Herman Woko turněr dobył
Lejno. Prěni škotowy turněr serbskich seniorow w tutym lěće je so wčera w Lejnjanskim Kubicec hosćencu wotměł. Škotowarka a 35 škotowarjow je so na nim wobdźěliło. Mjez nimi bě nowačk Mikławš Zahon. Herman Woko je turněr z nahladnymi 3 347 dypkami před Bosćijom Rječku (2 661) a Herbertom Krječmarjom (2 568) dobył. Přichodne kartyplacanje wotměje so 24. februara w 14 hodź. w Karstenowej piwowej stwičce w Pančicach-Kukowje.
Pokazaja swětnišćowu show
Wojerecy. Němski centrum za powětrowe a swětnišćowe lětarstwo (DLR) pokaza swoju swětnišćowu show lětsa tež we Wojerecach. We Łužiskej hali přeprošuja na putacu jězbu do přichoda, a to 19. meje wot 16.30 do 18 hodź. Interaktiwny jewišćowy program je za dźěći w starobje wot dźewjeć do 13 lět mysleny. Zastup je darmotny. Lisćiki móža sej zajimcy pod www.lausitzhalle.de skazać. Dalše předstajenja budu 19. a 20. meje za šulske rjadownje. Hač do 6. februara přijimuja přizjewjenja pod .
Spěwarki wuhotuja koncertaj
Baćoń. Žónski ansambl Jarobinka wuhotuje pod nawodom Walburgi Wałdźic a z huslerku Izabelu Kałduńskej pjatk, 30. januara, w 19 hodź. w Baćońskej cyrkwi koncert. Zastup je darmotny, po koncerće proša wo dar. Nazajtra wustupi ansambl zhromadnje z Praskim chórom Kormorni sbor Entropija w Praze, a to w Betlémskej kapli na Źižkovje. Započatk je tam 18.30 hodź.. Towarstwo Společnost přátel Lužice koncert sobu organizuje.
Informuja wo hladarni
Worklecy. Pod hesłom „Dohlady a informacije wo poskitkach našeho domu a móžnosće financowanja přez hladanske kasy“ wotměje so štwórtk, 5. februara, w 19 hodź. informaciske zarjadowanje w dnjowej hladarni Carity „Při Krabatowym puću“ we Worklecach. Tam poskićuja pomocy potrěbnym ludźom městnosć zetkawanja a zhromadneje zaběry, jich swójbnym pak podpěru při hladanju staršich ludźi. Kaž nawodnica Jěwa-Marja Šnajdrowa zdźěli, posrědkuja wopytowarjam informaciskeho zarjadowanja přehlad, što so we Worklečanskej hladarni stawa a kotre poskitki maja.
Radźićeljo wuradźuja
Seniorojo škotuja
Lejno. Prěni lětuši škotowy turněr serbskich seniorow wotměje so jutře, wutoru, w Lejnjanskim Kubicec hosćencu „K lipje“. Započatk budźe w 14 hodź. Nowačkojo su kaž přeco wutrobnje witani.
Serbske blido w Drježdźanach
Drježdźany. Přichodne serbske blido w Drježdźanach wotměje so srjedu, 28. januara. Wobdźělnicy zetkaja so we 18 hodź. w dnjowej barje Loewe na Hłownej dróze 46-48. To je napřećo korčmje Am Thor, hdźež je so serbske blido minjene měsacy wotměwało.
Porěči wo Minje Witkojc
Choćebuz. Stajne blido Miny Witkojc schadźuje so jutře, wutoru, w 19 hodź. w Choćebuskim Serbskim muzeju. Tam porěči kuratorka Anja Jahnojc wo wuslědkach swojeho slědźenja wo Minje Witkojc. Předewšěm póńdźe wo přećelstwo Miny Witkojc a Marjany Domaškojc a jeju basnjenje. Nimo toho budźe dosć chwile za wuměnu a rozmołwu.
Wo njewšědnym putnikowanju
Chrósćicy. Nic jenož dźensa, ale tež hižo w dawnych časach běchu so ludźo z Łužicy na putnikowanje podali. Tak tež młody młynk Jurij Wawrik z Kukowa, kotryž z towaršomaj 1842 z Łužicy do Roma nóžkowaše. Wo tutym putnikowanju a při tym dožiwjenych dyrdomdejach je knihu napisał. Wona skića jónkrótny dohlad do dožiwjenjow a strachow tajkeho tradicionalneho putnikowanja. W Chróšćanskej putniskej hospodźe přednošuje wo tym jutře, sobotu, w 19.45, hodź. stawiznarka dr. Lubina Malinkowa. Wona je čaru Wawrika zrekonstruowała a so za tym prašała, kotre slědy je putnikowanje w žiwjenju Wawrika a we Łužicy zawostajiło. Je to zarjadowanje z rjadu „Sorabistika po puću“ składnostnje 75lětneho jubileja Serbskeho instituta. Samsny dźeń w 16 hodź. poskićuje so w putniskej hospodźe serbske kino za dźěći.
Přeprošuja na karnewal
Zběrka basnjow změje premjeru
Zběrka basnjow změje premjeru
Z busom na póstnicy
SŠT přeprošuje na „hłownu“
Smjerdźaca. Předsydstwo Serbskeho šulskeho towarstwa přeprošuje na hłownu zhromadźiznu srjedu, 21. januara, we 18 hodź. do Smjerdźečanskeho Serbskeho kubłanskeho srjedźišća LIPA. Nimo rozprawy wo lěće 2025 steji na dnjowym porjedźe přednošk dr. Jany Šołćineje wo rěčnym stawje šulerjow na serbskich šulach. Předsydstwo wšitkich čłonow prosy, najspěšnišo zdźělić, hač so na zhromadźiznje resp. na zhromadnej bjesadźe wobdźěla (info@sorbischer-schulverein. de).
Ideje za zhromadnosć zapodać
Budyšin. We wobłuku wobydlerskeho etata přewostaji město Budyšin w lěće 2026 cyłkownje 20 000 eurow za naprawy, kotrež zhromadne žiwjenje ludźi skrućeja. Měšćenjo móža hač do 31. januara swoje kreatiwne ideje za małe projekty zapodać, kotrychž paleta móže wot ławki w parku hač ke knižnej budce sahać. Swoje ideje njech posrědkuja wobydlerjo internetnje na . Tam jich tohorunja wo wuměnjenjach za wobdźělenje informuja.
Šula so předstaji
Nowy kurs za započatkarjow
Radźićeljo wuradźuja
Radwor. Přichodne posedźenje Radworskeje gmejnskeje rady wotměje so jutře, srjedu, w rumnosći za zhromadźizny gmejnskeho zarjadnistwa. Započatk budźe we 18.30 hodź. Hłowny dypk dnjoweho porjada je hospodarski plan za lěto 2026. Dale wuradźuja wo prašenju, hač so gmejna na energijowym drustwje „Witaj“ wobdźěli.
Městna hišće swobodne
Budyšin. Syć za serbsku rěč a regionalnu identitu ZARI přewjedźe wjacore dźěłarnički, za kotrež móža so zajimcy hišće přizjewić. Tak wotměje so 16. a 23. januara w Budyšinje dźěłarnička wo smokowanju płata za fale abo druhu drastu. Nawod změje Heidemarie Hoeftowa. Wobdźělenje płaći 20 eurow na wosobu. W dalšej dźěłarničce, kiž wotměje so 16. a 17. kaž tež 23. a 24. januara w Budyšinje, chcedźa serbsku drastu šić. Zajimcy móža so tohorunja hišće přizjewić. To samsne płaći za zhotowjenje módroćišća. Terminy hač do apryla su internetnje pod wozjewjene. Tam nadeńdu zajimcy tež dalše informacije a formular za přizjewjenje. Te přijimuje tež nawodnica kulturneho wobłuka ZARI Sonja Hrjehorjowa pod telefonowym čisłom 03571 6084614 abo z mejlku na .
