Na šćežkarja so wukubłać
Rakecy. Štóž rady pućuje a chcył pućowanske šćežki w regionje wobstajnje testować, móže so pola Towarstwa za wuwiće Hornjołužiskeje hole a hatow (OHTL) na šćežkarja/šćežkarku wukubłać dać. W tej funkciji móža zajimcy pućowanske šćežki kontrolować, polěpšenja namjetować a hladać, hač je wšitko w porjadku. Terminaj wukubłanja stej wot 22. do 24. apryla abo wot 13. do 15. meje w Budyskej młodowni. Zajimcy njech přizjewja so pola OHTL pod telefonowym čisłom 01523 8976414. Přizjewjenja za aprylski termin přijimuja hač do 31. měrca, za mejski hač do 30. apryla.
Wo komunalnej politice
Budyšin. Herberta Wehnerowy kubłanski skutk za komunalnu politiku přewjedźe zajutřišim, srjedu, wot 17 do 20.30 hodź. seminar „Fit za komunalnu politiku“ w rumnosćach Budyskeje žónskeje iniciatiwy na Kamjentnej 15. Mysleny je seminar předewšěm za žony, kotrež chcedźa so w komunalnej politice angažować. Zajimče njech so telefonisce přizjewja, a to pod 0351 8040220.
Seniorojo škotuja
Šunow. Přichodny škotowy turněr serbskich seniorow wotměje so wutoru, 29. měrca, w 14 hodź. w Šunowskej Fabrikskej hospodźe. Kaž organizator Měrćin Nowak zdźěli, su nowačkojo stajnje witani. Dalši turněr budźe 26. apryla w hosćencu w Kozarcach.
Wuhotuja 11. schadźowanku
Chrósćicy. Rěčny centrum WITAJ a župa „Michał Hórnik“ přeprošatej na 11. swójbnu schadźowanku njedźelu, 3. apryla, w 15 hodź. do Chróšćanskeje „Jednoty“. Pisany program zahaja mali rejwarjo skupiny Łužičanka a šulerska hudźbna skupina Šwintuchi. Přizamknu so dźěłarnički a zaběry za najmłódšich, mjez druhim z paslenjom a kamishibai-dźiwadłom. Za trochu staršich budźetej krosnowanje a dźěćaca wohnjowa wobora přihotowanej. Dale předstajitaj so Serbski muzej z poskitkom a Ludowe nakładnistwo Domowina z najnowšimi wudaćemi za dźěći. Starši móža so z fachowcami wo rěčnych kursach a rěčnym kubłanju rozmołwjeć kaž tež při kofeju a tykancu bjesadować.
Diskutuja wo koronje
Radźićeljo wuradźuja
Ralbicy. Přichodne posedźenje gmejnskeje rady Ralbicy-Róžant jutře, štwórtk, we 18.30 hodź. w Ralbičanskej sportowni. Mjez druhim zaběraja so radźićeljo z móžnym wutwarom Róžeńčanskeho puća w Ralbicach a z nowymi rostlinami za Ralbičanske sportnišćo.
Wotrow. Tohorunja jutře, ale w 19 hodź. zetka so gmejnska rada Pančic-Kukowa na Wotrowskej starej šuli. Nimo wjacorych twarskich naležnosćow dyrbja radźićeljo mjez druhim rozsudźić, hač budu traktor z nakładowakom wotnajeć.
Pytaja tołmačerjow
Budyšin. Wohnjowoborny zwjazk Budyskeho wokrjesa pyta pomocnikow, kotřiž móhli z ukrainšćiny do němčiny a nawopak přełožować. Na te wašnje chcedźa ukrainskim ćěkancam pomhać, wobstaranja wšědneho dnja w jim cuzym kraju z cuzej rěču zmištrować. Štóž wotpowědne rěčne znajomosće ma a k tomu mobilny telefon wobsedźi, njech přizjewi so z mejlku na .
Přepodadźa hrajkanišćo a hětu
Chrósćicy. Gmejna Chrósćicy přeprošuje wšitkich zajimowanych wobydlerjow gmejny štwórtk, 24. měrca, w 17 hodź. na areal bywšeje Chróšćanskeje pěstowarnje při Satkuli. Tam chcedźa nowe hrajkanišćo a grilowansku hětu oficialnje přepodać.
Kandidatow podpěrać
Pančicy-Kukow. Podpěranske podpisma za kandidatow k wólbam krajneho rady Budyskeho wokrjesa zběraja za gmejny zarjadniskeho zwjazka Při Klóšterkej wodźe w sekretariaće zarjadniskeho zwjazka w Pančicach-Kukowje. Zajimcy njetrjebaja sej za to žadyn termin wujednać, ale maja jeno zakładne naprawy hygieny dodźeržeć. Wotewrjeny je sekretariat wšědnje wot 8.30 do 12 hodź. a přidatnje wutoru a štwórtk wot 13.30 do 18 hodź.
Diskutuja wo strowotnistwje
Šansa młodostnej so wobhonić
Budyšin/Berlin. Zapósłanča zwjazkoweho sejma Kathrin Michel (SPD) přeproša jednu młodostnu z Budyskeho wokrjesa w starobje 16 do 19 lět na wopyt zwjazkoweho sejma w Berlinje. Tak wobdźěli so wona na akciji Girls Day, ke kotrejž chce jeje frakcija dohromady 60 młodych holcow přeprosyć. Wone móža so wo politice a dźěle zapósłancow wobhonić. Termin je wot 27. do 28. apryla. Štóž ma zajim, njech napisa někotre linki wo swojej motiwaciji a njech přizjewi so hač do 21. měrca pod kathrin.michel.wk@bundestag.de.
Poskićeja wosebite wodźenja
Kamjenc. W Kamjenskim Muzeju zapadneje Łužicy powjedźe geologa Jens Czoßek njedźelu, 20. měrca, trójce po wosebitej wustajeńcy wo krydowej dobje před 90 milionami lět w Sakskej. W 11 a 14 hodź. budźetej to 45 mjeńšin trajacej wodźeni, w 15.15 hodź. dalše połdrahodźinske. Wobdźělenje płaći jeničce normalny zastup. Wobkedźbować maja wopytowarjo prawidło 3G. Wšitcy su wutrobnje přeprošeni.
Wotewrje nowy wobchod
Livestream sćěhować
Budyšin. Na přeprošenje wuběrka Zwjazkoweho předsydstwa Domowiny za naležnosće změny strukturow, hospodarstwo a infrastrukturu wotměje so jutře, pjatk, wot 14 hodź. „strategiske wothłosowanje mjez serbskimi institucijemi k ramikowym wuměnjenjam spěchowanja strukturneje změny“. Zajimcy móža prěnju hodźinu na internetnej stronje Domowiny livestream wuradźowanja sćěhować, doniž njepřizamknu so dźěłarnički.
Čěski awtor čita
Zběra medicinske produkty
Pěskecy. Štóž chce chorownjam na Ukrainje z medicinskimi wudźěłkami pomhać, móže so na Marion Althaus w Pěskecach wobroćić. Wona je minjene dny z transporterom tajke wudźěłki do jednoho klóštra w Premyślu při pólsko-ukrainskej mjezy dowjezła, zwotkelž dary dale ukrainskim chorownjam posrědkuja. Nětko přihotuje dalši transport. Trěbne su mjez druhim sylne srědki přećiwo bolosćam, material k zawobalenju zranjenjow, srědki přećiwo wysokemu ćišćej kreje, desinfekciske srědki, kompresy a sykawy. Nadrobniše informacije podawa Marion Althaus na Kamjenskej dróze 20 w Pěskecach.
Wustajeńca w centrumje
Budyšin. Składnostnje 70. narodnin poda Budyšanka dr. Sabine Kambach we wustajeńcy „Rjane časy“ dohlad do swojeho tworjenja. Přehladku wotewru pjatk, 18. měrca, w 17 hodź. w Budyskim žónskim centrumje na Kamjentnej 15. Literarno-hudźbny program wuhotuje jewišćowa dźěłarnička za pedagogow Němsko-Serbskeho ludoweho dźiwadła.
Čitaja za Ukrainu
Demonstruja za měr
Kamjenc. Zwjazk Lěwicy Kamjenc-Radeberg namołwja k demonstraciji za měr jutře, wutoru, w 17 hodź. na Kamjenskim torhošću. Njejedna so wo stronskopolitiske zarjadowanje, tuž su wšitcy wobydlerjo namołwjeni so wobdźělić. Na městnje chcedźa informować, kak móža ludźo ćěkancam z Ukrainy najlěpje pomhać. Dale změja tak mjenowany wotewrjeny mikrofon za wšěch, kotřiž chcedźa swoje měnjenje zjawnje rjec.
Přeprošuja na přednošk
Chrósćicy. Po dlěšej přestawce přeproša župa „Michał Hórnik“ zaso na zjawne zarjadowanje. Štwórtk, 17. měrca, w 15 hodź. poskići Beno Bělk w Chrósćicach přednošk wo swojich pućowanjach po Africe. Přeprošeni do wjacezaměroweho ruma „Jednoty“ su předewšěm wuměnkarjo, ale tež wšitcy dalši zajimcy su witani. Jim poskića kofej a tykanc. Přistup rjaduja po prawidle 3G, na městnje budźe móžnosć so testować dać. Wjace tajkich přednoškow za wuměnkarjow chcedźa w běhu lěta přewjesć.
Poskićeja kursaj čěšćiny
Budyšin. Štóž ma zajim na rěčnym kursu čěšćiny wot 22. julija do 19. awgusta w Praze abo wot 14. awgusta do 5. septembra w Českich Budějovicach, njech w Rěčnym centrumje WITAJ hač do 15. měrca swoje přizjewjenske podłožki woteda. (Póstowe naměsto 2, 02625 Budyšin, e-mail: ). Wotpowědny formular a dokładne informacije su na internetnej stronje pod „Nowosće“ přistupne.
Po jutrach serbšćinu wuknyć
Budyšin. Rěčny centrum WITAJ přewjedźe za serbskich šulerjow 2. do 5. lětnika, kotrež zwonka Łužicy wotrostuja, prózdninski rěčny kurs. Pod nawodom studentkow wučerstwa zeznajomja so šulerjo dopołdnja ze serbskim alfabetom a zwučuja w serbskej rěči pisać a čitać. Popołdnju dožiwja wšelake serbskorěčne poskitki. Kurs wotměje so w jutrownych prózdninach wot 19. do 22. apryla wšědnje wot 9 do 15 hodź. w Budyskim Serbskim domje. Někotre městna su hišće swobodne. Přizjewjenja přijimuje hač do 31. měrca Michaela Hrjehorjowa pod telefonowym čisłom 03591/550 414 abo e-mailnje pod .
Dróhu dospołnje zawru
