Spočatk adwenta zahaja so na mnohich městnach zaso adwentne wiki. Mjeztym zo Budyske Wjacławske wiki nimale hač do hód traja, přewjedu so wiki na wsach jenož jedyn dźeń.

W Hodźiju wotměja so adwentne wiki jutře, sobotu, při kulturnym centrumje. W 15 hodź. je wjesnjanosta zahaji a wulki wosušk nakraje. Program wuhotuja dźěći pěstowarnje a zakładneje šulu a dujerska kapała wohnjoweje wobory. W 16 hodź. wočakuja rumpodicha.

Dźěłarnje za zbrašenych ludźi w Pančicach-Kukowje zarjaduja jutře wot 13 do 17 hodź. Dźeń wotewrjenych duri z adwentnymi wikami. W poskitku budu keramiske, drjewjane a pjekarske wudźěłki. Partnerska dźěłarnja z Pólskeje poskići kule za hodowny štom. Wjeršk budźe zhromadna hodowna hra sobudźěłaćerjow dźěłarnje a šulerjow wjes­neje „Šule Ćišinskeho“.