Zanjesetaj drohoćinki
Kamjenc. Renoměrowanaj hudźbnikaj staj sobotu, 12. februara, we wobłuku 53. Kamjenskich Lessingowych dnjow z hosćom. Staj to husler Kolja Lessing a gitarist Johannes Monno. Jeju koncert „Drohoćinki z baroka a romantiki“ dožiwja zajimcy wot 19 hodź. w Kamjenskej radnicowej žurli. Zastupne lisćiki za 17 eurow, potuńšene dźewjeć eurow, poskićuja w Kamjenskej měšćanskej informaciji. Při wječornej kasy płaći lisćik 18,50 eurow.
Šulerjow přizjewić
Ralbicy. Lětsa stej dwě móžnosći šulerki a šulerjow do 5. lětnika Serbskeje wyšeje šule Ralbicy přizjewić, wosobinsce w času wot 28. februara hač do 4. měrca abo z listom (póštu). Na šuli budźe to k sćěhowacym časam, při dodźerženju płaćiwych hygieniskich předpisow, wosobinsce móžno: 28. februara wot 8 do 14 hodź, 1. měrca wot 10 do 18 hodź., 2. měrca wot 8 do 12 hodź., 3. měrca wot 8 do 14 hodź. a 4. měrca wot 8 do 10 hodź. Z póštu dyrbi přizjewjenje hač do 2. měrca w šuli předležeć. Starši njech na trěbne podłožki njezabudu.
Staršisko-dźěćacy kruh
Z dźěćimi hornčerić
Radźićeljo wuradźuja
Worklecy. Wobstarać a natwarić wobchad změrowacu připrawu budźe jedna z temow přichodneho posedźenja Worklečanskeje gmejnskeje rady. Jeje čłonojo zetkaja so zajutřišim, štwórtk, w 19 hodź. w jědźerni Worklečanskeje wyšeje šule. Dale zaběraja so radźićeljo z wotnajenskim zrěčenjom za kupowy hat kaž tež z prašenjom, hač měł wjesnjanosta přichodnje dale čestnohamtsce abo snano hłownohamtsce skutkować. Zajimcy su wutrobnje přeprošeni.
Poskićuja lisćiki
Informuja radźićelow a zajimcow
Chrósćicy. „Trjebaja małe gmejny w Sakskej hłownohamtskeho wjesnjanostu?“, rěka hesło informaciskeho zarjadowanja, kotrež je jutře, wutoru, w 19 hodź. w Chróšćanskej wjacezaměrowej hali „Jednota“. Na nje přeproša zarjadniski zwjazk Při Klóšterskej wodźe radźićelow wšěch pjeć přisłušacych gmejnow kaž tež zajimowanych wobydlerjow. Přednošować budu wjacori referenća.
Za wiki so přizjewić
Slepo. Wulke rjemjeslniske a burske wiki budu jedna z atrakcijow we wobłuku swjedźenskeho kónc tydźenja wot 17. do 19. junija k 750. róčnicy wobstaća Slepoho. Za nje móža so rjemjeslniske zawody, wikowarjo a towarstwa hišće přizjewić. Doba přizjewjenja je hač do 10. februara podlěšena. Formular nadeńdu zajimcy pod .
Sadowcy prawje wurězować
Wojerecy. Sadowcy prawje wurězować, to móža zajimcy 19. februara wot 9 do 12 hodź. na Wojerowskej dźěćacej a młodźinskej farmje nawuknyć. Pod fachowym nawodom nazhoniteje zahrodnicy Janiny Gräulich wobdźělnicy na městnje někotre sadowcy wurězaja. Za to měli sej woni porjadne zahrodniske nožicy a snano tež mału piłu sobu přinjesć. Wobdźělenje płaći na wosobu dwanaće eurow. Na kóždy pad je přizjewjenje pod trěbne.
Zastupne lisćiki dobyć
Budyšin. Wobdźělenska a wobhospodarjenska towaršnosć Budyšin (BBB) swjeći lětsa 30. róčnicu wobstaća. Při tej składnosći wulosuja kóždy měsac 30 atraktiwnych mytow. W februaru móža zajimcy 30 swójbnych zastupnych lisćikow (stajnje za dweju dorosćeneju a dwě dźěsći) za błudźišćo při Małowjelkowskim prazwěrjencu dobyć. Wobdźělić móža so zajimcy hač do 28. februara na internetnej stronje . Hač do srjedź přichodneho měsaca dobyćerjow wulosuja a jich pisomnje informuja.
Durje wirtuelnje wotewrjene
Sport za muži
Prózdninski poskitk
Smjerdźaca. Za dźěći w starobje sydom do dźesać lět poskići Serbske šulske towarstwo prózdninske dny wot 14. do 17. februara w kubłanskim srjedźišću LIPA w Smjerdźacej a to wšědnje wot 9 do 15 hodź. Na šulerjow čakaja zabawa w sněze, wopyt w muzeju, rejwanje, zaběra ze skludnym psom, wotputanje z jogu, wuspytanje dźěła jako pjekar, hudźenje a paslenje. A wězo chcedźa zhromadnje hry hrać a wjesołe a zajimawe prózdninske dny dožiwić. Tež swójske ideje su prašane a witane. Přizjewjenja přijimuja hač do 9. februara pod pro abo pod telefonowym čisłom 0 35 91 / 55 02 07. Poskitk płaći na šulerja 40 eurow inkl. zastaranje.
Za projekt so přizjewić
Chrósćicy. Za nowu serbsku spěwohru „Z TOBU – Bohu swjećene lěto“ su dźěći do wulkeho chóra prošene. Spěwohra nawjazuje na CD, kotruž běše Towarstwo Cyrila a Metoda z.t. zhromadnje ze Załožbu za serbski lud w lěće 2000 wudało. Předstajić chcedźa ju w oktobru w Chróšćanskej „Jednoće“. Nadrobnje wopisany je projekt w Katolskim Posole.
Stipendije za kurs čěšćiny
Budyšin. Štóž ma zajim na rěčnym kursu čěšćiny wot 22. julija do 19. awgusta w Praze abo wot 14. awgusta do 5. septembra w Českich Budějovicach, njech w Rěčnym centrumje WITAJ hač do 15. měrca swoje přizjewjenske podłožki woteda. (Póstowe naměsto 2, 02625 Budyšin, e-mail: wina.de). Wotpowědny formular a dalše informacije su na internetnej stronje pod „Nowosće“ přistupne.
Jězbne plany znowa změnili
Budyšin. Znowa su jězbne plany w Budyskim wokrjesu změnjene a přiměrjene. Zamołwići reagowachu tak na skóržby a pokazki sobujěducych. Wot nětko płaćiwych změnow profituja předewšěm šulerjo. Potrjecheni móža so na internetnej stronje wobchadneju zaměroweju zwjazkow ZVON abo VVO kaž tež w aktualnych powěsćach wokrjesa wobhonić. Mjez druhim změnili su čaru 790 Kamjenc–Chrósćicy–Ralbicy. Ale tež liniji 503 Budyšin–Wulka Dubrawa a 780 Wojerecy–Kulow–Rakecy stej potrjechenej. Tuchwilu zamołwići hišće dalše pokazki z wobchadnymi předewzaćemi přepruwuja a wothłosuja.
Wo dóńće Jurja Rjenča
Chrósćicy. Serbski filmowy wječor wo dóńće Jurja Rjenča za čas stalinizma dožiwja zajimcy jutře, sobotu, w 19.45 hodź. w Chróšćanskej putniskej hospodźe. Filmowy pask „Stalin, Tito a mój nan“ spyta wujasnić, čehodla bu serbski prawiznik Jurij Rjenč 1950 wot němskeje kriminalneje policije zajaty a za čo bu wot sowjetskeho wójnskeho tribunala w Drježdźanach k 25 lětam jastwa zasudźeny. Cyły čas swojeho zajeća a po tym je spytał wotmołwu na prašenje namakać: „Štó je mje přeradźił a za čo sym dyrbjał do jastwa?“ Hakle po politiskim přewróće w NDR dósta wón wotmołwu, po tym zo bě Benedikt Cyž w Moskowskim archiwje tajneje ruskeje słužby „Ljubljance“ slědźił. Benedikt Cyž přinjese film sobu a rady tež wo pozadkach diskutuje. Wšitcy su wutrobnje witani. Prawidła 2G a zapisanja kontaktnych datow dla njech trochu prjedy přińdu.
Rejwanje za dźěći
Radźićeljo so schadźuja
Njebjelčicy. Předstajenje koncepta kolesowanskeje šćežki podłu statneje dróhi S 100 wot Miłoćic do Kamjenca budźe jedna z temow zhromadźizny Njebjelčanskeje gmejnskeje rady jutře, štwórtk, w 19.30 hodź. w posedźenskej rumnosći Njebjelčanskeje gmejny. Dale zaběraja so z twarskim planom přemysłownišća Při Krabatowym kamjenju a z wobstaranjom drasty za młodźinsku wohnjowu woboru.
Chrósćicy. Tež radźićeljo gmejny Chrósćicy jutře wuradźuja, a to wot 19 hodź. w kulturnym a gmejnskim centrumje. Woni maja so rozestajeć z čestno- abo hłownohamtskej dźěławosću wjesnjanosty. Dalši dypk na jich dnjowym porjedźe budźe, rozjimać wustawki wosebiteho wužiwanja w Chróšćanskej gmejnje. Wobě posedźeni radźićelow stej zjawnej. Zajimcy su witani.
