Mnohe dróhi ponowjeja
Budyšin (SN). Na mnohich wotrězkach dróhow we wokrjesu tučasnje twarja. Kaž krajny zarjad za dróhotwar a wobchad (LASuV) w Budyšinje zdźěli, wužiwaja přijomne lětnje wjedro za naprawy, zo bychu jězdnje wobnowjeli a wuporjedźeli. Tak ponowjeja tuchwilu dróhu z Noweje Jaseńcy do Bóšic. Twarske naprawy na wjesnymaj pućomaj w Rakojdach a Minakale zahaja w awgusće. Nimo zakła- dneho wuporjedźenja jězdnje składu tam wokrjesne zawody nowy wodowód. Zaměrowy zwjazk za wopłóčki Mała Sprjewja přizamknje w tym zwisku ležownosće zjawnej wopłóčkowej syći. Energijowe předewzaće ENSO wuměni milinowody. Tež Telekom wužiwa składnosć dróhotwara, zo by na městnje kładła roły za instalaciju kablow k lěpšemu zastaranju z internetom.
W Biskopicach započnu w awgusće wo- krjesnu dróhu K 7260 twarić, a to jako podlěšenje Drebnitzčanskeho puća. Tam nastanje z nowej jězdnju tež nowy chódnik.
Přeproša młodych ludźi
Budyšin. Zapósłanča zwjazkoweho sejma Marja Michałkowa (CDU) přeproša młodych ludźi w starobje 18 do 28 lět na zarjadowanje wo politice a wo hódnotach wot 21. do 23. septembra w Berlinje. W tym času wotměja so tam pod kmótřistwom prezidenta zwjazkoweho sejma Norberta Lammerta 24. dny zetkawanja. Ličba městnow je wobmjezowana. Zajimcy njech přizjewja so pod telefonowym čisłom 03591/ 351 205.
Puć móža twarić
Kamjenej. Prawniske rozestajenje wo kolesowanski pućik při zwjazkowej dróze B 96 je wotzamknjene. Šło je wo něhdźe tři kilometry dołhi wotrězk z Kamjeneje pola Rakec hač do Stróže. Wobsedźer ležownosće bě přećiwo krajnemu zarjadej za dróhotwar a wobchad skoržił, zo nochce swoju pódu předać. Zwjazkowe zarjadniske sudnistwo je skóržbu nětko wotpokazało. Pućik, kotryž hižo wot lěta 2009 planuja, móhli klětu w prěnim połlěće twarić započeć.
Přewjedu prózdninsku zaběru
Budyšin. W poslednim tydźenju lětnich prózdnin wot 3. do 5. awgusta přewjedźe Rěčny centrum WITAJ zaběru w domje Jurja Brězana w Hornim Hajnku. Wšědnje wot 8.30 hač do 11.30 hodź. smědźa so na njej šulerjo 3. do 6. lětnika wobdźělić. Dźěći budu tam mjez druhim paslić, hry hrać, čitać, wotpinać a so wjele hibać móc. Zajimcy móža so tež za jednotliwe dny přizjewić, a to pod telefonowym čisłom 03591/ 550 400 abo e-mailnje pod adresu .
Film z Berlinskej dróhu
Drježdźany. We wobłuku krótkofilmoweje nocy pokazaja jutře, pjatk, w Drježdźanach na wjacorych městnach a w běhu dnja stajnje wospjetujo film „friedenkriegen“. Je to rysowana animacija wo wójnje a měrje. Widźeć budźe film mjez druhim w nimale 90 tramwajkach, na hłownym dwórnišću a na lětanišću. Wječor předstaja pask w filmowej nocy při Łobju. Tam potom hudźba skupiny Berlinska dróha tež live zaklinči.
Intensiwny kurs čěšćiny
Budyšin. Rěčny centrum WITAJ zarjaduje lětsa zaso intensiwny kurs čěšćiny za Serbow w Chrósćicach – a to wot 1. do 6. awgusta. Čech Pavel Šlechta budźe wšědnje šěsć hodźin wuwučować. Po popołdnjach budu čěscy hóstni referenća w jich maćeršćinje k čěskej kulturje a stawiznam přednošować. Nimo wulěta do Čěskeje su zabawne wječorki planowane. Zajimcy njech so přizjewja w Rěčnym centrumje WITAJ pod telefonowym čisłom 03591 550400 abo z mejlku pod . Na swojej internetnej stronje www.recny-centrumwitaj.de podawa RCW dokładniše informacije a program.
Floristika za cyrkwje
Smochćicy. Floristiski kurs přewjedźe Smochčanski Dom biskopa Bena sobotu, 20. awgusta. Wobdźělnicy w kursu nawuknu, kak móža ze słónčnych róžow, trawow a dalšich přirodnych materialijow pychu za wołtarje a dalše městnosće w cyrkwi zhotowić. Kurs nawjeduje floristka Silvia Jonas. Přizjewjenja přijimuja hač do 20. julija pod telefonowym čisłom 035935/ 220 abo e-mailnje pod adresu .
Pytaja wučerja za kurs
Budyšin. Rěčny centrum WITAJ (RCW) poskića wobstajnje wosebite rěčne kursy k nawuknjenju serbšćiny, kotrež su myslene za staršich tych dźěći, kotrež serbšćinu wuknu, a za dalšich zajimowanych dorosćenych. Nětko pytaja zajimcow, kiž chcyli tajki zakładny kurs wot septembra w Budyšinje nawjedować. Štóž ma lóšt a sej to přicpěwa, njech zazwoni na Michaelu Hrjehorjowu w RCW pod telefonowym čisłom 03591/ 550 414 abo napisa jej mejlku pod adresu . Wona na wšitke prašenja rady wotmołwja.
Swjeća při jězoru
Halštrowska Hola. Jako kulturne wulkozarjadowanje městow Złeho Komorowa a Wojerec kaž tež gmejny Halštrowska Hola wotměje so jutře, sobotu, při Parcowskim jězoru festiwal New Sealand. Wot soboty w 11 hodź. hač do njedźele ranja w třoch chce tam dwanaće DJjow najwšelakorišu elektronisku pophudźbu hrać a wopytowarjam, kotrychž wočakuja samo z Lipska a Drježdźan, porjadnje zapyrić.
Listowe znamki měnjeć
Tom Astor přijědźe
Dźěžnikecy. 14. mjezynarodny truckerowy a countryjowy swjedźeń wot 1. do 3. julija w Dźěžnikecach změje prominentneho hosća. K zahajenju 1. julija wustupi znaty countryjowy spěwar Tom Astor. „Wjeselimy so, zo změjemy z nim woprawdźitu country-legendu na našim festiwalu“, měni Hagen Alex, kiž truckerowy swjedźeń 14. raz hromadźe z Klausom Dutschku organizuje. Wonaj wočakujetaj něhdźe 250 truckow z cyłeje Europy. Jedyn z wjerškow budźe 2. julija konwoj 25 nakładnych awtow z Dźěžnikec do Budyšina a wróćo. Jězba započnje so w 13 hodź. a traje něhdźe hodźinu.
Informuja wo swjedźenju
Nětko móža twarić
Smječkecy. Za štyri planowane nowe twarske ležownosće při Winicy w Smječkecach su wšitke běrokratiske zadźěwki přewinjene, tak zo móža tam młode swójby twarić započeć. Kaž Worklečanski wjesnjanosta Franc Brusk (CDU) zdźěli, su trěbne planowanske jednanja wotzamknjene a prěnja próstwa wo twar jednoswójbneho domu na gmejnskim zarjedźe mjeztym předleži. Hakle před dobrym lětom bě gmejnska rada Worklecy wobzamknyła, za Smječkečansku Winicu twarski plan nastajić.
Přidatne předstajenje
Budyšin. Za inscenaciju Budyskeho lětnjeho dźiwadła NSLDź „Olsenowa cwólba a wulki pozadnik“ je dale jara wulki zajim. Tohodla je so dźiwadło rozsudźiło, přidatnu inscenaciju do programa přiwzać, a to wutoru, 5. julija, w 19.30 hodź. Dalšich přidatnych terminow pak hižo njebudźe. Z tym potom po wšěm zdaću 37 razow stawiznu wokoło Egona a jeho cwólby pokazaja. Hižo k premjerje 9. junija běchu wšitke lisćiki rozpředate. Minjenu njedźelu bě prěnje přidatne předstajenje. Kaž NSLDź připowědźi, čaka klětu na wopytowarjow pokročowanje „Olsenowa cwólba wupućuje“.
Kołowokoło muzeja
Njeswačidło. Dwanaty muzejowy swjedźeń wotměje so zajutřišim, njedźelu, wot 13 hodź. na Njeswačanskim torhošću. W domizniskim muzeju wotewru wosebitu wustajeńcu „Domjace nastroje wokoło lěta 1900“. Bošečanscy dujerjo popołdnjo hudźbnje wobrubja. Na woblubowanych wikach wobdźěli so 26 rjemjeslnikow. Wětrowske towarstwo oldtimerow prezentuje swoje drohoćinki, a holcy a hólcy Njeswačanskeho dźěćaceho domu „Maks a Moric“ wjesela so hižo na to, swój nazwučowany program předstajić móc. Z čěskeje partnerskeje gmejny Lučany wustupi aerobikowa skupina. Tež wuhlad z cyrkwineje wěže budźe móžny. Wodźenja po muzeju a po hrodźe kaž tež po parku su planowane. Towarstwo přećelow domizny a kultury wjeseli so na mnohich hosći.
Swjeća wosadny jubilej
Wo wotbagrowanych wsach
Kamjenc. Na přednošk Roberta Lorenca přeproša Kamjenske stawizniske towarstwo jutře, pjatk, w 19 hodź. do tamnišeho Röhrmeisteroweho domu. Berlinjan porěči wo brunicy dla wotbagrowanych wsach. Přednošowar wěnuje so tomule procesej w jeho rozdźělnych časowych formach, tematizuje wuměłske předźěłanje dewastowanja wsow we Łužicy a wěnuje so tohorunja stawiznam praksy wotškódnjenja. Lorenc praša so za sćěhami za serbsku wjesnu kulturu a skedźbnja dale na tuchwilne połoženje před pozadkom cyłoněmskeje energijoweje debaty. Na jeho přednošk su wšitcy zajimcy witani.
Wólbam znapřećiwili
Koncertuja na hrodźe
Njeswačidło. Prěni lětuši hrodowy koncert w Njeswačidle wotměje so njedźelu, 22. meje, w 15 hodź. Pod hesłom „Nóc połneje zbóžnosće ...“ prezentuje trio Belcantissimo filmowe šlagry dweju lětstotkow. Towarstwo přećelow domizny a kultury wjeseli so na mnohich hosći.
Powjedu po hrodźišću
Wotrow. Župa „Michał Hórnik“ přeproša wšitkich zajimcow na wodźenje po Wotrowskim hrodźišću. Zarjadowanje Muzeja zapadneje Łužicy budźe wutoru, 31. meje, we 18 hodź. Zajimcy zetkaja so pod hrodźišćom při informaciskich taflach. Za lěpše planowanje prosy župa wo přizjewjenje pod telefonowym čisłom 035796/ 96 254 abo e-mailnje pod .
Rejuja wokoło meje
