Zarjadniski zwjazk so zetka
Pančicy-Kukow. Přichodna zjawna zhromadźizna Zarjadniskeho zwjazka „Při Klóšterskej wodźe“ budźe wutoru, 2. septembra, w 19 hodź. w sydarni twarjenja zarjadniskeho zwjazka w Pančicach-Kukowje. Na dnjowym porjedźe stejitej mjez druhim rozprawa wo stawje lětušeho etata a wothłosowanje wo njeplanowanych wudawkach za projekt „Marijina hwězda INNOVATIV“.
Smolerjec kniharnja přeproša
Budyšin. Na knižnu premjeru knihi „Z Prahi do Palestiny. Reportaže z wichorojtych časow.“ přeprošuje Smolerjec kniharnja wšitkich čitarjow. Wudawaćel Friedrich Pollack a lektor Michał Nuk předstajitaj jutře, 28. awgusta, w 19 hodź. putace dožiwjenja serbskeho nowinarja a wšudźebyła Jurja Wićaza – wot Balkana přez Istanbul a Jerusalem hač k pyramidam při Nilu. W knize namakaće tež dotal njewozjewjene dopomnjenki na powójnski nawrót Jurja Wićaza do Europy.
Serbscy seniorojo škotowali
Jubilej města sobu woswjećić
Běła Woda. Město Běła Woda woswjeći štwórtk, 28. awgusta, swój 90. jubilej spožčenja měšćanskeho prawa a přeprosy wšitkich zajimcow wot 15 hodź. na oficialny dźěl swjedźenja na tamniše torhošćo. W 19 hodź. předstaja w sociokulturnym centrumje Telux inscenaciju dźiwadłoweho krucha Shakespeara „Othello“ we wobłuku Łužiskeho festiwala. Zastupne lisćiki předawaja online pod: .
Informuja wo Krabaće
Wojerecy. We Wojerowskim Łužiskim centeru, napřećo Brězanec kofejowni, wotewri Krabatowe towarstwo zhromadnje z projektom ZARI – syću za serbsku rěč a identitu Krabatowu stwu. W tutym zwisku přeprošujetej projektna koordinatorka Krabatoweho towarstwa Simona Kurthec a rěčna motiwatorka projekta ZARI Marija Šołćic swójby z dźěćimi na čitanje z knihi „KRABAT und das Geheimnis der Schwarzen Mühle“ a to štwórtk, 28. awgusta, w 14 hodź. Nimo toho poskićuja tam dalše interaktiwne hry z postawami serbskich bajow kaž tež zhromadne paslenje. Wobdźělenje je darmotne.
Lětni koncert chóra Meja
Předstaji energijowe drustwo
Radwor. Marcel Bellmann, manager za škit klimy w Radworskej gmejnje, přeprošuje wšitkich zajimowanych na informaciske zarjadowanje wo załoženju noweho energijoweho drustwa do jědźernje Radworskeje šule a to jutře, wutoru, 26. awgusta, we 18.30 hodź. Tam předstaji naćisk wustawkow drustwa a poda dohlad do prěnjeho projekta, natwara ćopłotneho zastaranja w Minakale. Wón prosy wo přizjewjenje z mejlku na abo telefonisce pod čisłom 035935 21639.
Na škot do Lejna
Lejno. Serbscy seniorojo su jutře, 26. awgusta, w 14 hodź. na swój tradicionalny škotowy turněr do Lejnjanskeho hosćenca přeprošeni. Nowačkojo su kaž přeco lubje witani. Přichodne škotowanje serbskich seniorow budźe wutoru, 30. septembra, 14 hodź. w „Knježim hosćencu“ w Njeswačidle.
Gmejnska rada w Malešecach
Wjace wo šupje zhonić
Budyšin. Na informacisku rozmołwu wo temje „šup“ přeprošujetaj Budyski měšćanski hajnik Werner Winde a zapósłanc Sakskeho krajneho sejma Marko Šiman wšitkich zajimcow póndźelu, 25. awgusta, w 16.30 hodź. do Budyskeje młodownje (Při zwěrjencu 1). Ze Sewjerneje Ameriki pochadźacy šup je so w Europje w běhu minjenych sto lět jara spěšnje rozmnožił. Něhdźe milionaj tutych inteligentnych zwěrjatow je tuchwilu w Němskej žiwych. Lěto a bóle sej wone tež sydlišća ludźi jako žiwjenski rum wotkrywaja, tak tež město Budyšin. Wšožrački zawostajeja hustohdy škody w zahrodach, domach a bróžnjach.
Wjeselo za dorosćenych
Wojerecy. Dorosćeni móža so jutře, sobotu, wot 18.30 hodź. na dworje Wojerowskeho hrodu raz tak prawje wucychnować. Za to su tam hoberski skakanski hród a dalše nastroje za ćělnu zabawu w formaće XXL natwarili. Hosći wočakuja nimo toho słódne napoje, přikuski z grila, live-hudźba kaž tež rejowanske rytmy DJa TWO PIECES. Zastup při kasy do zwěrjenca płaći wosom eurow.
Hwězdy w Hórnikecach
Zahaja Kamjensku Boršć
Kamjenc. Z wulkim koncertom zahaja jutře, pjatk, 22. awgusta, w 19.30 hodź. na měšćanskim torhošću lětušu Kamjensku Boršć. Program wuhotuje Kamjenski dujerski orchester zhromadnje z dujerskim orchestrom z čěskeho Kolína a muskim spěwnym towarstwom z Kamjenca-Jěžowa. Wjerškaj Kamjenskeje Boršće stej swjedźenskej ćahaj póndźelu, 25. a štwórtk, 28. awgusta. Něhdźe 1 700 dźěći a młodostnych poda so běłu drastu zwoblěkane, z pletwami z kwětkow kaž tež z chorhojemi a woponami po něhdźe dwaj kilometraj dołhej čarje z nutřkowneho města won na swjedźenišćo Boršće.
Na „Běłu nóc“ do klinikuma
„Rumunskej nocy“ openair
Smochćicy. Serbski ludowy ansambl zahaji pjatk, 22. awgusta, a slědowacu sobotu z lětušim Smochčanskim hudźbnym swjedźenjom nowu hrajnu dobu 2025/2026. Pod hesłom „Rumunskej nocy“ chcedźa wšitke sparty domu publikumej „z melanžu sinfoniki, ludowych spěwow a rejow wjelorakosć kraja mjez orientom a okcidentom zbližić“. Wosebity hósć je mezzosopranistka Mónika Kertesz. Hudźbny nawod wukonja Katharina Dickopf. Po programje powjedźe Kristina Nerád. Předprogram a prolog wuhotujetej dorostowej rejowanskej ćělesy Łužičanka a Łužičanska rapsodija. Wobaj wječoraj woswjeća na dworje kubłanišća swj. Bena a zahaja w 20 hodź. Zastup płaći w předpředani 29 resp. potuńšeny 19 eurow, při wječornej kasy su tikety 6 eurow dróše.
Na kino do Stareje wowčernje
Stróža. Biosferowy rezerwat Hornjołužiska hola a haty přeprošuje wšitkich lubowarjow filma na přichodne předstajenje lěćneho kina. Pjatk, 22. awgusta, w 20 hodź. pokazaja na dworje při Starej wowčerni na Wjesnej dróze 29 w Stróži film za dźěći a dorosćenych „Der wilde Roboter“. Zastupny lisćik płaći 7, potuńšeny 5 eurow.
Gmejnska rada w Chrósćicach
Zahraje na pjećorakich pišćelach
Budyšin. Pod hesłom „Ein Dom – Fünf Orgeln“ prezentuje cyrkwinskohudźbny direktor Michael Vetter jutře, srjedu, wubrane twórby mjez druhim Girolama Frescobaldija, Johanna Sebastiana Bacha, Jehana Alaina a Franza Liszta w Budyskej cyrkwi swj. Pětra. Wosebitosć koncerta je, zo zahraje Vetter na wšitkich pišćelach Božeho domu – dohromady je jich mjeztym pjeć. Rozdźělne zwukowe kajkosće spřistupnja organist z pomocu wariacijow na samsny tema. Zarjadowanje wotměje so we wobłuku Budyskeho pišćeloweho lěća a započnje so w 19.30 hodź. Zastup je darmotny, zarjadowacy Cyrkwinskohudźbny skutk Budyšin pak šćedriwe dary njewotpokazuje. Přichodnu srjedu je James Short z Dublina z hosćom rjadu, prjedy hač jón Michael Vetter po zwučenym wašnju němy film live přewodźejo pjatk, 29. awgusta, zakónči.
Předstaji zwukowe dokumenty
Za jězbu so přizjewić
Wuhotuja kulturnu kofejownju
Smjerdźaca. Serbske šulske towarstwo wuhotuje w Smjerdźečanskim Serbskim kubłanskim srjedźišću LIPA nowy rjad zarjadowanjow pod hesłom „Kulturna kofejownja“. To je poskitk za wšitke dźěći w starobje jednoho do šěsć lět, kotryž móža hromadźe ze swojimaj staršimaj abo z wowku a dźědom abo z ćetu a wujom wužić. Zarjadowanje wotměje so kóždu póndźelu wot 15.30 do 17 hodź. Prěni termin je přichodnu póndźelu, 18. awgusta. Wobdźělenje płaći dwaj euraj na dźěćo, na dorosćeneho tři eura. Přizjewjenja přijimuja pod telefoniskim čisłom 01520 8783147 abo pod .
Lyrika „poeta hajnikow“
Pućuja na Čornobóh
Njeswačidło. Na ekskursiju pod hesłom „Lěs na Čornobohu – dźensa a w přichodźe“ přeprošuje Njeswačanska přirodoškitna stacija njedźelu, 17. awgusta wot 9 do 14 hodź. Nimo wšelakich lěsniskich aspektow budu so wobdźělnicy z płoninami zaběrać, na kotrychž je zašłe lěta skórnik zachadźał. Wobdźělenje płaći na wosobu pjeć eurow. Hdźe so wobdźělnicy zetkaja, zhonja, hdyž so pod telefoniskim čisłom 035933/ 329 640 přizjewja.
Wobornicy woswjeća jubilej
