Hałzy wotedać

Donnerstag, 07. April 2022 geschrieben von:

Njebjelčicy. Zo njebychu hromady chodojtypalenja lětsa přewulke byli, poskićuje Njebjelčanska gmejna zaso wosebity serwis. Wobydlerjo móža swoje wurězane hałzy z přeměrom hač do dźesać centimetrow sobotu, 9. apryla, wot 9 do 15 hodź. na dwór komunalneho twarskeho zawoda přiwjezć. Tam je roztřěskaja a za komunalne zaměry dale wužiwaja.

Poradźuje darmotnje

Budyšin. Prawiznik Hajko Kozel poskići póndźelu, 11. apryla, wot 15 do 16.30 hodź. dalši raz darmotne socialne poradźowanje. Tematiskej ćežišći budźetej aktualne dźěło- a socialnoprawniske wuskutki koronapandemije. Tola tež dalšim wobłukam chce so Kozel wěnować, maja-li zajimcy hinaše prašenja. Poradźowanje hodźi so tohorunja w ruskej a ukrainskej rěči přewjesć a wotměje so we wobydlerskim běrowje Lěwicy na Šulerskej w Budyšinje. Zajimcy njech přizjewja ­so pod telefonowym čisłom 035932/ 363727.

Serbske nałožki zbližiła

Mittwoch, 06. April 2022 geschrieben von:

Altenhain. Serbska ludowa wuměłča Sigrun­ Nazdalina z Wojerec je njedawno wo serbskich jutrownych nałožkach w Altenhainje pola Grimma na přepro­šenje tamnišeje wosady porěčała. W domizniskim domje rozłoži wona 30 za­jimcam serbsku rěč a drastu wšelakich regionow kaž tež chodźenje po jutrownu wodu, jutrowne spěwanje a debjenje jejkow. W debjenju móžachu so wobdźěl­nicy dojutrowneho popołdnja tohorunja sami pospytać. Wjacori wopytowarjo zwuraznichu přeće, tajke popołdnjo klětu wospjetować.

Porěči wo přełožowanju

Budyšin. Wšelake móžnosće přełožo­wanja ze serbšćiny a do njeje z pomocu digi­talnych srědkow a pomocnikow steja w srjedźišću interaktiwneho zarjado­wanja z Julianom Nyču jutře, štwórtk, wot 19 hodź. na internetnym portalu . Přednošowar mjez druhim rozkładźe, kak móža zajimcy program „Sotra“ a dalše programy w Microsoft za swoje přełožki wužiwać. Nimo toho­ poskići Julian Nyča dohlad do technologije awtomatiskeho přełožowanja a na čim so aktualnje dźěła. Wón tež wě, kak je scyła k tomu dóšło, zo móže Micro­soft nětko tež serbsce.

Z ministrom diskutować

Dienstag, 05. April 2022 geschrieben von:

Kamjenc. Zapósłanc Sakskeho krajneho sejma Alojs Mikławšk přeprošuje zajutřišim, 7. apryla, w 19 hodź. na zjawny diskusijny forum ze sakskim financnym ministrom Hartmutom Vorjohannom (wobaj CDU) do hosćenca na Kamjenskej Pastwinej horje. Pod hesłom „Zazběh po pandemiji“ poda minister wuhlad na wuwiće w Swobodnym staće Sakskej ­a w regionje w přichodnych tydźenjach a měsacach. Nimo ministra porěči k tutej temje tohorunja zastupjer statisti­skeho zarjada Sakskeje. Zajimcy su wutrobnje witani a móža so e-mailnje pod za zarjadowanje přizjewić.

Počesća basnika a komponista

Distancuja so wumjetowanjow

Montag, 04. April 2022 geschrieben von:

Njebjelčicy. Njebjelčanski gmejnski zwjazk CDU distancuje so wot wašnja wozjewjenja wumjetowanjow přećiwo zastupjerjam a podpěraćelam gmejny. Tole zdźěli předsyda gmejnskeho zwjazka CDU Křesćan Žur w nowinskim wo­zjewjenju. Dale w stejišću rěka: „Wozjewjenja buchu přez lětaki a w interneće rozšěrjene. Čłonojo zwjazka kritizuja tohorunja anonymnu formu wobwinowanjow. Wone škodźa gmejnje a wothódnoćeja čestnohamtski angažement mnohich krajanow.“

Namołwjeja k darowanju

Budyšin. Němsko-Serbske ludowe dźiwadło podpěruje „Namołwu za Ukrainu“ Budyskeho ekumeniskeho tachantskeho wobchoda a zarjaduje městno, hdźež móža so dary wotedać. Jutře, 5. apryla, kaž tež srjedu, štwórtk a pjatk stajnje wot 11 do 19 hodź. je móžno dary při jewišćowym zachodźe na Seminarskej wotedać. Trěbne su spanske měchi a isomaty, mjasowe a kołbasowe konserwy, suche płody, słódčizny, konserwěrowane žiwi­dła, zawobalenski material, tež začinjene kašćiki za prěnju pomoc, pjelški a hygieniske artikle. Dary dowjezu z nakładnym awtom do Lwiwa, zwotkelž je z awtami a transporterami rozdźěla.

Wuhotuja 11. schadźowanku

Freitag, 01. April 2022 geschrieben von:

Chrósćicy. Rěčny centrum WITAJ a župa „Michał Hórnik“ přeprošatej na 11. swójbnu schadźowanku njedźelu, 3. apryla, w 15 hodź. do Chróšćanskeje „Jednoty“. Pisany program zahaja mali rejwarjo skupiny Łužičanka a šulerska hudźbna skupina Šwintuchi. Přizamknu so dźěłarnički a zaběry za najmłódšich, mjez druhim z paslenjom a kamishibai-dźiwa­dłom. Za trochu staršich budźetej krosnowanje a dźěćaca wohnjowa wobora přihotowanej. Dale předstajitej so Serbski muzej z poskitkom a Ludowe nakładnistwo Domowina z najnowšimi wudaćemi za dźěći. Starši móža so z fachow­cami wo rěčnych kursach a rěčnym kubłanju rozmołwjeć kaž tež při kofeju a tykancu bjesadować.

Na jutrowne wiki

Wo naslědnosći rěčeć

Donnerstag, 31. März 2022 geschrieben von:

Chrósćicy. Towarstwo za wuwiće Hornjołužiskeje hole a hatow (OHTL) přeproša jutře, pjatk, w 16 hodź. na zjawne zarjadowanje w Chróšćanskej wjacezaměrowej hali Jednota. We wobłuku zdźěłanja Leaderoweje wuwićoweje strategije za spěchowansku dobu 2023 do 2027 chcedźa wo prašenjach naslědnosće zjawnje diskutować. Pod hesłom „Je naslědnosć tema za nas?“ chcedźa wo na region so wusměrjace temy turizm, bliskowočer­stwjenje, přiroda, ratarstwo a rybarstwo rěčeć. Zaměr je zwěsćić aspekty naslědnosće, kotrež budu w regionje OHTL w spěchowanskej dobje 2023 do 2027 wažne. Wobydlerjo kaž tež zastupjerjo komunow, předewzaćow, towarstwow a cyrkwjow su přeprošeni sobu debatować.

Karty placali a spěwali

Casting za lětnje dźiwało

Mittwoch, 30. März 2022 geschrieben von:
Budyšin. Za lětuše Budyske lětnje dźiwadło wot 23. junija hač do 31. julija pyta­ Němsko-Serbske ludowe dźiwadło młodych sobuskutkowacych (znajmjeńša 18 lět), kotřiž su rejwansce nadarjeni a kotřiž maja wjeselo při spěwanju a dźiwa­dźelenju. Za lětsa předwidźana hra „Sherlock Holmes a Budyska bestija“ hraje w lěće 1973 w sprjewinym mě­sće­. Předstajenja budu wšědnje nimo póndźele a wutory. Proby započnu so spočatk junija. Sobotu, 2. apryla, wot 11 hodź. wotměje so casting na pro­bowym jewišću NSLDź na Seminarskej (jewišćowy zachod). Na njón su wšitcy zajimcy wutrobnje witani. Štóž chcył so ze swojimi dźiwadźelniskimi a rejwanskimi kmanosćemi předstajić, njech přizjewi so do toho e-mailnje pod .

Radźićeljo wuradźuja

Dienstag, 29. März 2022 geschrieben von:

Njebjelčicy. Saněrowanje nadróžneho wobswětlenja w Njebjelčanskej gmejnje budźe jedna z temow přichodneho po­sedźenja gmejnskeje rady zajutřišim, štwórtk, w 19.30 hodź. w gmejnskim zarjedźe. Dale porěča radźićeljo wo dróho­twarskich planach w Pěskecach.

Worklecy. Z naćiskom hospodarskeho plana 2022 a z lětušimi projektami zaběra so Worklečanska gmejnska rada tohorunja zajutřišim w 19.30 hodź. w šulskej jědźerni. Nimo toho chcedźa nadawk za rje­dźenje šule rozdać.

Pječwo k róčnym časam

Budyšin. Pječwa k róčnym časam steja w srjedźišću přichodneho „Kofeja w třoch“, na kotryž přeprošuje Budyski Serbski muzej jutře, srjedu, w 15 hodź. Što ma plećena całta ze zelenym štwórtkom činić a kotra symbolika so za njej chowa? W běhu lěta mamy tójšto pječwow, kiž su na krute terminy wjazane. Něšto wšak maja wšitke zhromadnje – wone so na kóncu zjědźa. Wo tym a dalšim přednošuje kuratorka Andrea Pawlikowa a pječwa tohorunja k woptawanju poskića. Dokelž­ su městna wobmjezowane njech so zajimcy přizjewja pod telefonowym čisłom 03591 2708700 abo e-mailnje pod .

Na šćežkarja so wukubłać

Montag, 28. März 2022 geschrieben von:

Rakecy. Štóž rady pućuje a chcył pućowanske šćežki w regionje wobstajnje testować, móže so pola Towarstwa za wuwiće Hornjołužiskeje hole a hatow (OHTL) na šćežkarja/šćežkarku wukubłać dać. W tej funkciji móža zajimcy pućowanske šćežki kontrolować, polěpšenja namjetować a hladać, hač je wšitko w porjadku. Terminaj wukubłanja stej wot 22. do 24. apryla abo wot 13. do 15. meje w Budyskej młodowni. Zajimcy njech přizjewja so pola OHTL pod telefonowym čisłom 01523 8976414. Přizjewjenja za aprylski termin přijimuja hač do 31. měrca, za mejski hač do 30. apryla.

Wo komunalnej politice

Budyšin. Herberta Wehnerowy kubłanski skutk za komunalnu politiku přewjedźe zajutřišim, srjedu, wot 17 do 20.30 hodź. seminar „Fit za komunalnu politiku“ w rumnosćach Budyskeje žónskeje iniciatiwy na Kamjentnej 15. Mysleny je se­minar předewšěm za žony, kotrež chcedźa so w komunalnej politice angažować. Zajimče njech so telefonisce přizjewja, a to pod 0351 8040220.

Seniorojo škotuja

Freitag, 25. März 2022 geschrieben von:

Šunow. Přichodny škotowy turněr serbskich­ seniorow wotměje so wutoru, 29. měrca, w 14 hodź. w Šunowskej Fabrikskej hospodźe. Kaž organizator Měrćin Nowak zdźěli, su nowačkojo stajnje witani. Dalši turněr budźe 26. apryla w hosćencu w Kozarcach.

Wuhotuja 11. schadźowanku

Chrósćicy. Rěčny centrum WITAJ a župa „Michał Hórnik“ přeprošatej na 11. swójb­nu schadźowanku njedźelu, 3. apryla, w 15 hodź. do Chróšćanskeje „Jednoty“. Pisany program zahaja mali rej­warjo skupiny Łužičanka a šulerska hudźbna skupina Šwintuchi. Přizamknu so dźě­łarnički a zaběry za najmłódšich, mjez druhim z paslenjom a kamishibai-dźiwa­dłom. Za trochu staršich budźetej krosnowanje a dźěćaca wohnjowa wobora přihotowanej. Dale předstajitaj so Serbski muzej z poskitkom a Ludowe nakładnistwo Domowina z najnowšimi wudaćemi za dźěći. Starši móža so z fachow­cami wo rěčnych kursach a rěčnym kubłanju rozmołwjeć kaž tež při kofeju a tykancu bjesadować.

Anzeige