Do Krabatoweho młyna
Čorny Chołmc. W Krabatowym młynje w Čornym Chołmcu wjesela so jutře, 14. meje, wot 10 do 18 hodź. na wopyt muži. Na swjedźeń ze słódnej jědźu pak su tež swójby přeprošene. Wosebje dźěći, ale tež starši wopytowarjo móžeja so tam při wšelakich hrach zabawjeć. Do Čornochołmčanskeho něhdyšeho hosćenca přeprošuje wjesny klub wot dopołdnja w 10 hodź. na zhromadny dźeń zajimcow wšitkich generacijow.
Na party do Delan
Konjecy. W towarstwowym domje w Konjecach stara so pjatk, 15. meje, DJ Frank Wjesela wo dobru naladu. Wot 19 hodź. wotměje so tam ultimatiwna party. Rejować móžeće po rytmje discofoxa z 1980tych a 1990tych lět. Zastup je darmotny.
Honače napřemo spěwaja
Jaseńca. W Jaseńcy, w Bóšičanskej gmejnje, na Jasčanskej 14 wotměje so njedźelu, 17. meje, napřemospěwanje honačow. W 9.30 hodź. so hodźinske wubědźowanje zahaji. Popłatk za wobdźělenje wučinja jedyn euro. Wobsedźerjo honačow njech přizjewja so hač do pjatka, 15. meje, pod telefoniskim čisłom 0152 04656374. Přihladowarjo su witani.
Radźićeljo so schadźuja
Njebjelčicy/Rakecy. 17 dnjowych dypkow wopřija dźensniše posedźenje Njebjelčanskeje gmejnskeje rady w 19 hodź. w rumnosćach gmejny. Mjez druhim wuradźuja wo wuhotowanskich wustawkach za wsy gmejny. Dale předstaji wuměłske towarstwo Kamjenjak z.t. swoju dźěławosć. We 18.30 hodź. zahaja wuradźowanje Njeswačanskeje gmejnskeje rady w tamnišej gratowni. Jedna z temow budźe lětuši etat.
Młodźina powali meju
Hórki/Bjebjelčicy. Hórčanske wjesne towarstwo „Při skale“ zahaji swój lětuši mejski swjedźeń pjatk, 15. meje, w 17.30 hodź. z mejemjetanjom. Tomu přizamknjetej so mejska reja a program wjesnych dźěći w stanje při wohnjowej woborje. W 19.30 hodź. su wšitcy na zabawny wječor přeprošeni, kotryž wuhotuja „Brankatschki a přećeljo“. Njebjelčanski młodźinski klub přeprošuje njedźelu, 17. meje, wot 15 hodź. na mejemjetanje. Na swjedźenskej łuce móža wopytowarjo reju wokoło meje dožiwić a sej kofej a tykanc zesłodźeć dać.
Domojnicy přeprošuja
Kak holcu serbsce zdrasćić
Smjerdźaca. Serbske kubłanske srjedźišćo LIPA w Smjerdźacej wuhotuje jutře, wutoru 12. meje, w 17 hodź. dźěłarničku na temu: „Wuslěkana – kak zdrasću dźěćo“. Popłatk wučinja dźesać eurow. Zajimcy njech drastu sobu přinjesu.
Literarne zetkanje
Budyšin. Budyska měšćanska biblioteka na Hrodowej 10 přeprošuje jutře, wutoru, 12. meje, w 15 hodź. na literarne zetkanje. W přitulnej atmosferje chcedźa so sobudźěłaćerjo z čitarjemi wo literaturje rozmołwjeć. Hač roman, biografija, wěcna kniha abo klasikar – na zarjadowanju budźe składnosć, twórby předstajić, kiž su čitarjow zahorili abo k rozmyslowanju pohnuli. Njeńdźe wo wědomostnu analyzu, ale wo wosobinski zaćišć. Zastup je bjezpłatny. Přizjewjenja pod telefoniskim čisłom 03591 534827 abo z mejlku na su witane.
Na přednošk wo mjenach
Ekonom so do debatow měša
Budyšin. Njedźela bjez awta, limit spěšnosće abo statne zasahnjenje do wikow – lědma druhi ekonom so tak zrozumliwje do aktualnych towaršnostnopolitiskich debatow měša kaž Marcel Fratzscher. Dźensa wječor w 19 hodź. porěči wón pod titlom „Technologija, globalizacija a polarizacija – kónc demokratije?“ we wobłuku Budyskich narěčow w Budyskej tachantskej cyrkwi.
Na swjedźeń do muzeja
Wojerecy. We Wojerowskim měšćanskim muzeju swjeća njedźelu wot 14 do 18 hodź. Dźeń maćerje. Wo dobru naladu stara so wokalna skupina Kontrapunkt kaž tež Wojerowske karnewalowe towarstwo.
Tango Sensations w muzeju
Budyšin. Sobotu, 9. meje, prezentujetaj Lysandre Donoso (bandoneon) a Friedemann Wuttke (klasiska gitara) w 19.30 hodź. w Budyskim Serbskim muzeju program „Tango Sensations“. Wonaj wěnujetaj so předewšěm twórbam komponista Astora Piazzolla, kotryž je tango do mjezynarodnych koncertnych žurlow wjedł a swójsku načasnu formu wuměłstwa stworił.
Měr jako tema koncerta
Na jubilejne mejemjetanje
Pančicy-Kukow. Kino za dźěći je jutře w 17 hodź. prěni wjeršk 35. mejemjetanja w Pančicach-Kukowje. Wječor je party z DJjomaj. Sobotu w 15 hodź. je zhromadna swačina a w 16 hodź. mejemjetanje dźěći a młodostnych. Wot 20 hodź. budźetaj mejski kral a kralowna na swjedźenišću a wopytowarjow wočakuja program młodźiny a reje. Po rańšim piwku njedźelu, w 11 hodź z Chróšćanskimi muzikantami a wobjedom předstaji wohnjowa wobora zabawny program. K swačinje wustupja dźěći Šule Ćišinskeho a po tym rejwanska skupina Łužiska rapsodija. Zastup je wšitke dny darmotny.
Na 30. Božu mšu
Horni Wujězd. Boža mša składnostnje 30. jubileja Hornjowujězdźanskeje awtodróhoweje cyrkwje budźe jutře, 8. meje w 17 hodź. Kemše wobrubi policajski orchester. Ewangelsko-lutherska wosada Podroždź-Horni Wujězd přeprošuje wopytowarjo po tym na zakusk a bjesadu.
Boža mša wobornikow
Róžant. Dobrowólne wohnjowe wobory gmejnow zarjadniskeho zwjazka Při Klóšterskej wodźe a susodne wobory swjeća pjatk, 8. meje, dźaknu Božu mšu składnostnje swjedźenja swjateho Floriana. Kemše započnu so w 19 hodź. w Róžeńčanskej hnadownej cyrkwi. Wšitcy wobornicy kaž tež hosćo su wutrobnje přeprošeni.
Koncertuja w hrodźe
Njeswačidło. Přećeljo domizny a kultury přeprošuja wutrobnje na prěni lětuši hrodowy koncert, kotryž wotměje so njedźelu, 10. meje, w 15 hodź, w hrodźe w Njeswačidle. Tam wustupi trio Pinheiro z Drježdźan. Třo młodźi hudźbnicy wuhotuja komornohudźbnu jĕzbu wot Brazilskeje hač do Bołharskeje.
Mejemjetanje z jubilejom
Koslow. Lětsa je tomu 40 lět, zo w Koslowje mejemjetanje přewjeduja. Tohodla tamniše wjesne towarstwo „K žorawjej“ přichodny kónc tydźenja hnydom dwaj dnjej na swjedźeń přeprošuje. Sobotu, 9. meje, wočakuje wjesnjanow a wopytowarjow zabawa wokoło meje. Wot 17 hodź. změja za dźěći hry spřihotowane. Wječor přizamknje so pisany program za wjesnjanow a jich přećelow. Wo rejwansku hudźbu postara so DJ Max. Njedźelu přeprošuja wot 10 hodź. na rańše piwko a tradicionalny koparski turněr. Wot 14 hodź. poskićuja kofej a tykanc. K tomu zaklinči dujerska hudźba. We wobłuku kulturneho programa chcedźa potom meju powalić.
Pěstowarnju dale wužiwaja
Na mejemjetanje
Radwor. Připowědźenych dróhotwarskich dźěłow dla přewjedu mejemjetanje w Radworju lětsa zašo hač hewak, mjenujcy njedźelu, 3. meje. Započatk na nawsy budźe w 15 hodź. Program wuhotuja holcy a hólcy Radworskeje katolskeje pěstowarnje a dujerjo z Wulkeje Dubrawy. Tomu slědujetej reja wokoło meje a žortny program. Wšitcy wjesnjenjo a dalši zajimcy su wutrobnje witani.
Zhromadnje spěwać
Budyšin. Zwjazk serbskich spěwarskich towarstwow (ZSST) přeprošuje na dalše zhromadne spěwanje. Wone wotměje so wutoru, 5. meje, we 18 hodź. w chórowej rumnosći SLA.
Rěčna hodźina zapósłanče
Kamjenc. Zapósłanča Sakskeho krajneho sejma Elaine Jenčec (CDU) přewjedźe přichodnu wobydlersku rěčnu hodźinu póndźelu, 4. meje, w swojim Kamjenskim běrowje na Zapadnej 4. Wot 15 do 17 hodź. móža wobydlerjo tam swoje naležnosće přednjesć. Termin njech dojednaja sej zajimcy pod telefoniskim čisłom 03578 305383 abo z mejlku na .
Křesćan Krawc čita
Hudźa na mnohich jewišćach
Ptačkam připosłuchać
Njeswačidło. Spěchowanske towarstwo Sakskeje ptačernje přeprošuje srjedu, 29. apryla, wot 17 hodź. na wodźenje po Njeswačanskim hrodowym parku, na kotrymž wobdźělnicy fifolenju ptačkow připosłuchaja. Wobdźělenje je darmotne. Zajimcy njech přizjewja so pod . Woni zetkaja so při pawiljonje ptačernje.
Powjedu po kěrchowje
Budyšin. Štóž zajimuje so za wosebite narowne kamjenje na Tuchorskim kěrchowje w Budyšinje, njech wobdźěli so tam sobotu, 2. meje, w 15 hodź. na wodźenju z Evelyn Fiebiger. Wona pokaza zajimcam kamjenje, na kotrychž su – tež serbske – teksty kěrlušow abo samo noty zadypane. Při wodźenju ma tež hudźba zaklinčeć a wobdźělnicy zhromadnje spěwaja. Wobdźělenje je darmotne. Dary su radlubje witane.
