Za dźědow, wowki a wnučki
Smjerdźaca. Wot lětušeho 6. do 8. julija přeprošuje Serbske kubłanske srjedźišćo Lipa w Smjerdźacej na zhromadne prózdninske dny za dźědow a wowki z jich wnučkami w starobje wot štyrjoch lět. Pod nawodom Lucije Handrikoweje a Marije Wjeńcyneje je stajnje wot 9 do 14 hodź. pisany program přihotowany. Mjez druhim chcedźa zhromadnje paslić a sportować, sej do Budyskeho serbskeho muzeja wulećeć a sej Staru wodarnju wobhladać. Popłatk wučinja 40 eurow na dorosćeneho a 30 eurow na dźěćo. Přizjewić móža so zajimcy z mailku na abo telefonisce pod čo. 01520 8783147.
Swjeća jubilej wsy
Lejno. Ze swjedźenskim kóncom tydźenja dopominaja na 625lětne wobstaće Lejnoho (Geierswalde) pola Wojerec. Jutře přeprošuja w 9.30 hodź. na historiske přechodźowanje po wsy. Zajimcy zetkaja so při wobydlerskim domje. W 14 hodź. přizamknje so mejemjetanje. Nimo programa dźěći změja bursku olympiadu. Njedźelu slěduje w 10 hodź. swjedźenska Boža słužba. K rańšemu piwku přewjedu wot 11.30 hodź. wubědźowanje wohnjowych woborow. W 14 hodź. přeprošuja na Lejnjanski korčmowy kwis.
Zhromadnje spěwać
Nalětni koncert chóra Lipa
Pančicy-Kukow. Chór Lipa přeproša zhromadnje z Křesćansko-socialnym kubłanskim skutkom Sakskeje wšitkich zajimcow na nalětni koncert, kiž wotměje so njedźelu, 31. meje, w 15.30 hodź. na zahrodźe zežiwjenskeho a zeloweho centruma w klóštrje Marijina hwězda w Pančicach-Kukowje. Program wuhotuja Lipjenjo zhromadnje z Błótowskim žónskim chórom z Lubina, kiž wustupi w błótowskej serbskej drasće, a z Lipkami. Chór Lipa zanjese z přewodom klawěra wurězki z oratorija „Nalěćo“ kaž tež spěwy wo lubosći a přećelstwje. Lipki přednjesu tři nowe nazwučowane spěwy z instrumentalnym přewodom a Błótowski žónski chór zaspěwa wjacehłósne pěsnje, kotrež su něhdy na přazy spěwali. Wot 15 hodź. poskićuja kofej a tykanc.
Pytaja serbskich spěwarjow
Čitanski dyrdomdej na wěžach
Budyšin. Pjatk, 12. junija, přewjedźe Rěčny centrum WITAJ za šulerjow 3. a 4. lětnika serbskich zakładnych šulow znowa čitanski dyrdomdej we wjacorych Budyskich wěžach. Nóžkujo po starym měsće wopytaja šulerjo z přewodnikami někotre Budyske wěže, zhonja wo jich stawizniskich zajimawostkach a předčitaja sej na wěžach ze swojich serbskich knihow. Mały piknik, zabawne hry a kónčny kwis zhromadny wječor skulojća. Městna su wobmjezowane, přizjewjenja přijimuja so hač do 30. meje w Rěčnym centrumje WITAJ.
Z wulkim předskokom dobył
Njeswačidło. Dalši škotowy turněr serbskich seniorow je so wčera w Njeswačidle wotměł. Z wulkim předskokom a z 3 463 dypkami dobył je Marko Kowar před Siegfriedom Höraufom (2 866) a Uwe Sieglerom (2 732). Cyłkowne hódnoćenje nawjeduje Herbert Krječmar.
Kak mobilny budźe přichod?
Kulow. Z mobilitu w přichodźe zaběra so přednošk štwórtk, 28. meje, w 19 hodź. w Kulowskim hosćencu „Město Hamburg“. Referent je Tobias Čižik, koordinator w centrumje za awtonomne jězdźenje w Čornym Chołmcu. Na přednošk přeprošuje Kulowski měšćanski zwjazk CDU. Wšitcy su wutrobnje witani.
Předstajenje knihi
Budyšin. Njeličomne su dožiwjenja, kotrež je žurnalist Jurij Wićaz do a za čas Druheje swětoweje wójny na swojich pućowanjach po swěće nazběrał. W Budyskej Smolerjec kniharni předstaja štwórtk, 28. meje, w 19 hodź. knihu „Von Kamenz nach Palästina“ z reportažemi z Kamjenca pochadźaceho žurnalista Wićaza. Mjez přitomnymi budźe wudawaćel a přełožer dr. Friedrich Pollack. Mjez druhim je do knihi politiske mordarstwo na sudniskej žurli w Praze runje tak zapřijate kaž dubiozna kriminalka w Běłohrodźe.
Radźićeljo wuradźuja
Farmu štrusow wopytać
Łaz. Swjatki njedźelu móža sej zajimcy farmu štrusow we Łazu wobhladać. Mějićel Enrico Gabel zdźěli, zo budźe wona wot 10 do 18 hodź. wotewrjena. W tym času poskićuja tam steaki a pražene kołbaski ze štrusaceho mjasa, dalše domjace wudźěłki a regionalne produkty. Wopytowarjam chcedźa nastaće a wuwiće wot lěta 2005 wobstejaceje farmy rozłožić.
Psyči sport w měsće
Kamjenc. Swjatkowny kónc tydźenja steji město Kamjenc cyle w znamjenju psyčeho sporta. Tam wotměje so wot soboty hač do póndźele němske młodźinske a juniorowe mišterstwo Towarstwa za němske wowčerske psy. Po cyłodnjowskim treningu sobotu poskićuja wopytowarjam njedźelu a póndźelu wotměnjawy program we wšelakich disciplinach. Nadrobniše informacije a wobšěrny přehlad nadeńdu zajimcy internetnje na .
Wotewru wustajeńcu
Kolesować a grilować
Tři jězdźidła přepodali
Wojerecy. Nad nowymi hašenskimi jězdźidłami typa LF 10 smědźa so wohnjowi wobornicy w gmejnje Sprjewiny Doł kaž tež w Halštrowje a Wojerecach wjeselić. Póndźelu su jim nowe awta we Wojerecach přepodali, kotrež běchu na zhromadnu skazanku třoch komunow wobstarali. Na to běchu so hižo před třomi lětami dojednali. Do třoch nowych jězdźidłow su cyłkownje 1,7 milionow eurow inwestowali. Budyski wokrjes je kóžde jězdźidło z něhdźe 240 000 eurami spěchował, rěka w nowinskej zdźělence města Wojerecy.
Swjedźeń z jubilejom
Šćeńca. Mjeztym 30. raz swjeća wot 22. hač do 24. meje w Šćeńcy (Steinitz) swjatkowny swjedźeń. Tamniša młodźina jón z wjele partnerami přihotuje. Pjatk wot 18 hodź. přeprošuja na koparsku hru tradiciskeho mustwa Dynama Drježdźany přećiwo wubrance Łazowskeje gmejny. Wječor budu reje z doublom Wolfganga Petryja. Sobotu wot 10 hodź. wubědźuja so wohnjowi wobornicy a dźěći smědźa so na swój wosebity swjedźeń wjeselić. Wječor budźe wulka party z wjacorymi sobuskutkowacymi. Njedźelu po Božej słužbje w stanje budźe swjedźeń za swójby z mnohimi poskitkami.
Pčołarska rozmołwa
Mały Wjelkow. Serbska pčólnica přeprošuje jutře, srjedu, 21. meje, na swětowym dnju pčołkow we 18 hodź. na serbske wodźenje z dr. Lubinu Malinkowej po Małym Wjelkowje. Zajimcy zetkaja so na Zinzendorfowym naměsće. Zarjadowanje wotměje so w rjedźe Serbskeho instituta „Sorabistika po puću“. Tomu přizamknje so pčołarska rozmołwa. Zajimcy njech přizjewja so na .
Interaktiwne figurowe dźiwadło
Budyšin. Němsko-Serbske ludowe dźiwadło přeprošuje štwórtk, 21. meje, na němskorěčnu inscenaciju „Jězba k srjedźišću ruma“. Mała žurla Budyskeho Dźiwadła na hrodźe přeměni so do klinčaceje rumnosće dožiwjenja, wuměłstwa a dźiwadła. Połdrahodźinska inscenacija předstaja stawizny wuměłskeho stila Bauhaus, jeho wuměłcow a wuměłče. Interaktiwna jězba skići publikumej wot dźesać lět móžnosć za swójske kreatiwne eksperimenty.
Wo wuznamje rezerwatow
Stróža. Dom tysac hatow w Stróži přeprošuje srjedu, 20. meje, w 19 hodź na přednošk pod hesłom „Němskej stataj w UNESCO-programje Čłowjek a biosfera“. W nim póńdźe wo politiski kontekst a měnjacy so wuznam biosferowych rezerwatow za přirodoškit wot 1970tych lět hač do dźensnišeho. Referentka je prof. dr. Astrid M. Eckert, historikarka w Atlanće (USA).
Předstaja swětnišćowu show
Wojerecy. Na časowu jězbu do přichoda su zajimcy wutoru, 19., a srjedu, 20. meje, do Wojerowskeje Łužiskeje hale přeprošeni. Interaktiwny jewišćowy program Němskeho centruma swětnišćoweho lětarstwa (DLR) měri so předewšěm na dźěći wot dźewjeć do 13 lět. Wyši měšćanosta Torsten Ruban-Zeh zarjadowanja na woběmaj dnjomaj zahaji. 19. meje wot 16.30 hač do 18 hodź. budźe show za swójby ze sakskim statnym ministrom za kultus, Conradom Clemensom.
Knižna premjera
Na dźeń muzejow
Budyšin. Budyski Serbski muzej přeprošuje tutu njedźelu, 17. meje, pod hesłom „Muzeje z wjeselom wotkryć“ na darmotny wopyt. Wot 17 do 18 hodź. powjedźe muzeologa Alexander Pólk po wustajeńcy „Nowa Doba. Serbja w powójnskim času a zažnej NDR“. Zdobom stej trajna a wosebita wustajeńca přistupnej.
Wjac hač mejemjetanje
Němcy. W Němcach maja cyły kónc tydźenja program kołowokoło mejemjetanja přihotowany. Wjesny klub wuhotuje zdobom wjesny swjedźeń. Mjez druhim móža wopytowarjo MAGPIE Open Air dožiwić. Dalše mejemjetanja budu mjez druhim sobotu we Wotrowje, Róžeńće a Chrósćicach a njedźelu w Njebjelčicach.
Meja njeje, swjedźeń budźe
