Wosebita wustajeńca
Budyšin. Wosebita wustajeńca „Wěčne pućowanje. Barba a słowo w twórbje ukrainskeho wuměłca Anrija Sharana“ so ke kóncej chila. Budyski Serbski muzej přeprosy na finisažu njedźelu 16. měrca 2025. Zarjadowanje započina w 15 hodź. z wjedźenjom po wustajeńcy. Po tym předstaja katalog wo wosebitej wustajeńcy. Wobdźěleni zastupjerjo institucijow smědźa sej bjezpłatny eksemplar kataloga sobu wzać.
Wobydlerski etat
Wojerecy. Ze spočatka februara přiwozmje město Wojerecy namjety za wobydlerski etat. Hač do 9. měrca móža wobydlerjo z Wojerec a měšćanskich dźělow hišće swoje ideje zapodać. Wobdźělnicy móža tak wužiwanje zjawnych srědkow w někotrych wobłukach wowliwować a projekty přesadźić, kotrež njedadźa so hewak zlochka zwoprawdźić. Dotal je Wojerowske měšćanske zarjadnistwo něhdźe połsta namjetow přijimało. Tute su na internetnej stronje podate a hrubje wopisane. Zajimcy móža swoje ideje na platformje města pod zapisać.
Što so stawa w USA?
Zhromadnje spěwać
Šulerjow přizjewić
Worklecy. Starši, kotřiž chcedźa swoje dźěćo za šulske lěto 2025/2026 na Worklečanskej serbskej wyšej šuli „Michał Hórnik“ přizjewić, móža to přichodny tydźeń k slědowacym časam činić: póndźelu, srjedu a štwórtk wot 7.30 hač do 14 hodź, wutoru wot 10 hač do 17 hodź. a pjatk wot 7.30 hač do 10 hodź. Komuž so žadyn z terminow njehodźi, njech sej ze šulu hinaši čas dorěči. Wšitke trěbne informacije nadeńdu zajimcy internetnje pod www.schule-raeckelwitz.de.
Poslednje wodźenje
Budyšin. W Muzeju Budyšin móža so zajimcy njedźelu, 2. měrca, w 15 hodź. wobdźělić na poslednim wodźenju po wustajeńcy, kotraž je Helfriedej Winzerej (1924–2010) a jeho měšćanskim napohladam sprjewineho města wěnowana. Winzer je w Drježdźanach a Berlinje nutřkownu architekturu studował. Za swoje diplomowe dźěło je 1953 měšćanske napohlady Budyšina rysował. Při tym nastachu wobrazy znatych twarjenjow Budyšina a měšćanske panoramy, na kotrychž su zdźěla hišće slědy Druheje swětoweje wójny spóznać.
Město pyta wikowarjow
Budyšin. Za lětuše 642. Wjacławske wiki, kotrež budu wot 28. nowembra hač do 22. decembra, pyta město Budyšin wikowarjow, rjemjeslnikow, wuměłskich rjemjeslnikow, wuměłcow, gastronomow a firantow, kotřiž chcedźa ze swojim poskitkom hodowne wiki wobohaćić. Na wikach měli so rjemjeslniske wudźěłki runje tak prezentować kaž kulinariske wosebitosće a hodowne debjenki. Wiki maja lětsa wosebje swjatočne być, měšćanske zarjadnistwo připowědźi. Při wuhotowanju na to kedźbuja, zo předawanišća wobrazej města wotpowěduja a zo su z debjenkami a ze swěcu wupyšene. Zajimcy móža so hač do 30. apryla w měšćanskim zarjadnistwje požadać. Wšitke nadrobne informacije wo wupisanju kaž tež přizjewjenski formular nadeńdu zajimcy internetnje na stronje .
Joachim Mejgl turněr dobył
Prezentuja knihu
Budyšin. W Ludowym nakładnistwje Domowina wušłu knihu „Die Lausitz in Reisebeschreibungen des 18. und 19. Jahrhunderts“ předstaji 27. februara w 19 hodź. w Budyskej Smolerjec kniharni awtor prof. dr. Uwe Hentschel zhromadnje z lektorom Michałom Nukom. Wonaj znazornjataj, kak su so ludźo před wjac hač 200 lětami za łužisku krajinu zajimować započeli a kak su sej něhdy njeznate čwaki domizny wotkrywali.
Pytaja regionalneho managera
Njeswačidło. Towarstwo za wuwiće Hornjołužiskeje hole a hatow (OHTL) pyta tak spěšnje kaž móžno regionalneho managera za zwoprawdźenje Leaderoweje wuwićoweje strategije. Městno wopřija zjawnostne a marketingowe dźěło Leaderoweho regiona, wuwiwanje cilow wuwićoweje strategije, zhotowjenje rozprawow a analyzow kaž tež zwoprawdźenje swójskich projektow. Zajimcy měli swoje požadanje z wotpowědnymi podłožkami najpozdźišo hač do 31. měrca wotedać, a to Njeswačanskemu gmejnskemu zarjadnistwu, e-mail .
Chcedźa chór załožić
Radwor. Na Radworskej Serbskej zakładnej šuli „Dr. Marja Grólmusec“ chcedźa chór załožić. Nětko pytaja za angažowanej nawodnicu abo nawodu spěwneho cyłka. Chór ma šulske zarjadowanja kulturnje wobrubić, wosebje pak serbsku rěč a kulturu hajić. Klětu swjeći kubłanišćo stoty jubilej swojeho załoženja. Program chóra kaž tež dźiwadłoweje skupiny, za kotruž tohorunja nawod pytaja, ma być jedyn z wjerškow na jubilejnym swjedźenju. Zajimcy njech přizjewja so pola šulskeje nawodnicy Angele Rynčoweje pod telefonowym čisłom 035935 23275.
Přihotuja ponowjenje mosta
Stipendije za kurs čěšćiny
Budyšin. Štóž ma zajim za rěčny kurs čěšćiny wot 17. julija hač do 14. awgusta 2025 w Praze abo wot 3. hač do 25. awgusta 2025 w Českich Budějovicach, njech w Rěčnym centrumje WITAJ hač do 23. měrca swoje přizjewjenske podłožki woteda (Póstowe naměsto 2, 02625 Budyšin, e-mail ). Formular a dalše informacije su na internetnej stronje www.witaj-sprachzentrum.de přistupne.
Někotre městna swobodne
Smjerdźaca. Serbske šulske towarstwo přewjedźe w měrcu a aprylu dźěłarničku, w kotrejž móža wobdźělnicy stawiznički wuwiwać a je powědać abo hrać. Wona měri so wosebje na kubłarjow, wučerjow zakładnych šulow, staršich, wowki a dźědow kaž tež na wšitkich „wulkich“ powědarjow bajkow. Kurs wotměje so 13. a 14. měrca kaž tež 10. a 11. apryla stajnje wot 14 do 17.30 hodź. w Smjerdźečanskim Serbskim kubłanskim srjedźišću LIPA. Dokelž maja hišće někotre swobodne městna, móža so zajimcy hišće hač do kónca februara přizjewić, a to pola Hanki Šěnec pod telefonowym čisłom 01520 20 92 170.
Kniha změje premjeru
Lisćiki za póstnicy
Spominaja na awtorku
Wojerecy. Składnostnje 51. posmjertnin spisowaćelki Brigitte Reimann přeprošuje Wojerowska měšćanska biblioteka, kotraž nosy jeje mjeno, wšitkich zajimowanych srjedu, 19. februara, w 17 hodź. na čitanje do tamnišeje kofejownje. Na zarjadowanju słyšiće wujimki z listow, kotrež je awtorka přećelam-wuměłcam pisała. Zastup je darmotny. Zarjadowarjo proša wo přizjewjenje pod čo. 03571 607753 abo z mejlku na
Kamjentnu dobu dožiwić
Wojerecy. Přichodny poskitk za dźěći, kotryž ma Hród a Wojerowski měšćanski muzej w swojim programje, je srjedu, 19. februara, w 13 hodź. Dźěći w starobje 7 do 12 lět su na pućowanje do kamjentneje doby přeprošene, na kotrymž zhonja, kak su ludźo tehdy žiwi byli.
