Wječor wo twarskim inženjerje
Seniorojo škotuja
Pančicy-Kukow. Přichodny škotowy turněr serbskich seniorow wotměje so jutře, wutoru, w Karstenowej piwowej stwičce w Pančicach-Kukowje. Započatk budźe w 14 hodź. Nowačkojo su kaž kóždy raz rady witani, zdźěli hłowny organizator Měrćin Nowak. Dalši škotowy turněr wotměje so 26. měrca w Radworskim hosćencu Meja.
Radźićeljo wuradźuja
Chrósćicy. Přichodne posedźenje Chróšćanskeje gmejnskeje rady wotměje so jutře, wutoru, w 19 hodź. w Chróšćanskim gmejnskim a kulturnym centrumje. W zjawnym dźělu zaběraja so radźićeljo z dwěmaj priwatnymaj twarskimaj předewzaćomaj. Přizamknje so njezjawny dźěl. Wobydlerjo su wutrobnje přeprošeni.
Hraja we Łužiskim seminarje
Praha. Po tym zo je Chróšćanska lajska dźiwadłowa skupina swoju komediju „ALOJS mobilizuje“ dźewjeć razow na serbskich wjeskach zahrała, čaka na hrajerki a hrajerjow nětko nowosć. Sobotu, 2. měrca, we 18 hodź. předstaja woni swoju inscenaciju w Praskim Łužiskim seminarje. Zajimcy z čěskeje stolicy a z Łužicy su wutrobnje witani.
Přehladka hišće přistupna
Wusyłaja kemše live
Smochćicy. Radijowy sćelak MDR Kultur wusyła njedźelu, 25. februara, w 10 hodź. live Božu mšu ze Smochčanskeje cyrkwje swj. Bena. Celebrant budźe farar Bernhard Dittrich, kiž tohorunja prěduje. Hudźbne wobrubjenje na starosći změja cyrkwinscy hudźbnicy Drježdźansko-Mišnjanskeho biskopstwa pod nawodom Christiana Bonatha. Hudźbnicy wobdźěla so na dalekubłanju, kotrež so kóžde lětom w Smochćicach wotměwa.
13. schadźowanka swójbow
Chrósćicy. Rěčny centrum WITAJ a Kamjenska župa „Michał Hórnik“ přeprošujetej na schadźowanku swójbow njedźelu, 3. měrca, wot 15 hodź. do Chróšćanskeje „Jednoty“. Pisany program zahaja mali rejwarjo „Łužičanki“. Přizamknu so dźěłarnički a zaběry za najmłódšich, mjez druhim paslenje, dźěćacy sport a čitanski róžk, a za trochu staršich eksperimenty, kuzłanje, nowe medije a krosnowanje. Dale předstaja so Serbski muzej, Němsko-Serbske ludowe dźiwadło a Ludowe nakładnistwo Domowina z najnowšimi poskitkami za swójby a dźěći. Starši maja składnosć so z fachowcami wo rěčnych kursach a rěčnym kubłanju rozmołwjeć abo při kofeju a tykancu bjesadować.
Dźěłowy kruh so zetka
Zwukowu instalaciju dožiwić
Jězba pčołarjomaj wěnowana
Zhromadna rěčna hodźina
W muzeju jejka debić
Budyšin. Wot 2. hač do do 24. měrca wotměwaja so na sobotach a njedźelach w Budyskim Serbskim muzeju dźěłarnički debjenja jutrownych jejkow. Tu wobsteji móžnosć bosěrowanje a wóskowanje pod wěcywustojnym nawodom nawuknyć. Dźěłarnički wotměwaja so w dwěmaj skupinomaj po stajnje dwěmaj hodźinomaj, a to wot 13 do 15 hodź. a wot 15 do 17 hodź. Muzej prosy wo zawjazowace přizjewjenje pod telefonowym čisłom 03591/270 87 00 abo e-mailnje pod .
Zhromadnje zawki zhotowja
Njebjelčicy. Kóždu 1. a 3. njedźelu měsaca wuhotuje towarstwo Sowuto w Njebjelčanskim gmejnskim zarjadnistwje kulturnu kofejownju. Zajutřišim, 12. februara, móža tam zajimcy zawk zhotowić a sobu domoj wzać. Nawod změje Petra Münch-Kubale ze Serbskeho muzeja w Drjowku. Započatk budźe w 14.30 hodź. W 17.30 hodź. přizamknje so přednošk Franka Ričela, kiž porěči wo swojim žiwjenju jako profijowy kopar.
Přednošuje wo nałožkach
Porěči wo putnikowanju
Chrósćicy. Wo swojim putnikowanju po Jakubowym puću rozprawja Guido Budar sobotu, 17. februara, w 19.30 hodź. w Chróšćanskej putniskej hospodźe. 39lětny je so loni w juniju na puć podał z Noweje Wjeski hač do 3 200 kilometrow zdaleneho Santiago de Compostella a dale hač do Finisterre a Muxia při Antlantiskim oceanje. Ke Chróšćanskej kermuši w oktobrje je so zaso nawróćił. Na rozprawu ze swětłowobrazami wo swojich dožiwjenjach, dyrdomdejach a zetkanjach smědźa so zajimcy wjeselić. Hižo sobotu wot 16 hodź. su najmłódši přeprošeni na serbske dźěćace kino.
Móst jutře wotewru
Radźićeljo wuradźuja
Róžant. Přichodne posedźenje gmejnskeje rady Ralbic-Róžanta wotměje so jutře, štwórtk, we 18.30 hodź. w sydarni gmejnskeho zarjada w Róžeńće. Nimo kontrole protokola a naprašowanjow z ludnosće steji předstajenje naćiska hospodarskeho plana 2024 w srjedźišću wuradźowanja. Zajimcy su wutrobje witani.
SWZ nastaji kandidatow
Nowa Wjeska. Serbske wolerske zjednoćenstwo přeprošuje wšitkich zajimcow na zjawnu zhromadźiznu, na kotrejž wuzwola kandidatow wolerskeho zjednoćenstwa, kotrež njeje na žanu stronu wjazana, za nowy wokrjesny sejmik Budyskeho wokrjesa. Kaž sobuiniciator Měrko Šmit informuje, chcedźa kandidatow za wšitke wólbne wokrjesy nastajić. Tak su na zhromadźiznu tež dalši Serbja prošeni, kotřiž móžnu kandidaturu njewotpokazaja abo kotřiž chcedźa Serbske wolerske zjednoćenstwo podpěrać. Wólbna zhromadźizna wotměje so štwórtk, 15. februara, we 18.30 hodź. w rumnosći wjesneho kluba w Nowej Wjesce.
