Za pomniki so přizjewić
Budyšin. Po lońšej přestawce wotměje so 12. septembra w Budyšinje zaso dźeń wotewrjeneho pomnika. Nimo znatych twarjenjow steja tež zaso někotre dotal hišće njepřistupne objekty na lisćinje. Koronapandemije dla su za někotre městna přizjewjenja trěbne. To potrjechi pišćeletwarsku firmu Eule, hdźež změja w 14 a w 16 hodź. wodźenje za stajnje 20 wosobow. Pjeć wodźenjow za stajnje 20 wosobow přewjedu w baroknym domje Při Mjasowych jětkach a na Tuchorskim kěrchowje změja dwě wodźeni za stajnje 25 ludźi. Za wšitke wodźenja su trěbne přizjewjenja e-mailnje pod bau.
Nachwilnje zawrjena
Pančicy-Kukow. Dokelž kupnicu Netto w Pančicach-Kukowje přetwarja a powjetša, tam wot wčerawšeho Zelnakec pjekarnja hižo swoje pječwa předawać njemóže. Tohodla poskićuja chlěb, całty, tykanc a wšitko druhe hač dosrjedź oktobra w swojej předawarni napřećo klóštrej.
Do srjedźowěka pohladać
Budyšin. Najwšelakoriše prózdninske poskitki změja hač do kónca awgusta w Budyskim Serbskim muzeju. Štwórtk, 19. awgusta, póńdźe wot 10 hodź. wo Milčanow a słowjanski srjedźowěk. Daloko sahace stawizny wjedu wobdźělnikow do zažneho srjedźowěka – do časa zasydlenja Milčanow a Łužičanow. Kotre žiwjenske poměry knježachu, kak a čehodla twarjachu hrodźišća a što je k tomu wjedło, zo su Serbja dźensa narodna mjeńšina, su stołpy wodźenja. Zajimcy wobhladaja sej zawostanki słowjanskich prjedownikow a zamysla so z praktiskimi přikładami do tuteje časoweje doby. Přizjewjenja přijimuja pod telefonowym čisłom 0 35 91 / 2 70 87 00 abo e-mailnje pod .
Předawaja kartki za pop-operu
Poslednja składnosć
Budyšin. Hnydom dwě wustajeńcy w Muzeju Budyšin stej jenož hišće hač do njedźele, 15. awgusta, widźeć. Stej to kabinetna přehladka mólbow Ulriki Mětškoweje a wosebita wustajeńca z twórbami Almut-Sophije Zielonka składnostnje jeje 55. narodnin. Přichodna wosebita wustajeńca w Muzeju Budyšin wěnuje so wot 18. septembra kopororytwarjej a nakładnikej Johannej Georgej Schreiberej (1676–1750).
Wuměłcam přez ramjo hladać
Miłoćicy. Mjeztym hižo 15. mjezynarodna rězbarska dźěłarnička při Miłočanskej skale wotměje so wot 16. do 29. awgusta. W tym času móža zajimcy 15 wuměłcam z Čěskeje, Armenskeje, Awstriskeje, Bołharskeje, Pólskeje a Němskeje při dźěle přez ramjo hladać. Šulskim rjadownjam poskićeja hač do kónca oktobra połdrahodźinske darmotne wodźenja. Přizjewjenja su móžne pod www.steinleicht.de. Wosebitej wjerškaj budźetej sobotu, 28. awgusta, hudźbny wječor a nazajtra finisaža.
Zaso regularnje wotewrjenej
Do pochowanskeho lěsa
Wustajeńca dale pućuje
Kamjenc. Loni nastatu wustajeńcu wo česćowanju swjateho Bosćana w Chróšćanskej wosadźe wotewru jutře, srjedu, w 19 hodź. w Kamjenskej Haninej cyrkwi. Nawodnica Lessingoweho muzeja dr. Sylke Kaufmann wopytowarjow po přehladce powjedźe.
Na swjedźenišću maja wodu
Němcy. Na iniciatiwu wjesneho a młodźinskeho kluba ma wjesne swjedźenišćo w Němcach nětko swójski přizamk za wodu. Hłubokotwarske dźěła za 70 metrow dołhu rołu je twarski zawod ze wsy přewzał. Sobudźěłaćer Wojerowskich zastaranskich zawodow je wšitko přizamknył. Nowy hydrant słuži zdobom za rjedźenje wodowoda.
Radźićeljo so schadźuja
Radwor. Přichodne posedźenje Radworskeje gmejnskeje rady wotměje so jutře, srjedu, we 18.30 hodź. w jědźerni tamnišeje zakładneje a wyšeje šule. W zjawnym dźělu schadźowanja póńdźe mjez druhim wo wobstaranje nowych laptopow za wučerjow a wo dróhotwarske dźěła w Boranecach.
Přizjewjenja hišće móžne
Přewjeduja dźěłarničku
Do Dubrjenskeho bahna
Michałki. Kulowska přirodoškitna skupina Nabu přeproša za zajutřišu njedźelu na prózdninske pućowanje po Dubrjenskim bahnje. Zajimcy zetkaja so w dźewjećich při hosćencu w Michałkach. Wobdźělenje płaći dwaj euraj za dorosćenych, dźěći smědźa darmotnje sobu hić.
Přewjedu hornčerske wiki
Hózk. Mjeztym hižo 18. raz wotměja so jutře a njedźelu w Hózku hornčerske wiki. 18 wobdźělnikow chce tam swoje twory poskićeć. Mjez nimi budu někotři, kiž su wot wšeho spočatka pódla, a dalši, kotřiž prěni raz přijědu. Wopytowarjow zastaruja z ćopłymi jědźemi kaž tež z čerstwym tykancom.
Za dźěłarničku so přizjewić
Na hłownu zhromadźiznu
Konjecy. Hońtwjerske drustwo Konjecy přeproša swojich čłonow na hłownu zhromadźiznu, kotraž budźe zajutřišim, 6. awgusta, w 19.30 hodź. w Konječanskej burskej stwě. Dnjowy porjad je we wuwěškowym kašćiku wupowěsnjeny.
Za pruwowanja so přizjewić
Budyšin. Rěčny centrum WITAJ přewjedźe 18. septembra pruwowanja za rěčny certifikat hornjoserbšćiny A2 a B2. Informacije k pruwowanjam a zwučowanski material namakaja zajimcy pod . Přizjewjenja přijimuje RCW hač do 18. awgusta. Dalše informacije podawa Manuela Smolina pod telefonowym čisłom 03591/ 550 413 abo e-mailnje pod .
Kniha změje premjeru
Budyšin. Křesćan Krawc předstaji zajutřišim, 5. awgusta, swoju knihu „Was wir in uns tragen“ w Budyskej Smolerjec kniharni, a to nimale po zwučenym wašnju w 19 hodź. na městnje. W Ludowym nakładnistwje Domowina wušła zběrka portretow je přełožk publikacije „Sej statok stajili“ a wopřijima tohorunja reportažu wo „Chróšćan zběžku“. Wopytowarjo měli płaćiwe postajenja hygieny wobkedźbować.
Pomhaja pěstowarni
Budyšin. Na iniciatiwu Budyskeho Lionsoweho kluba su so štyri kluby regiona k zhromadnej akciji zjednoćili pomhać wot přepławjenja potrjechenej kónčinje nad rěku Mosel. Budyski klub wobdźěli so z 5 000 eurami. Dorostowa organizacija kluba Leo Club je 2 000 eurow přinošowała. Pjenjezy su za dospołnje skóncowanu pěstowarnju w porynsko-pfalcskim Salmtalu. Dalše pjenežne dary na konto Lionsoweho kluba pod čisłom DE39 8509 0000 5091 8010 37 su rady witane.
