Dary do Pólskeje

Dienstag, 07. November 2023 geschrieben von:

Zejicy. W Zejicach su pomocnicy minjenu sobotu we wobłuku akcije Towarstwa Cyrila a Metoda „Łužica pomha“ dary za Zwjazk Carity w Ełku w sewjernej Pólskej nakładowali. Direktor Carity tamnišeje diecezy, prelat dr. Dariusz Kruczyński, kiž wudźeržuje hižo nimale lětdźesatk styki do Łužicy je dary wotewzał. Na podlěšenym transporteru njeběše dosć ruma za wšitke pakćiki. Tuž dyrbi dalši króć awto přijěć, zo by zbytne dary wotwjezł.

Nowe wotewrjenske časy

Budyšin. Smolerjec kniharnja je wot tutoho tydźenja zaso po zwučenych časach wotewrjena. Ludowe nakładnistwo Domowina zdźěli, zo wočakuja tamniši sobudźěłaćerjo kupcow kaž tež zajimcow wot póndźele do pjatka wot 10 do 17 hodź. we wobchodźe. Do bohateho poskitka knihow LND słušeja wjacore nowostki. Mjez nimi su prěnja basniska zběrka Sylwije Šěnoweje „Mosty přez morjo“, za najmłódšich čitarjow klasiske powědančko Theodora Stroma „Mały Huzolak“ w přełožku Andreje Chěžcyneje kaž tež młodźinska antologija „Prěni raz“ za čitarjow wot dwanaće lět. W 4. nakładźe předleži kniha Trudle Malinkoweje „Ufer der Hoffnung“.

Zaso na předčitanski dźeń

Montag, 06. November 2023 geschrieben von:

Budyšin. Po cyłej Němskej přewjedźe so pjatk, 17. nowembra, předčitanski dźeń. Rěčny centrum WITAJ organizuje čitanja w serbskich kubłanišćach. Štóž chce rady serbskim abo serbsce wuknjacym dźěćom předčitać, njech so hišće dźensa w Rěčnym centrumje WITAJ přizjewi. Sćelće e-mejlku na abo zazwońće pod 03591 550 414. Wjace informacijow pod: .

Jubilej w Chrósćicach

Chrósćicy. Składnostnje jubileja prěnjeho naspomnjenja Chrósćic před 800. lětami chcedźa w juniju 2025 swjedźenski ćah wotměć. W přihotach na to přeproša gmejna zastupjerjow wšitkich wsow a towarstwow na prěnje zetkanje. Wone budźe štwórtk, 9. nowembra, w 19 hodź. na Chróšćanskej farje na předstajenje wobrazow za swjedźenski ćah. Prěni naćisk je hižo na gmejnskej a wosadnej homepage wozjewjeny.

Dwurěčne kemše

Do Hórkow z Trojozynkom

Freitag, 03. November 2023 geschrieben von:

Hórki. Na nazymski koncert ze skupinu Trojozynk su wšitcy zajimcy jutře, sobotu, 4. nowembra, w 19 hodź. na Smolic statok do Hórkow přeprošeni. Wjesne towarstwo „Při skale“ poskići k tomu słódnu wječer kaž tež piwo ze suda. Zastup płaći pjeć eurow.

Na trening do Jednoty

Chrósćicy. Štóž ma lóšt na rejowanje, njech přińdźe jutře, 4. nowembra, popołdnju w 15.30 hodź. do Chróšćanskeje wjacezaměroweje hale „Jednota“. Tam wotměje so rejwanska dźěłarnička Serbskeho folklorneho ansambla Wudwor. Hólcy a holcy wot dwanaće lět su přeprošeni, so po modernych a tradicionalnych rytmach hibać. Sobu přinjesć měli jeničce dobru naladu a lóšt so pohibować.

Na Romanticu do SKI

Na wopory spominać

Donnerstag, 02. November 2023 geschrieben von:

Budyšin. Na „Nyšpor přećiwo zabyću“ su wšitcy zajimcy štwórtk, 9. nowembra, w 19 hodź. do Budyskeho klóšterka přeprošeni. Před 85 lětami běchu nacionalsocialisća na wonym dnju po cyłym němskim rajchu pogromy přećiwo Židam přewjedli. Na wonu „kristalowu nóc“ a jeje wopory ma so spominać.

Na neplacy swjedźeń

Droždźij. Njedaloko Wósporka, w Droždźiju, njedaloko Wósporka, přihotuja so na lětuši 21. neplacy swjedźeń. Tule njedźelu, wot 11 do 17 hodź. nochcedźa tam jenož neple abo, kaž druhdźe praja, ­běrny předawać a z nich zwarjene jědźe poskićeć. We wsy wotměwaja so tež přirodne a rjemjeslniske wiki. Čłonojo domizniskeho towarstwa Droždźij-Worcyn z.t. su wabjenja dla wosebity plakat přihotowali. Tón wisa na wšelkich zjawnych městnach. Zdobom pak šěrja informacije tež po syći. Zajimcy móža so za wobsahami z pomocu qr-coda wobhonić.

Wosadne popołdnjo

Bukecy. Přichodne serbske wosadne popołdnjo w Bukecach wotměje so sobotu, 11. nowembra, w 14.30 hodź. na tamnišej wosadnej žurli. Po nutrnosći přednošuje dr. Edmund Pjech ze Serbskeho instituta wo serbskim šul­stwje wot lěta 1918 hač do přitomnosće.

Na škot do Radworja

Montag, 30. Oktober 2023 geschrieben von:

Radwor. Serbscy seniorojo su zaso na škotowy turněr přeprošeni, zdźěli Měrćin Nowak z Lubija. Přichodne koło serbskich škotowarjow wotměje so jutře, 31. oktobra, w Radworskej „Zelenej hałžce“. Wot 14 hodź. je tam wšitko za kartyplacarjow spřihotowane. Nowačcy su kaž přeco wutrobnje witani. Wšako je zetkanje na to wusměrjene měć wjeselo a dobru zhromadnosć pěstować. W nowembru pokročuja swój turněr w Ko­zarcach.

Wobornicy w telewizy

Budyšin. Budyska powołanska wohnjowa wobora je 2. a 23. nowembra w 21.15 hodź. w doku-seriji „112 – Feuerwehr im Einsatz“ na DMAX widźeć. Hižo poł lěta wužiwaja wobornicy na wubranych zasadźenjach kamery na swojim ćěle, tak mjenowane bodycams, a filmuja što dožiwjeja, zdokonjeja a nazhonjeja. Zdobom wotměwaja so rozmołwy z wobornikami a wone wotedadźa komentary. Budyska wohnjowa wobora je w Němskaj jedna z najstaršich. Wona bu 27. julija 1780 jako dobrowólna załožena.

Nowotwar čakarnje

Ansamblowcy z prapremjeru

Freitag, 27. Oktober 2023 geschrieben von:

Budyšin. Serbski ludowy ansambl wuhotuje dźensa, pjatk, w 19.30 hodź. prapremjeru rejowaneho hudźbneho dźiwadła „Dych žiwjenja“ na swojej žurli. Zastup płaći 16 resp. potuńšeny 12 eurow.

Hłowna zhromadźizna SET

Budyšin. Serbske ewangelske towarstwo (SET) přeproša swojich čłonkow a čłonow kaž tež „wšitkich na serbskim ewangelskim wosadnym žiwjenju zajimowanych“ na hłownu zhromadźiznu. Zeńdźenje zahaji so wutoru, 31. oktobra, w 14 hodź. z nutrnosću w Budyskej Michałskej cyrkwi. Dnjowy porjad slědowaceje zhromadźizny wopřijima nimo rozprawow a wólbow přednošk Jana Malinka wo nowej serbskej kemšacej knize.

Na diskusiju wo šulstwje

Donnerstag, 26. Oktober 2023 geschrieben von:
Budyšin. Serbski sejm přeprošuje wšitkich, kotřiž so za prašenja serbskeho šulstwa zajimuja, pjatk, 27. oktobra, we 18 hodź., na přihotowanske zetkanje za projekt­ „Serbski kubłanski system přichoda“. Zarjadowanje wotměje so w seminarnej rumnosći „Schreiberplan“ w twarjenju Póstowe naměsto 3 w Budyšinje (2. poschod). Zachod je napřećo Serbskemu domu. Wobdźělenje je tež přez widejokonferencu pod adresu móžne. Organizatorojo wjesela so na bohate wobdźělenje.

Přehladka hišće přistupna

Mittwoch, 25. Oktober 2023 geschrieben von:

Njeswačidło. Před 300 lětami bu stary hród w Njeswačidle twarjeny a barokny park załoženy. Hišće hač do reformaciskeho dnja 31. winowca je w Njeswačanskim domizniskim muzeju widźeć wosebita wustajeńca, kotraž tole kaž tež dalše twarjenja bliže předstaja. Něhdźe sto ­fotow a šěsć witrinow zbliži wopy­towarjej te­hdyše twary, tam so wotměwace po­dawki a swjedźenje a jich nětčiše wužiwanje. W jednej witrinje dopominaja fota a teks­ty na hońtwjerski pawiljon, kotryž bu wot lěta 1721 do 1725 twarjeny a kotryž běše w 19. lětstotku skład. W ­času hitlerskeho knjejstwa bě tam lěhwo muskich młodostnych dźěłoweje słužby a nětko je tam hižo lětdźesatki woblubowana młodownja. Wustajeńca je njedźelu popołdnju a přidatnje 31. winowca přistupna.

Holaski dwójce koncertuja

Na zwjazkowej dróze twarja

Dienstag, 24. Oktober 2023 geschrieben von:

Delnja Hórka. Z poćežowanjemi nadróžneho wobchada dyrbja šoferojo hač do spočatka decembra na zwjazkowej dróze B 156 mjez Budyšinom a Delnim Wujězdom ličić. Tu kładu na wšelakich městnach tak mjenowane banketowe platy, zo bychu kromy puća stabilizowali. Twarske dźěła su w třoch wotrězkach předwidźane. Te su z Budyskeho směra přijěducy krótko před Delnjej Hórku kaž tež mjez Lěskej a Delnim Wujězdom. Z pomocu ample tam wobchad nimo twarnišća wjedu.

Informuja wo wobšudnikach

Budyšin. „Zjebanje při telefonje a druhe činki“ je hesło přichodneho serbskeho popołdnja župy „Jan Arnošt Smoler“ štwórtk, 26. oktobra, w 16.30 hodź. na žurli Budyskeho Serbskeho domu. Wo aktualnej temje zjebanja při telefonje, přez whatsapp abo mejlki budźetaj policistaj rozprawjeć. Wažne budu pokiwy, kak so najlěpje škitać. Zarjadowanje wotměje so w rjedźe přednoškow za čłonow Domowinskich skupin a towarstwow w župje kaž tež wšitkich zajimcow.

Přednošuje wo pućowanju

Tunl zawrjeny

Montag, 23. Oktober 2023 geschrieben von:
Zhorjelc. Na awtodróze A 4 je tunl pod ­Limasom hač do 27. oktobra dospołnje zawrjeny. Přičina su twarske dźěła a přihoty za dalše ponowjenje tunla. Přichodne dny dyrbja šoferojo do směra na Zhorjelc w Nieder Seifersdorfje z awtodróhi jěć a wobjězdku U 5 wužiwać. Wobchad do směra na Drježdźany wjedu přez wotbóčku Kodersdorf a wobjězdku U 4.

Serbska debata

Neuheiten LND