Spěwaja w hospodźe
Chrósćicy. Spěwny wječor wotměje so jutře, sobotu, w Chróšćanskej putniskej hospodźe. Wot 19.45 hodź. budźe tam z hosćom muska skupina Přezpólni. Njezměja jenož akordeon za přewod sobu, ale tež dosć spěwnikow za publikum, a chcedźa z nimi zhromadnje spěwać. Wšitcy zajimcy su wutrobnje přeprošeni – wšojedne, hač chcedźa swoje hłosy mócnje sobu klinčeć dać abo jenož trochu sobu zynčeć, hač staroznate ludowe pěsnje hajić abo woteznate štučki sej zaso přiswojić. W kóždym padźe je wo hudźbnu towaršliwosć postarane.
Kak drjewo po wichoru rumować
Stróža. Informaciske zarjadowanje za mějićelow lěsa přewjedźe zarjadnistwo biosferoweho rezerwata Hornjołužiska hola a haty hromadźe z wokrjesnymaj lěsniskimaj zarjadomaj Budyšin a Zhorjelc štwórtk, 1. februara, w 19 hodź. w Stróžanskim Domje tysac hatow. W srjedźišću steji rumowanje lěsow po škodach wichora „Friederike“. Wokomiknje dźě je přeco hišće jara strašne, bjez wotpowědnych znajomosćow w lěsu drjewo rumować chcyć. Při tym móhło k ćežkim njezbožam dóńć.
Porěča wo spěchowanju
Pytaja kandidatki
Wojerecy. Hišće hač do 1. februara móža wobydlerjo Wojerec kaž tež tamniše towarstwa a zwjazki zapodać namjety, kotru Wojerowčanku měli lětsa za swoje wosebity wukony z plastiku „Marta“ počesćić. Kóždej dwě lěće wuzběhuja na te wašnje čestnohamtske skutkowanje žony we wobłuku pomocy susodam, w towarstwje, w zwjazku abo na hinašim polu. Pod hesłom „Marta 2018“ měli ludźo namjety pisomnje w běrowje wyšeho měšćanosty wotedać. Měšćanska rada wo kandidatce rozsudźi. Wuznamjenjenje přepoda wyši měšćanosta na wosebitej swjatočnosći 22. měrca składnostnje Mjezynarodneho dnja žonow.
Porěča wo kubłanju
Kamjenc. Kubłanskopolitiska rěčnica frakcije Lěwicy Sakskeho krajneho sejma Cornelia Falken budźe njedźelu, 28. januara, z hosćom Kamjenskeho politiskeho rańšeho piwka. Pod hesłom „Přichod kubłanja w Sakskej“ porěči wona wo wužadanjach na polu kubłanja w Sakskej a pokaza, kak hodźeli so wone zmištrować. Zarjadowanje w Kamjenskim měšćanskim dźiwadle započnje so w 10 hodź. Zastup je darmotny. Dalše informacije nadeńdu zajimcy pod adresu www.politfruehschoppen.de.
Předstaja nowu protyku
Budyšin. Nowa hornjołužiska domjaca protyka 2018 steji w srjedźišću přichodneho zarjadowanja w Budyskej Smolerjec kniharni, a to jutře, štwórtk, w 19.30 hodź. Z hosćom budźetaj tam dr. LarsArne Dannenberg a Jan Bergmann. Wonaj předstajitaj swoje Kinsporske nakładnistwo Via Regia a jeho knižny poskitk. Wotnětka wuchadźa w nakładnistwje Hornjołužiska domjaca protyka, kotruž bě do toho wjele lět dr. Frank Stübner w swojim Budyskim nakładnistwje Lusatia wudawał.
Porěča wo ludowej basnicy
Za dźědow, wowki a wnučki
Literarne motiwy Krabata
Budyšin. W zwisku z Krabatowej wustajeńcu w Budyskim Serbskim muzeju přednošuje tam jutře, srjedu, w 19 hodź. dr. Susanne Hozyna ze Serbskeho instituta pod hesłom „Bajki jako žórło wědy. Powědančko wo kuzłarju a jeho šulerju“ wo literarnych motiwach Krabatowych bajkow a powěsćow. Přednošk budźe w serbskej rěči a simultanje do němčiny přełoženy. Hodźinu do toho, we 18 hodź., poskića wodźenje po wosebitej wustajeńcy „KRABAT – Muž – Mytos – Marka.“ Zastup płaći pjeć eurow.
Durje kubłanišća wotewrjene
Radwor. Za někotre tydźenje dóstanu šulerjo 4. lětnika swoje kubłanske poručenje a dyrbja so za dalewjeduce kubłanišćo rozsudźić. Při namakanju praweho rozsuda chcedźa wosebje jich staršich podpěrać a witaja w Radworju pjatk, 19. januara, wot 17 do 19 hodź. do Serbskeje wyšeje šule „Dr. Marja Grólmusec“ na dźeń wotewrjenych duri. Wuknjacy prezentuja swoje wudźěłki z jednotliwych předmjetow a dźěłowych zjednoćenstwow. Na prašenja k šulskemu wotběhej wučerjo a šulerjo rady wotmołwja.
Mrějacych přewodźeć
Natwarjacy kurs serbšćiny
Budyšin. Wot 5. februara hač do 11. junija 2018 wotměje so w Budyšinje natwarjacy kurs serbšćiny. Wučba je stajnje póndźelu wot 18 hodź. do 19.30 hodź. w Serbskej zakładnej šuli na Friedricha Listowej 8. Přizjewjenja přijimuje Rěčny centrum WITAJ pod telefonowym čisłom 03591/ 550400 abo e-mejlnje pod .
Radźićeljo so zetkaja
Slepo. Wjacore losy za twarske dźěła při nastawacym němsko-serbskim šulskim centrumje chcedźa čłonojo Slepjanskeje gmejnskeje rady na swojim posedźenju jutře, wutoru, w 19 hodź. w tamnišim Serbskim kulturnym centrumje rozdawać. Mjez druhim póńdźe wo wokna, wonkowne durje, škit před słóncom, róštotwar a fasadu. Wo nutřkownym wuhotowanju šulskeho twarjenja chcedźa tohorunja wuradźować.
Zymska zelenina w srjedźišću
Wojerecy. Kak móžeš zymsku zeleninu w kuchni wužiwać, kak strowa wona je a kotre jědźe móžeš z njej přihotować, to budźe tema přichodneho zarjadowanja za seniorow na Wojerowskej dźěćacej a młodźinskej farmje. Wone budźe štwórtk, 18. januara, wot 10 do 12.30 hodź. Zajimcy su witani.
Wo dźiwich pčołkach
Budyšin. Pod hesłom „Wohrožena mnohotnosć – naše dźiwje pčołki a jich škit“ přednošuje dr. Andreas Scholz jutře, sobotu, w 15 hodź. w Budyskim měšćanskim muzeju. W Sakskej je něhdźe 400 najwšelakorišich družin dźiwich pčołkow. Přednošk skići dohlad do jich mnohotnosće, do jich žiwjenskich wašnjow a podawa tohorunja pokiwy zajimowanym zahrodkarjam.
Sprjewine město za čas NDR
Budyšin. Z hosćom w rjedźe „Łužiske literarne dopołdnjo“ njedźelu, 14. januara, w 11 hodź. w Budyskim Dźiwadle na hrodźe budźe Drježdźanski awtor Dietmar Sehn. Wón je swoje dźěćatstwo blisko Budyšina přežiwił a na Lipšćanskim literarnym instituće studował. Loni je jeho kniha „Wěš hišće? – stawizny z Budyskeho wšědneho dnja NDR“ wušła. W njej wopisuje wón mjez druhim nakup w bywšim Domje mody na Naměsće Čerwjeneje armeje, rozdźělne bydlenske poměry, wopyty w hosćencach a wuchodźowanja po měsće. Wopytowarjo podadźa so na časowu jězbu do Budyskeje zańdźenosće.
Předawaja lisćiki
Pčołar – live a w filmje
Chrósćicy. Bjez pčołkow njeje mjedu, a tež žanoho sadu na štomach. Pilne pčołki pak trjebaja podpěru čłowjeka. Wo dźěle pčołarja w běhu lěta rozprawja ze swójskich nazhonjenjow Jan Šołta z Konjec jutře, pjatk, w 19.45 hodź w Chróšćanskej putniskej hospodźe. Zakład budźe zajimawy krótkofilm „Lěto pčołarja“, kotryž su před něšto časom Ralbičanscy šulerjo filmoweho kružka pod nawodom SAEK nawjerćeli. Pčołar Jan Šołta tež rady na prašenja wotmołwja. Sobotu w 16 hodź su zaso dźěći přeprošene na serbske dźěćace kino do hospody.
Stacije maja mjena swjatych
Kamjenc. Jednotliwe stacije Kamjenskeje chorownje maltezow swj. Jana maja nětko mjena škitnych swjatych. Tak je porodna stacije po swj. Margareće pomjenowana, paliatiwna stacija po swj. Rafaelu. Dalše stacije noša mjena swj. Lukaša, Bena, Borbory a Katyrny. Na te wašnje chorownja swój křesćanski charakter sylnišo zwuraznja, zdźěleja maltezojo w nowinskim wozjewjenju.
Terminy přizjewić
Kulow. Towarstwa, kluby, dobrowólne wohnjowe wobory kaž tež katolska a ewangelska wosada města Kulowa su namołwjene, swoje planowane zjawne zarjadowanja měšćanskemu zarjadnistwu přizjewić, dalokož to hišće činili njejsu. Tak ma so zadźěwać, zo so terminy kopja. Wotpowědne formulary su na internetnej stronje města wozjewjene.
Chór Lipa spěwa w stolicy
Drježdźany. Koncert k rusko-ukrainskemu hodownemu a nowolětnemu swjedźenjej wotměje so njedźelu, 14. januara, w 17 hodź. w Drježdźanskej cyrkwi Třoch kralow. Wosmy koncert tohole razu prezentuje chór Slavica. Nimo ruskeho dźěćaceho chóra Libela su sej tónraz přeprosyli Lipjanow z Pančic-Kukowa. Zastupne lisćiki za dwanaće do 18 eurow dóstanu zajimcy w předpředawanišćach kaž tež internetnje pod www.mzdw.de.
176. serbske blido
Štomiki wotbyć
Budyšin. Dwaj tydźenjej po hodźoch nětko w mnohich domjacnosćach hodowny štomik z bydlenja rumuja. Při tej składnosći město Budyšin na to skedźbnja, zo móžeš w januaru tón dźeń, hdyž čorne abo zelene wotpadkowe sudobjo wotwožuja, tež štomik darmotnje wotbyć. Tón pak dyrbi na kóždy pad pódla tajkeho wotpadkoweho sudobja stać a na nim nima hižo žana pycha być. Hač do 1,5 metrow wulke štomy w cyłym sobu bjeru, wjetše eksemplary měli so rozrězać. Wot februara dyrbja ludźo štomiki do zelenych wotpadkowych sudobjow rozkuskować.
Pola policije so informować
Rózbork. We wobłuku cyłoněmskeho dnja wysokich šulow informuje zajutřišim, štwórtk, tež wysoka šula sakskeje policije w Rózborku wo swojim dźěle. Wot 10 do 15 hodź. móža so tam zajimcy wo wukubłanskich a powołanskich móžnosćach wobhonić a sej nimo dalšich fachowych kabinetow tež kriminalnotechniski kabinet wobhladać.
