Kolesuja na slědach Serbow
Malešecy. Towarstwo Nadźija w Malešecach přeprošuje na kolesowansku jězbu wuchodnje Budyšina pod hesłom Serbske impresije. Jězba po dwanaće kilometrow dołhej čarje přez Brězynku, Klukš a Stróžu wotměje so pjatk, 31. julija, a započnje so w 16 hodź. při Malešanskej cyrkwi. Wobdźělenje płaći pjeć eurow na wosobu. Wobdźělnicy njech přijědu ze swójskim kolesom. Přizjewjenja přijimuja pod telefonowym čisłom 0173 4537977.
Nutřkowne mocy sylnić
Worklecy. Kurs za zesylnjenje swojich nutřkownych mocow wotměje so za tydźeń we Worklecach, a to sobotu, 18. julija, wot 15 do 20 hodź. a njedźelu, 19. julija, wot 14.30 do 18.30 hodź. Jón nawjeduje Brazilčanka Karin Flores, wo přełožk za wobdźělnikow stara so Franciska Šejdźic. We wobłuku kursa su wobdźělnicy přeprošeni, sami sebje wědomišo začuwać a nowe formy bliskosće k druhim wotkryć. Wobdźělenje na woběmaj dnjomaj płaći 99 eurow, za jednotliwy dźeń 63 eurow. Přizjewjenja přijimuja pod .
Radźićeljo wuradźuja
Smoothije a wuchodźowanje
Wojerecy. Rěčna motiwatorka w župje „Handrij Zejler“ Marija Šołćic přeprošuje na lěćny poskitk w dwěmaj dźělomaj. Wutoru, 14. julija planuje wona dwójce zarjadowanje, w kotrymž zhotowjeja wobdźělnicy serbske smoothije, a to wot 14 do 15.30 hodź. abo wot 16 do 17.30 hodź. we Wojerowskim Domowinskim domje. Druhi dźěl je zelowe wuchodźowanje z pedagogowku za hojace rostliny a zela Reginu Krawcowej pjatk, 17. julija, wot 17 do 19 hodź. Zajimcy zetkaja so při busowym zastanišću w Koćinje. Woni so njech hač do 13. julija pod telefonowym čisłom 03571 601613 abo e-mailnje pod přizjewja. Wobdźělenje na woběmaj zarjadowanjomaj płaći sydom eurow.
Zhromadnje spěwać
Budyšin. Zwjazk serbskich spěwarskich towarstwow přeproša na dalše zhromadne spěwanje. A to wutoru, 7. julija, we 18 hodź. w chórowej rumnosći Serbskeho ludoweho ansambla. Wšitcy zajimcy su wutrobnje witani.
Woswjeća jubilej hladarnje
Worklecy. Dnjowa hladarnja Carity „Při Krabatowym puću“ we Worklecach zhladuje na swoje pjećlětne wobstaće. Tónle mały jubilej chcedźa zhromadnje z wobydlerjemi a dalšimi zajimcami woswjećić. Sobotu, 4. julija, přeprošuja wot 16 hodź. na wotewrjene popołdnjo a zabawnu hudźbu z kapału Horjany. Samsny dźeń wot 19 hodź. budźe tam zjawna proba spěwneho kwarteta PoŠtyrjoch. Tež jědź a napoje wopytowarjam poskića.
Zažne běrny w srjedźišću
Chrósćicy. Swjedźeń zažnych neplow wotměje so jutře, 4. julija, wot 14 hodź. na Wjeselic bioratarskim dworje w Chrósćicach. Tam cyłe popołdnjo swoje zažne neple poskićuja. Nimo toho móža sej wopytowarjo Wjeselic piwo, samodźěłane fritki a „Bozankowu Boženku“ słodźeć dać. Za dźěći změja skakanski hród přihotowany. Wječor zahudźa Chróšćanscy muzikanća.
Wustajeja wudźěłki blidarjow
Sascha Lej wustupi
Kulow. Berlinski spěwytwórc Sascha Lej koncertuje jutře, pjatk, wot 19.30 hodź. při Kulowskim Jakubetzowym wustawje. Jeho spěwy powědaja wo małych wšědnych dźiwach, wo zwjazanosći mjez ludźimi a wo pospyće, w dźensnišim njelochkim času čłowjeskosć wobchować. Zastup płaći dźesać eurow.
Kamjenc póćmje zeznać
Kamjenc. Muzej zapadneje Łužicy poskićuje jutře a sobotu stajnje wot 21 hodź. wječorne wodźenje po Kamjenskim starym měsće. Wobdźělnicy słyša dawno zabyte stawiznički a zhonja wo znatych mjenach, potajnych městnosćach a njewšědnych podawkach. Zajimcy njech přizjewja so na knihowanskim portalu muzeja. Tam zhonja, hdźe so njewšědne wodźenje po měsće započnje.
Serwisowe stacije nastajili
Wojerecy. Nowe serwisowe stacije za jednoru reparaturu kolesow maja nětko we Wojerecach. Nastajili su je direktnje při kolesowych garažach při dwórnišću, na torhošću w starym měsće a při Łužiskim centeru. Stacije su z trěbnym gratom a powětrowej klumpu wuhotowane. Inwesticija we wobjimje nimale 7 700 eurow pochadźa ze spěchowanskeho programa zwjazkoweho wobchadneho ministerstwa. Dalša tajka stacija ma w Němcach blisko wětrnika nastać.
Pytaja hodowny štom
Budyšin. Wosrjedź lěća pyta Budyski krajnoradny zarjad hodowny štom, kotryž ma w adwenće krajnoradny zarjad pyšić. Jehlinowc měł něhdźe dźesać metrow wysoki być a nic dale hač dźesać kilometrow wot Budyšina zdaleny stać. Štóž tajki štom ma a chce jón přewostajić, njech so w krajnoradnym zarjedźe pod land přizjewi. Wobsedźerjam žane wudawki njenastanu. Wo podrězanje a transport stara so wokrjes.
Serbski lěkar informuje
Seniorojo škotuja
Mały Wosyk. Přichodny škotowy turněr serbskich seniorow wotměje so jutře, wutoru, w sportowym domje w Małym Wosyku (Kleinhähnchen). Započatk je w 14 hodź. Nowačkojo su kaž přeco wutrobnje witani. Dalši turněr budźe 28. julija w Radworskim „Słodeńku“.
Kak so něhdy kupachu
Budyšin. Historiske romany a filmy pokazuja často drastiski wobraz wo hygieniskich poměrach w srjedźowěku. We woprawdźitosći pak běchu runje tehdy zjawne kupjele jara woblubowane. W Budyšinje bě w srjedźowěku samo wjacorych tajkich městnow. Wone a tehdyša hygiena ćěła steja w srjedźišću přednoška Rica Heyla jutře, wutoru, w Budyskej měšćanskej bibliotece. Započatk je w 19 hodź., zastup je darmotny. Přizjewjenje njeje trěbne.
Radźićeljo wuradźuja
Za čołmikowanje so přizjewić
Worklecy. Serbscy młodostni su lětsa wospjet na zhromadny dekanatny wulět přeprošeni, kiž wotměje so njedźelu, 13. septembra. Z busom chcedźa sej do Sprjowjow (Sprey) pola Hamora dojěć. Tam budźe zhromadny nyšpor w tamnišej cyrkwi. Přizamknje so čołmikowanje z Čelnoho hač do Noweho Města nad Sprjewju. Tam wulět z grilowanjom při Ruhlec młynje wuklinči. Busy wotjědu w 12 hodź. mjez druhim z Kulowa kaž tež z Chrósćic, a pojědu potom wotpowědnje přizjewjenjam po wsach. Młodostni nawróća so wokoło 19.30 hodź. Přinošk wučinja na wobdźělnika 25 eurow, čłonojo serbskeho dekanatneho kružka kaž tež wobsedźerjo karty Juleica płaća pjeć eurow. Z tym su busowa jězba, padlowanje kaž tež meni k wječeri zapłaćene. Dalšu jědź móže sej kóždy při přizjewjenju skazać. Zajimcy měli so hač do póndźele, 10. awgusta, online přizjewić. Link je pod www.posol.de wozjewjeny.
Koncertuja na zahrodźe
Šulerjo dźensa koncertuja
Radwor. Na žurli Radworskeho hosćenca „Meja“ wotměje so dźensa, štwórtk, we 18.30 hodź. lětuši lěćny koncert Radworskeje wotnožki Budyskeje wokrjesneje hudźbneje šule. Šulerki a šulerjo su wotměnjawy program spřihotowali. Solisća a ansamble hudźa zhromadnje ze swojimi wučerjemi. Mjez druhim wustupi dujerska band RadworBrass, kotraž jako wosebitosć zhromadnje z dorostowymi dujerjemi RadworBrassJuniors zahudźi. Dalši wjeršk budźe smyčkowy kwartet Unisono, kiž posledni raz wustupi.
Grit Lemke powjedźe po měsće
Wojerecy. Wosebity poskitk změja sobotu, 27. junija, we Wojerecach. Turistiska informacija přeprošuje zhromadnje z awtorku a filmowču Grit Lemke na měšćanske wodźenje na slědach jeje knihi „Kinder von Hoy“. Wone započnje so w 10 hodź. a powjedźe w běhu štyrjoch hodźinow po starym a nowym měsće. Na wubranych městnach porěči Grit Lemke wo ludźoch a stawiznach, kiž so w jeje knize jewja. Wodźenje zwjazuje literarne perspektiwy z měšćanskimi stawiznami a wosobinskimi dopomnjenkami. Zajimcy njech přizjewja so pod telefonowym čisłom 03571 2096170.
Radźićeljo wuradźuja
Łazk. Přichodne zjawne posedźenje gmejnskeje rady Ralbicy-Róžant wotměje so jutře, štwórtk, we 18 hodź. we Łazkowskim kulturnym domje při tamnišim niwowym lěsu. Hłownje póńdźe wo planowany nowotwar horta pódla Ralbičanskeje šule. Za njón přepodadźa wjacore twarske nadawki, mjez druhim za twar róštow, třěchikryjerske dźěła, suchotwar, tepjenje, přewětrjenje a sanitarne připrawy. Dale steji na dnjowym porjedźe rozsud, hač měła gmejnska nowina dale wuchadźeć.
Hórki. Tohorunja jutře, ale w 19 hodź. zetkaja so Chróšćanscy gmejnscy radźićeljo w gratowni Hórčanskeje wohnjoweje wobory. Woni zaběraja so z narunanskim nowotwarom gratownje Chróšćanskeje wohnjoweje wobory. Za tele twarske předewzaće chcedźa jutře zrěčenje z architektom wotzamknyć. Dalše zrěčenje potrjechi planowanje elektriki noweje gratownje. Na zjawny dźěl posedźenja su wobydlerjo wutrobnje witani.
