź. předstaja čłonki a čłonojo towarstwa „šibałe powědki a wjesołe štučki, wupytane ze Serbskeje protyki, Šeršenja, z Paternostra a druhdźe“. Wo hudźbne wobrubjenje postara so Syman Hejduška. Zastup w Smolerjec kniharni je darmotny.
Předstaji kraje Azije
Pančicy-Kukow. Singapur, Malajzija a kupa Borneo steja w srjedźišću přichodneho přednoška Domowinskeje skupiny Pančicy-Kukow srjedu, 28. oktobra, w 19 hodź. w awli Šule Ćišinskeho. Čłon skupiny Andreas Hanuš rozprawja wo wulkich metropolach swěta, wo přirodowědnych zajimawosćach a wo rozdźělnych nabožinach w tutym dźělu Azije. Nimo skupinarjow su tež wšitcy dalši zajimcy wutrobnje přeprošeni. Na přednošku budźe mały wuběr napojow na předań.
Seniorojo škotuja
Radwor. Přichodny škotowy turněr serbskich seniorow wotměje so jutře, wutoru, na Radworskim Dwórnišću inkluzije. Započatk je w 14 hodź. Nowačkojo su kaž přeco wutrobnje witani. Dalši turněr budźe 24. nowembra na Wotrowskej starej šuli.
Radźićeljo wuradźuja
Malešecy. Přichodne posedźenje Malešanskeje gmejnskeje rady je jutře, wutoru, w 19 hodź. w towarstwowym domje na Malešanskej nawsy. Na dnjowym porjedźe steji mjez druhim naćiskowe planowanje za Malešansku zakładnu šulu. Dale chcedźa radźićeljo wo předani a nakupje wjacorych ležownosćow w Barće rozsudźić.
Njebjelčicy. Tohorunja jutře w 19 hodź. wuradźuje Njebjelčanska gmejnska rada w posedźenskej rumnosći gmejny. Tam zaběraja so najprjedy z wotličenjom lětow 2003 hač do 2007. Dale póńdźe mjez druhim wo njeplanowane wudawki kaž tež wo wobstaranje drasty a wuhotowanja za wohnjowych wobornikow.
Njeswačidło. Tež Njeswačanscy gmejnscy radźićeljo so jutře schadźuja, ale hižo wot 18.30 hodź. Woni porěča mjez druhim wo nowym koncesijnym zrěčenju za milinu a wo tym, štó ma hódnotu Njeswačanskeho byrgarskeho domu posudźować.
Dróhu w nowembrje dotwarja
Radwor. Twarnišćo na Dróze dr. Marje Grólmusec w Radworju ma kónc nowembra hotowe być. Na to dojednachu so zastupjerjo wokrjesa, gmejny a zaměroweho zwjazka za wopłóčki Mała Sprjewja na zašłym zhromadnym twarskim wuradźowanju. Kaž jednaćel zaměroweho zwjazka Swen Jatzke zdźěli, chcedźa dróhu wot 19. nowembra z poslednjej worštu asfalta pokryć. Po tym maja puć jenož hišće markěrować.
W bibliotece modele zhotowić
Wojerecy. Štóž rady modele łódźow, lětadłow abo awtow zhotowja, je jutře, sobotu, wot 10 do 13 hodź. na dźeń modelotwarstwa do Wojerowskeje měšćanskeje biblioteki „Brigitte Reimann“ přeprošeny. Tam móža zajimcy pod nawodom čłonow Wojerowskeho modelotwarskeho kluba jednore modele hromadźe stykać abo klasiske z lěpkom twarić. Nastaty model smědźa sej wopytowarjo sobu domoj wzać.
Předstaji kraje Azije
Dujerska hudźba zaklinči
Wopominaja Paula Gerhardta
Budyšin. Zjawny přednošk pod hesłom „Tapffre Leute soll man loben – Paul Gerhardt a jeho skutkowanje we Łužicy“ wotměje so jutře, srjedu, we 18 hodź. we wosadnicy Budyskeje ewangelskeje wosady swj. Pětra Při měšćanskim nasypje 12. Referentka budźe fararka a wyša konsistorialna radźićela na wuměnku Susanne Weichenhan z předsydstwa towarstwa Towaršnosć Paula Gerhardta. Wona porěči wo skutkowanju Paula Gerhardta (1607–1676) w Lubinje a tam tehdy zawjedźenych njepřećelskich naprawach přećiwo Serbam kaž tež wo přebasnjenju jeho tekstow do serbšćiny. Je to zhromadne zarjadowanje ewangelskeje wosady a Serbskeho instituta.
Za dźěłarničku so přizjewić
Wotewru wustajeńcu
Pančicy-Kukow. Pod hesłom „Zbrašenosć. Žana hranica! – Tysac lět nazhonjenjow – wot Hermanna chromeho hač do dźensnišeho“ přeprošuje wustajeńca w klóštrje Marijina hwězda w Pančicach-Kukowje, so z tutej temu zaběrać. Mjez druhim pokazaja w přehladce wideja staršich ze zbrašenym dźěsćom. Wotewru ju jutře, wutoru, w 19 hodź. w Čerwjenej žurli klóštra. Hač do njedźele, 3. nowembra, budźe wustajeńca w rumnosći mjez klóšterskim dworom a parkowanišćom přistupna. Zajimcy móžeja sej ju wšědnje wot 16 do 19 hodź. kaž tež po telefoniskim přizjewjenju wobhladać.
Maćična akademija přeprošuje
Budyšin. Měšćanska kniha Budyšina, do kotrejež je znata Budyska přisaha („byrger eydt wendisch“) zapisana, steji w srjedźišću přichodneho přednoška Maćičneje akademije jutře, wutoru, w 19 hodź. w Budyskim Serbskim domje. Referent Rico Heyl předstaji wobsah, nutřkowne struktury a tradiciski kontekst knihi kaž tež jeje měnjate stawizny. Zajimcy su wutrobnje witani.
Malinkowa dale w Slepom skutkuje
Slepo. Tež w lěće 2027 změja w Slepjanskej wosadźe dwurěčne nyšpory a nutrnosće, hačrunjež fararka Jadwiga Malinkowa wosadu wopušći. Na to skedźbnja predikant Manfred Hermaš. Malinkowa chce přiwšěm w Slepjanskej wosadźe dale skutkować. Tak planuja hižo nětko dwurěčne kemše na Šusterec statoku a 26. septembra 2027 wotměje so mjeztym hižo 20. dwurěčna nutrnosć na Njepilic statoku w Rownom. Za Manfreda Hermaša budźe to posledni nyšpor; jeho społnomócnjenje jako predikant je hač do oktobra 2027 wobmjezowane. Za něhdźe lěto změje wón w Slepom swoje poslednje kemše, po tym so po 54 lětach z čestnohamtskeho skutkowanja za wosadu rozžohnuje. Z toho bě wón 49 lět lektor a 33 lět predikant.
Koncertuja hnydom dwójce
Ochranow/Zabrod. Kapała Lidová muzika z Chrástu koncertuje jutře, sobotu, hnydom dwójce we Łužicy. Wot 16 hodź zahudźa hudźbnicy w Domje Komenskeho w Ochranowje. W 20 hodź. pak započnje so koncert w towarstwowym domje w Zabrodźe. Na woběmaj koncertomaj předstaja zběrku „Za čěskimi horami“, za kotruž su w lěće 2018 dohromady 25 serbskich ludowych spěwow w swojoraznych interpretacijach nahrawali.
