Zhromadnje spěwać
Budyšin. Zwjazk serbskich spěwarskich towarstwow (ZSST) přeprošuje na decemberske zhromadne spěwanje. Wone wotměje so jutře, wutoru, we 18 hodź. w chórowej rumnosći Serbskeho ludoweho ansambla. Wšitcy zajimcy su wutrobnje witani!
Radźićeljo wuradźuja
Worklecy. Přichodne posedźenje Worklečanskeje gmejnskeje rady wotměje so srjedu, 3. decembra, w 19 hodź. w horće „K wódnemu mužej“. Mjez druhim chcedźa wo planowanju ponowjenja mosta nad Klóšterskej wodu mjez Worklecami a Lejpoldom rozsudźić. Dale steja wustawki wo wotškódnjenju čłonow dobrowólneje wohnjoweje wobory na dnjowym porjedźe.
Kulturna zyma w hospodźe
Chrósćicy. Monika Gerdesowa zarjaduje w swojej putniskej hospodźe w Chrósćicach w přichodnych měsacach zaso tak mjenowanu kulturnu zymu. Zarjadowanja za dźěći a dorosćenych w serbskej a němskej rěči wotměja so wot soboty, 29. nowembra, do soboty, 7. februara, nimale tydźensce. Na prěnim wječoru su wot 18 hodź. dźěći přeprošene na bajku słuchać. W 19.45 hodź. přizamknje so knižne čitanje za dorosćenych pod hesłom „Z Prahi do Palestiny“ z Friedrichom Pollackom a Michałom Nukom. Přehlad wšitkich zarjadowanjow nadeńdu zajimcy internetnje pod .
Porěči wo serbskim molerju
Program na česć Miny Witkojc
Wo kulturnym herbstwje
Budyšin. „Přichod serbskeho kulturneho herbstwa. Što je digitalny kulturny register a čehodla jón trjebamy?“ je hesło přednoška štwórtk, 27. nowembra, w 19 hodź. w Serbskim muzeju na Budyskim hrodźe. Na njón přeprošuje Serbski institut. Přednošować budźetaj mjez druhim direktor Serbskeho instituta profesor dr. Hauke Bartels kaž tež dr. Robert Lorenc, etnologa na Serbskim instituće.
Předstaja nowu zběrku
Budyšin. Smolerjec kniharnja je jutře, štwórtk, w 19 hodź. z hosćićelku knižneje premjery zběrki „Der Fiedler unterm Dach und weitere Geschichten“. Wudała je ju Marka Maćijowa w rjedźe „Die sorbische Bibliothek“ Ludoweho nakładnistwa Domowina. Wubrane teksty předčitataj Christina Boguszowa a Jan Budar. Antologija wopřijima wot lěta 1945 do 1990 spisane powědki mjez druhim Angele Stachoweje, Křesćana Krawca, Marje Kubašec a Jurja Kocha. Cyłkownje je 17 serbskich awtorkow a awtorow w zběrce zastupjenych.
Kabaret w dwórnišću
Radźićeljo wuradźuja
Smjerdźaca. Přichodne posedźenje gmejnskeje rady Ralbicy-Róžant wotměje so štwórtk, 27. nowembra, we 18.30 hodź. w Smjerdźečanskim kulturnym domje. Hnydom na spočatku chcedźa zastupjerjo předewzaća SachsenNetze předstajić, kak ma so w Smjerdźacej milinowa syć ponowić. Dale wuradźuja radźićeljo wo tepjenju we wohnjowobornej gratowni w Konjecach a wo twarskich dźěłach w Smjerdźečanskim kubłanišću za swójby. Nimo toho porěča wo nowej mašinje za rjedźenje pućow.
Nowa CD w koncerće
Kedźbu, škotowarjo!
Wustajeja adwentnu pychu
Wudwor. Tydźeń do prěnjeho adwenta je čas, so wo adwentnu pychu w bydlenju starać. Pokiwy za to dóstanu zajimcy w adwentnej wustajeńcy Krollec zahrodnistwa we Wudworju. Njedźelu, 23. nowembra, je přehladka wot 10 do 18 hodź. wočinjena a nadźijomnje prawje wjele wopytowarjow přiwabi.
Wo stawiznach dźenika
Budyšin. „Nowa doba – čerwjeny blot abo serbski dźenik?“ je hesło zarjadowanja stawizniskeje sekcije Maćicy Serbskeje wutoru, 25. nowembra, w 15.30 hodź. na žurli Budyskeho Serbskeho domu. Zarjadowanje wěnuje so prašenju, kotre wuskutki je na nowinu měło, zo je so Nowa doba před 70 lětami, 1. oktobra 1955, z dźenikom stała. Wo tym porěčitaj diplomowaj žurnalistaj Sieghard Kozel a Axel Arlt.
Koncert w klóšterskej cyrkwi
Pančicy-Kukow. Komorny chór nota bene leipzig pod nawodom profesora Martina Krumbiegela wuhotuje njedźelu, 23. nowembra, w 17 hodź. koncert w klóšterskej cyrkwi w Pančicach-Kukowje. Mjez druhim zaklinči twórba „Musicalische Exequien“ Heinricha Schütza kaž tež kruchi dalšich komponistow 17. do 21. lětstotka. Zastup je darmotny. Organizatorojo proša wo dary.
Radźićeljo wuradźuja
Přednošuje wo krosnowanju
Isa Bryccyna wustaja
Budyšin. Pod hesłom „Wčera, dźensa, jutře“ wotewru štwórtk, 20. nowembra, w 17 hodź. na druhim poschodźe justicneho twarjenja na Budyskej Lessingowej wustajeńcu Isy Bryccyneje. Dźensa w Kubšicach bydlaca swobodna grafikarka narodźi so 1963 w Jenje a je w Halle wuměłstwo a design studowała. Wot 2002 hač do 2022 dźěłaše jako knižna wuhotowarka w Ludowym nakładnistwje Domowina. Přehladka akwarelowych mólbow a rysowankow předstaja mnohostronske skutkowanje wuměłče. Swoje mysle poda na wotewrjenju lyrikarka Róža Domašcyna. Nimo toho recituja šulerjo Serbskeho gymnazija Budyšin někotre z jeje basnjow a Mirjam Wenzel wobrubi zarjadowanje na prěčnej pišćałce. Wustajeńca je hač do 28. januara 2026 we wotewrjenskich časach justicneho twarjenja přistupna. Zastup je darmotny.
Radźićeljo wuradźuja
Chrósćicy. Přichodne posedźenje Chróšćanskeje gmejnskeje rady wotměje so štwórtk, 20. nowembra, w 19 hodź. w gmejnskim a kulturnym centrumje „Łužica“. Na dnjowym porjedźe stejitej mjez druhim planowanje šulskeje syće a kónclětne wotličene 2018. Zajimcy su wutrobnje witani.
Rozprawja wo jězbje z kolesom
Budyšin. „Tysac kilometrow z kolesom po fascinowacych krajinach“ je tema přednoška jutře, wutoru, w 20 hodź. w Budyskim Kamjentnym domje. Roland Wehle rozprawja wo swojej jězbje z groćanym konikom po južnej kupje Nowoseelandskeje. Zastup płaći sydom eurow.
Jarobinka koncertuje
Pančicy-Kukow. Poslednje zarjadowanje w lětušim rjedźe nazymskich koncertow wotměje so tradicionalnje jutře na předwječoru pokutneho dnja w Pančicach-Kukowje. Wot 19 hodź. koncertuje w awli Šule Ćišinskeho žónski ansambl Jarobinka. Spěwarki předstaja swój program „Spěwy z brunicowych kónčin“. Pěsnje pochadźeja hłownje z Delnjeje Łužicy a ze Slepjanskeje kónčiny. Zastup płaći sydom eurow. Po koncerće poskića alkoholiske a njealkoholiske napoje.
Do gymnazija pohladnyć
